ISAÍAS 20 - Wuj Pa K'ubultzij

Aj Asiria kekich'ak aj Egipto xaq aj Etiopía

¹ O julaj i ajawinel re i tinimit Asiria chi ma Sargón xutaq b'i jun nim laj ajpatan pa tinimit Asdod, i nim laj ajpatan le x-e chu'anik ch'oj chrij i tinimit le xaq xtiki chuch'akik.

² Che taq i ij le i Ajwal xu'ijla i ma Isaías, chi uk'ojol ma Amoz, xub'ij che: “Chawesaj i a'u' chi akojom le chi lik as xaq chawesaj i axajab' che awaqan.” I ma Isaías keje ile xu'ano xresaj uxajab' xaq laj xuch'anb'a rib'.

³ Are uri xub'ij i Ajwal: “I wajpatan ma Isaías lik arewi nti uxajab' ukojom xaq laj ch'analik che ronojel oxib' junab' chi ik'awnaq, chi are pacha jun ilb'al re xaq tzijonb'al che i tinimit Egipto xaq che i tinimit Etiopía.

⁴ Xaq keje i ajawinel re i tinimit Asiria keuk'am nu b'i pa cho'ab' aj Egipto xaq i je aj Etiopía, tupu k'a je ak'alab' xaq we je rijab' chik, nti kixajab' xaq je ch'analik, lik kusanb'a li kitun chisaq re yab'al kik'ix.

⁵ I winaq lik kkixij ni kib' xaq lik kek'ix ni che wach ki'anom aj Etiopía man lik kikub'am te'eq kik'ux chke, xaq i je aj Egipto chi are te'eq kyaw ki'ij.

⁶ Che taq i ij le kkib'ij ni konojel ni'pa je jeqel chila chi taq ya: Chiwila pe ipa xeuk'isa wi i tinimit le chi qakub'am te'eq qak'ux che, chi kojupon te'eq chutz'onoxik qatob'al che re kojresaj te'eq pu'ab' i ajawinel re i tinimit Asiria. ¿Wo'or wach chik uto'ik qib' kqa'ano?”