Hechos 21 - Wuj Pa K'ubultzij

U'enam ma Pablo pa Jerusalén

¹ Are xeqaya kan i qachalal chwach i Cristo, xoj-an b'i pa barco xoj-e suk'ulik pa tinimit Cos, chukab' ij xoj-e pa Rodas, are uri xojel chik chila xoj-e pa Pátara.

² Chila pa Pátara xqariq jun barco chi k-e pa Fenicia, are uri xojok b'i chupam.

³ Are oj o puwi i ya, xqil pan i ulew Chipre chi setel chwi i mar, xkanaj kan pa moxim chqe, keje ile k'a xojupon pa tinimit Siria. Xwiri i barco o eqan kuya kan chila chuchi' i mar pa tinimit Tiro, rumali chi xojok b'i pa tinimit le.

⁴ Chila xeqariq wi i jutzob'aj re i Dios are uri xojkanaj kan wuqub' ij ku'. Ike xkib'ij che ma Pablo chi i Lo'laj Utewal i Dios ub'im chke chi k-e ti pa Jerusalén.

⁵ Xwiri, are xik'aw wuqub' ij, xojel b'i chila. Konojel achiyab' ixoqib' xaq i ak'alab' xojkachi'ilaj b'i k'a tzam ja re i tinimit; are xojupon chuchi' i mar xojxuki che i lapanik ru' i Dios.

⁶ Te'uri xeqa'ijla kanoq, xaq xoj-an b'i pa barco, xaq ike xetzalij chik chi kachoch.

⁷ Xqamaj chub'i qab'e chwi mar, pa Tiro chi xoj-e k'a pa tinimit Tolemaida; chila xeqa'ijla i qachalal chwach i Cristo are uri xojkanaj kan ku' jun ij.

⁸ Chukab' ij, xojel chila xoj-e k'a pa tinimit Cesarea. Are xojupon chila xoj-e chi rachoch ma Felipe chi ajpaxsanel utz laj tzij k'ak' re i Dios, chi are jun chke i wuqub' chi ketow i apostolab', are uri xojkanaj kan chila ru'.

⁹ I ma Felipe je o kajib' umi'al chi nti kachijil, ike le je profeta.

¹⁰ O tan chi ij qa'olem chila, are uri xupon jun profeta chi ma Agabo ub'i, chi petnaq pa Judea.

¹¹ Are xupon chqawach, xuk'am i ximb'al upam ma Pablo, xuyut' che i raqan xaq che i u'ab', te'uri xub'ij: —I Lo'laj Utewal i Dios kub'ij, chi chila pa Jerusalén keje iri kki'an ni aj Judío che i rajaw i ximb'al pamaji xaq kkijach ni pki'ab' i ne te aj Judío —xcha ma Agabo.

¹² Are xqata yoj ile junam ku' i jutzob'aj chi kekojon che i Dios aj Cesarea, lik xqatij qa'ij chub'ixkil che ma Pablo chi k-e ti pa Jerusalén.

¹³ Xwiri i ma Pablo xub'ij chqe: ¿B'uchak kixo'ik xaq lik kipetsaj inb'is? Rumal i Ajwal Jesús yin lik kinya wib' chke kinkiyut'u xaq kinya ne wib' chke we kinkikamsaj pa Jerusalén.

¹⁴ Xwiri yoj xojtiki ti chu'atixik, rumali xqaya b'i che chi k-ek xaq xqab'ij che: —Chu'ana ni Ajwal, chrij pacha i kraj.

¹⁵ Chrijil chik ile, xqayijb'a qib' xaq xqamaj b'i qab'e pa Jerusalén.

¹⁶ Xojkachi'ilaj b'i jujun chke jutzob'aj chi kekojon che i Dios aj Cesarea, ike le xojkik'am b'i chi rachoch jun achi aj Chipre chi ma Mnasón ub'i, ire ya ujer tan ukojom utzij i Dios xaq xuya chqe chi xojkanaj ru' chi rachoch.

Ma Pablo kusolij i ma Santiago

¹⁷ Are xojupon pa Jerusalén, i qachalal chwach i Cristo lik xojkik'ulaj ku' ru' kikotemal.

¹⁸ Chukab' ij, i ma Pablo x-e qu' chusolixik ma Santiago xaq chila je o wi i unimaqil ke i jutzob'aj chi kekojon che i Dios.

