ISAÍAS 13 - Wuj Pa K'ubultzij

Tzijonik re i Ajwal chkij aj Babilonia

¹ Tzijonik re i Ajwal chkij aj Babilonia, chi xya' retamaxik che ma Isaías chi uk'ojol ma Amoz.

² “¡Chiyaka i k'utb'al re i ch'oj puwi jun salsik jyub'! ¡Chiya i taqanik chke i achiyab' chi je yij che i ch'oj! ¡Chiyaka i'ab' man keje ile kixupon la chila chwach uchija ke i winaq chi o ki'ij!

³ Ya je insik'im chik i wajch'oj chi lik ko kiwach, ya inya'om chik i taqanik chke i wajch'oj chi je jachtal pu'ab' i Dios, chke ni'pa kekikot che inch'akanik, man keje ile kkiya ni utojb'alil chke ajch'oj chwij.”

⁴ Ktataj jub'an sik' pa taq es pacha ke jub'an k'iyal winaq. Ktataj jub'an ch'oqowik ke i nimaq taq tinimit, ke i tinimit chi kimolom kib'. I Ajwal chi ronojel ktiki che krik'awsaj kib'i ni'pa uwinaq chi je yijil chu'anik ch'oj.

⁵ Kipetik che jun tinimit naj, lik k'a jela xetaq kaj ulew. Are i Ajwal ru' uchapb'al re i roywal kk'un chusachik uwach ronojel uwach ulew.

⁶ Chixsik'in rumal i b'is, man i ij re i Ajwal naqaj chik o wi, kk'unik pacha jun ch'ayanik re i Ajwal chi Ronojel Ktiki Che.

⁷ Are uri konojel i winaq chwach i jyub' ta'aj kkiya ni che kiteleb' kqajik, konojel kqaj ni ukowil kik'ux,

⁸ xaq lik rumal kixib'rikil kkijeq ni siksatik. Kpe ni jun uyej pkiwi xaq jun nim laj k'ax chi lik kkib'a'tuj kib' rumal uk'axk'ol, pacha ku'an jun ixoq ru' utujanik. Lik to' kkitaqej chik kib' chkiwach xaq kjuluw kipalaj rumal kik'ix.

⁹ Ya kk'un i ij re i Ajwal, chi lik k'ax laj ij, are i ij re i roywal chi lik kjuluwik, chi ku'an ni che uwach ulew jun tz'inilik jyub' chaqij xaq kuk'is ni kiwach ajmakib' chi je o chwach ulew le.

¹⁰ I ch'umil xaq i jalajuj taq Mutz ch'umil chwa taq kaj kkimayij tzunik, i ij lik k'atene kel loq k-equmar uwach xaq i ik' kwalch'in ti chik.

¹¹ I Ajwal kub'ij: Kinya ni tojb'alil pkiwi i winaq chwach i jyub' ta'aj rumal kimak, man lik kinya ni utojb'alil chke i utz ti laj taq winaq rumal i utz taj chi kki'ano, kink'is ni kiwach i winaq chi kki'an nim che kib' rumal ukojik ki'ij, kinqajsaj ni ki'ij i winaq chi lik je b'uy, xaq i je k'an laj taq winaq.

¹² Kin-an ni chke achiyab' chi lik mas je lo' chwach i wajim an-o'oj chi paqal rajil chila pa tinimit Ofir.

¹³ Are uri i kaj kyikyat na xaq i jyub' ta'aj kel ni puk'ijib'al rumal woywal chi o che i ij le, rumal ujuluwik i woywal.

¹⁴ Are uri i winaq, lik pacha taq je ral taq chab'at je oqtam, xaq pacha je chij chi nti keyu'uwik, chkijujunal ketzalij chik pkitinimit, we ntaj ke'anmajik i ketzalij chub'i pkitinimit.

¹⁵ Konojel ni'pa kkiya kib' chi keriqtajik lik kpil ni ch'ich' chke, konojel ni'pa kkiya kib' kechapik lik kekamsax na.

¹⁶ Lik chkiwach kexa' ni kak'al chwach ulew chi k'a je ch'utiq, lik kjok nu b'i upam kachoch chke xaq i kixoqil lik kechap ni pa cho'ab'.

¹⁷ Chiwila pe wach kiminik kin-an chke aj Media pa ch'oj chkij ike le, chi nti kub'ij kik'ux che i saq-o'oj xaq mitene che i an-o'oj.

¹⁸ Ru' kich'ab' kkiqajsaj ni k'ojolab' xaq i apojib'. Lik kkil ti tob'al kiwach i je noch' chi k'ate je alaxnaq xaq i ak'alab'.

¹⁹ Man chke i aj Caldea i Babilonia keje pacha jun perla ke i nimaq taq tinimit, chomiq taq ab'aj re wiqb'al ib' xaq kojb'al ki'ij aj Caldea, ile kkanaj na pacha x-on i Sodoma xaq i Gomorra are xinsach kiwach.

²⁰ Lik nti chik winaq kejeqi chwach, lik nti chik jun kjeqi taq chwach i tinimit le. I je aj Arabia ke'uxlan ti chik chila, mitene i je ajyu'ul chij kekuxlansaj ti chik i jalajuj taq kichikop chila.

²¹ Lik chila kejeqi wi i chikop aj pa taq es, i tukur kkinojsaj ni upam i ja, i chak'nos kejeqi ni chila, xaq i chab'at kesak'lin ni chikaj chila.

²² I tz'i aj pa taq es ke'awun ni pa chomiq taq k'ijib'al, xaq pa nimaq taq rachoch i ajawinel je o ni utiw. Ya knaqajab' u'ij i Babilonia, lik k'iyal ti chik ij chwach.