ISAÍAS 15 - Wuj Pa K'ubultzij

Tzijonik chkij aj Moab

¹ Tzijonik chkij aj Moab: Che i a'ab' are xwulijsax i tinimit Ar, are uri xetzaq aj Moab puyej, che a'ab' are xwulijsax i tinimit Kir, are uri xetzaq aj Moab puyej.

² I winaq aj pa Dibón ke'el b'i pa o'ej prachoch i Dios chi o tzam jyub'. I je aj Moab kkitz'uyunej ni usachik uwach i tinimit Nebo xaq i Medeba. Konojel ki'anom tz'um che kijolom xaq kesam i kismachi'.

³ O i winaq ke'e pa taq b'e ru' ki'u' chi lik as, xaq o i winaq kesik'in rumal uk'axk'ol i k'ax puwi i kachoch. Pa taq k'eb'al konojel i winaq lik kkitz'uyunej xaq lik kkiyitz' uwa'al kiwach.

⁴ I ma Hesbón xaq i ma Eleale kkitz'onoj tob'al ke; lik ktataj kisik' k'a pa Jahaza. Rumali kkixij kib' i je aj-anol ch'oj chi je aj Moab xaq lik kesiksat rumal kixib'rikil.

⁵ I wanima kutz'onoj tob'al ke aj Moab, man ike pa'anem ke'anmajik ke'e k'a pa Zoar, k'a pa Eglat-selisiya. Ke'o'ik kepaqi b'i chwa jyub' Luhit, che i b'e chi k-e pa Horonaim chila kesik'in wi rumal uk'axk'ol i k'ax chke.

⁶ Ni'pa i k'otom chi o pa Nimrim xechaqijik, i es xematz'krij uxaq, xekam i tikon, lik nti jun uxaq rax xkanajik.

⁷ Rumali i winaq xe'ok chumolik ronojel ub'itaq ke xaq xkik'am b'i k'a jela ch'aqap che i raqana re i So'os.

⁸ I sik' re utz'onoxik i tob'al xsutin chi taq uchi' kulew aj Moab, i tz'uyunik kupon k'a pa Eglaim xaq k'a pa Beer-elim.

⁹ Tupu i k'otom re i Dimón lik je nojnaq che i kik', lik kintaq nu b'i nimaq taq k'ax pkiwi; jun koj kworow ni pkiqul ni'pa ketotaj chila Moab xaq ni'pa kek'asi kan chwach ulew.