Hechos 9 - Wuj Pa K'ubultzij

Ujalwachixik uk'aslemal ma Saulo

¹ Tz'aqat, i ma Saulo xumayij ti ub'ixkil chi keukamsaj ni'pa i winaq chi kekojon che i Ajwal. Rumali xuk'ut rib' che i atz laj rajpatan i Dios,

² Are uri xutz'onoj uwuj re i rokb'al pa taq ja re molb'al ib' ke i judío pa tinimit Damasco, tzukb'al ke i winaq chi kimajom i k'ak' b'e chi are uk'utunik i Ajwal, chi achiyab', chi ixoqib', lik keuk'am b'i prexil chila Jerusalén.

³ Xwiri, are ya naqaj chik o wi che i tinimit Damasco, xaqte'et xwinaqir jun a' chikaj chi lik xwalch'in chrij chwach.

⁴ Are uri ma Saulo xtzaq pulew xaq xuta jun ch'awb'al chi xub'ij: Ma Saulo, ma Saulo, ¿B'uchak ka'an ch'oj chwij?

⁵ I ma Saulo xutz'onoj che: ¿At pachin Yet, Nim laj Winaq? I ch'awb'al xub'ij che: Yin in Jesús, chwij yin kattijin wi chu'anik ch'oj.

⁶ Chatwalijoq, jat pa tinimit, chila kb'ix wi chawe wach ka'ano.

⁷ I achiyab' chi je rachi'il ma Saulo le, lik je oknaq il man xkita i ch'awb'al, xwiri xkil ti uwach pachin xch'awik.

⁸ Te'uri ma Saulo xwalij chwach ulew; xwiri are xujaq ub'a'wach, ktzun ti chik. Rumali xkich'elej b'i che u'ab' xaq xkik'am b'i pa tinimit Damasco.

⁹ Oxib' ij xk'iji chila, chi lik ktzun taj, kutij ti chik uwa xaq kutu' ti chik uya'.

¹⁰ Pa tinimit Damasco le, o jun achi jeqel chila chi kkojon che i Ajwal, ma Ananías ub'i. I Ajwal xuk'ut rib' che puwach xaq xub'ij che: “¡Ma Ananías!” Ire xula' uwach che: “¡Riy in oliki, Ajwal!”

¹¹ Are uri i Ajwal xub'ij che: Chatwalijoq, jat che i b'e chi ub'i: “B'e Suk'ulik”, chila chi rachoch ma Judas, chach'ob'o raqan jun achi chi ma Saulo ub'i, aj pa tinimit Tarso. Man ire ktijin che i lapanik ru' i Dios,

¹² man rilom chik puwach chi kupon jun achi ru', chi ma Ananías ub'i, kuya ni u'ab' puwi man keje ile ktzun tan chik ire.

¹³ I ma Ananías, are xuta iri, xub'ij: Ajwal, je k'i winaq kib'im chwe chi i achi le lik k'i jalajuj taq k'ax u'anom chke i winaq chi je kojonnaq che i Dios pa Jerusalén.

¹⁴ Wo'or k'unnaq waral, man i kaj-atzil i rajpatan i Dios xkiya che chi keuchap b'i ni'pa i winaq chi kkikoj a'ij man keutz'apij pa prexil; xcha.

¹⁵ Xwiri i Ajwal xub'ij che: Jat, man yin in-ulum achi le re kub'ij intzij chke i winaq re i jub'an chik nimaq taq tinimit, chke i ajawinelab' xaq chke aj Israel.

¹⁶ Yin kink'ut ni che chi lik k'i uyej kutij wumal yin, rumal intzij chi kub'ij na.

¹⁷ Are uri ma Ananías x-e ru' ja ipa o wi ma Saulo. Are xok b'ik, xuya u'ab' puwi i xub'ij che: —Wachalal chwach i Cristo, ma Saulo, i Ajwal Jesús chi xuk'ut rib' chawe pa b'e, are xintaqaw li awu', man keje ile kattzun tan chik xaq kok ni Lo'laj Utewal i Dios pawanima.

¹⁸ Are uri ma Saulo juntir lik pacha taq xk'ojon ub'a'wach xaq xtzun chik. Are uri xwalijik xaq xqajsax ya puwi.

¹⁹ Te'uri, xutij uwa xaq xpe chik ucho'ab'. Xaq xkanaj keb' oxib' ij ku' i winaq chi je kojonnaq che i Dios chila Damasco.

I ma Saulo kub'ij utzij i Dios pa Damasco

²⁰ I ma Saulo juntir xujeq ub'ixkil pa taq ja re molb'al ib' ke i judío chi i Jesús are Uk'ojol i Dios.

²¹ Konojel ni'pa xkita ire le, lik xkib'isoj xaq xkib'ij: —¿Xatab'a are ti achi ile chi ku'an ch'oj chkij ni'pa kkikoj utzij i Jesús chila pa Jerusalén? ¿Are ti b'awa ire ile chi xaq xk'un waral chkichapik re keujach chke i kaj-atzil i rajpatan i Dios?

²² Xwiri i ma Saulo lik xukowij uwach chub'ixkil utzij i Dios, rumali lik xusach kinojb'al i aj Judío chi je jeqel pa Damasco, k'utb'al re chke chi i Jesús lik are i Cristo.

