ISAÍAS 12 - Wuj Pa K'ubultzij

B'ix re tioxb'al

¹ Che taq i ij le kab'ij na: “Kintioxij chawe, Ajwal, man tupu xpe awoywal chwe xwiri ya xik'awik xaq xaya chik i chomb'al ib' chwe.

² I Dios are kintowik, rumali kul ink'ux xaq kinxij ti wib'. I Ajwal are tob'al wib' xaq are incho'ab', are Ire tol we.”

³ Xaq yix utz kix-e chutu'ik i ya ru' kikotemal chi are i ralaxb'al ya re totajik.

⁴ Xaq kib'ij tan chik: “Chitioxij xaq chinataj u'ij i Ajwal, chilapa chke i nimaq taq tinimit ronojel ni'pa i b'iroxik chi u'anom, chikuxtaj chke chi are Ire o puwi ronojel.

⁵ Chib'ixaj i Ajwal, man u'anom nimaq taq b'iroxik chi rajwaxik ketamax chwach ronojel uwach i jyub' ta'aj.

⁶ Chixsik'in rumal kikotemal, winaq aj Sion, man i Lo'laj Dios re Israel o chixol yix ru' ronojel unimal uk'ux.”