I ma Saulo x-anmaj chkiwach i aj Judío

²³ Are ik'awnaq chik k'iyal ij, i aj Judío xkijunamsaj kitzij chkiwach chi kkikamsaj ma Saulo,

²⁴ xwiri ire xretamaj. Chipa'ij chicha'ab' o jujun achiyab' koy-em xol uchija re i elb'al b'ik re i tinimit re kkikamsaj,

²⁵ xwiri i winaq chi kikojom utzij i Jesús xkiya ma Saulo chupam jun nim laj chikach, cha'ab' xkiqajsaj b'i chrij i tapial nim uwach chi usutim rij i tinimit. Keje u'anmajik ma Saulo ile.

Ma Saulo o pa Jerusalén

²⁶ I ma Saulo are xupon pa Jerusalén xraj umolik rib' ku' i winaq chi je kojonnaq che i Dios; xwiri konojel kkixij kib' che, man kkikoj taj we lik qatzij kojonnaq chik ire che i-Dios.

²⁷ Xwiri ma Bernabé xuk'am b'i ku' i apostolab' man kketamaj uwach. Xulap chke chi ma Saulo xril uwach i Ajwal pa b'e, xaq xub'ij chi i Ajwal lik xlapan ru' chi xaq i ma Saulo ub'im utzij i Jesús ru' ukowil uk'ux chila pa Damasco.

²⁸ Keje uri ile chi ma Saulo xkanaj kan pa Jerusalén, xaq xb'in junam ku' i winaq chi je kojonnaq che i Dios xaq lik xub'ij utzij i Ajwal ru' ukowil uwach.

²⁹ Xlapan ku' xaq xkichap kib' chitzij ku' i Judío chi kech'aw pkich'ab'al aj Grecia; xwiri ike le xa kkitzukuj ukamsaxik.

³⁰ I qachalal chwach i Cristo are xketamaj ile, xkik'am b'i ma Saulo pa tinimit Cesarea, te'uri xkitaq b'i pa tinimit Tarso.

³¹ Are uri i tzob'aj re i Dios chi je o pa ronojel taq jyub' re i tinimit Judea, Galilea xaq i Samaria lik o i chomb'al k'uxij ku' xaq ktijin uk'iyik kik'aslemal chwach i Dios. Ike lik xkowir ukub'ib'al kik'ux man lik xkijek' kib' che i utz taj chwach i Ajwal, xaq rumal utob'al Lo'laj Utewal i Dios lik ktijin kik'iyarik i winaq chi kekojon che i Dios.

Rutzirsaxik ma Eneas rumal ma Pedro

³² I ma Pedro are ktijin chkisolixik i qachalal chwach i Cristo, xaq x-e chkisolixik jub'an chik chi je o pa tinimit Lida chi xaq je re chik i Cristo.

³³ Chila xuriq jun achi chi ma Eneas ub'i; o chik wajxaqib' junab' che chi kotz'ol chwach ch'at man sikirnaq uch'akul.

³⁴ Are uri ma Pedro xub'ij che: —Ma Eneas, i Jesucristo katrutzirsaj, chatwalijoq xaq chayaka b'i asok i jat. Are uri i ma Eneas le juntir xwalijik.

³⁵ Konojel i winaq aj pa tinimit Lida xaq aj pa tinimit Sarón are xkilo chi xwalij i achi le, xkijach kib' pu'ab' i Ajwal.

Ati Dorcas xwalij che i kamik chkixol i kamnaq

³⁶ Che taq i ij le o jun ixoq chila pa tinimit Jope chi kojonnaq che i Dios, chi ati Tabita ub'i, (pkich'ab'al i aj Grecia winaq ke'eloq Dorcas). I ixoq le, utz laj winaq xaq lik keuto i nib'a'ib'.

³⁷ Xwiri che taq i ij le, i ati Dorcas x-on iwab' xaq xkamik. Rumali xkatinsaj te'uri xkiya chupam i jutasaj k'ijib'al chi o che i ukab' le.

³⁸ I tinimit Jope le naqaj o wi che i tinimit Lida ipa o wi ma Pedro; i winaq chi je kojonnaq che i Jesús, are xketamaj chi chila o wi ma Pedro, xekitaq b'i keb' achiyab' chub'ixkil che: Lik juntir chatpet qu' chi pa Jope; xecha.

³⁹ Are uri ma Pedro x-e ku'. Are xuponik, xkik'am b'i chila ipa o wi i kamnaq. Konojel ixoqib' malkanib' xkimol la kib' chrij chwach, lik ke'o'ik xkik'ut ni'pa i k'ul che xaq i jurjaq k'ul chi u'anom ati Dorcas are k'as te'eq.

⁴⁰ I ma Pedro xeresaj b'i jub'i' konojel chisaq, te'uri xxuki qaj ru' i kamnaq xaq xlapan ru' i Dios puwi, are uri xumaj utaqexik xaq xub'ij che: —¡Tabita, chatwalijoq! Xaqte'et i ixoq le xujaq ub'a'wach, are xrilo chi o ma Pedro ru', xkub'i anoq.

⁴¹ I ma Pedro xuchap che u'ab', xutak'b'a anoq. Te'uri juntir xeusik'ij i winaq chi je kojonnaq che i Jesús xaq i ixoqib' malkanib', are uri lik k'as ati Dorcas xuk'ut chke.

⁴² I anik le x-etamax che ronojel tinimit Jope, are uri je k'i i winaq xkikoj i Ajwal.

⁴³ I ma Pedro xkanaj k'iyal ij pa tinimit le, chila chi rachoch ma Simón chi ajyijb'al tz'um.