¹⁹ I ma Pablo xuya rutzil kiwach, te'uri xok chulapik chke ronojel ni'pa u'anom i Dios rumal ire ku' i ne te aj Judío.

²⁰ Are xkita ile, xkikoj u'ij i Dios. Xaq xkib'ij che: —B'ay, wachalal chwach i Cristo, pacha iwilom chi chkixol aj Judío lik je k'i chi kijachom kib' pu'ab' i Ajwal, xwiri konojel ike is kkib'ij chi lik o uchak kqa'ano chrij pacha u'atb'al tzij i mam Moisés.

²¹ Xaq b'ital chke chi konojel aj Judío chi je jeqel naj, yet ak'utum chke chi kkiqel i u'atb'al tzij i ma Moisés, man xab'ij chke chi nti uchak chi k-an i circuncisión chke i kak'al, xaq mitene kki'an i jalajuj taq anoj chi kqa'an yoj; xecha.

²² ¿Qatzij uri ile ni'pa i kb'ixik le? Man wo'or i winaq lik kketamaj na chi xatk'unik.

²³ Are utz cha'ana iri: Je o kajib' achiyab' chqaxol chi ki'anom jun sujun chwach i Dios chi lik o rajwaxik kki'an che taq i iji.

²⁴ Cheak'ama b'i awu', i junam chi'ana li ch'am che iwib' xaq chatojo ronojel ni'pa kkisacho man keje ile ike kkesaj kiwi. Man keje uri ile kkil ub'e chi qatzij taj ni'pa i kitom chawij, man ru' ile, kkilo chi xaq yet ka'an ronojel chrij pacha u'atb'al tzij i ma Moisés.

²⁵ Xwiri, i qachalal chi ne te aj Judío chi xkikoj utzij i Dios, qataqom chub'i jun wuj ku', chi xqatz'ib'aj b'i chupam ni'pa xqach'ob'o chi are iri kki'ano: Mkitij i ti'ij chi sujtal chkiwach taq tiox, mkitij i kik' xaq mkitij i chikop we xa je jitz'am xaq i jun mumin rib' ru' jun we k'ulinaq ti ru'.

Uchapik i ma Pablo pa rachoch i Dios

²⁶ Are uri ma Pablo xeuk'am b'i kajib' achiyab' ru', xaq chukab' ij junam xki'an ch'am che kib'; te'uri xok b'i prachoch i Dios chub'ixkil chke junpa kk'is i ij re u'anik wach taq kisujum chwach i Dios, chi ke'eloq junpa kkisujuj kisipon chkijujunal chwach i Dios.

²⁷ Are ya kk'is i wuqub' ij, o jujun chke aj Judío chi je aj pa tinimit Asia, xkil uwach i ma Pablo prachoch i Dios are uri xe'ok chkich'ujersaxik konojel i winaq. I xkichap i ma Pablo

²⁸ xaq xesik'in chub'ixkil i tziji: “¡Ix aj Israel, chojito! Are i achi iri, chi xaipa ktijin wi chuk'utik chke i winaq chi xa kupetsaj i ch'oj pqatinimit xaq i uk'utunik lik kch'ojin chrij u'atb'al tzij mam Moisés xaq chrij i chom laj rachoch i Diosi. Xwi ta la ile, xaq je uk'amom li jub'an achiyab' aj Grecia prachoch i Dios chuqajsaxik u'ij i Lo'laj k'ijib'al re i Dios.”

²⁹ Keje ile kkib'ij man ujer kilom uwach ru' ma Trófimo chi aj Éfeso, rumali xkich'ob' ike chi ma Pablo uk'amom b'i ru' prachoch i Dios.

³⁰ Are uri konojel i winaq re i tinimit xkijeq ch'oqowik xaq lik konojel xkimol la kib'. Are uri xkichap i ma Pablo xaq xkicharej b'i chwaja che i rachoch i Dios, juntir uri xkitz'ap la li uchija.

³¹ Are ya kkikamsaj i ma Pablo, xupon utzijol ru' i aj-ok'al utzam chke i achiyab' chi je yij che i ch'oj, chi konojel i winaq aj Jerusalén lik pacha taq je ch'ujernaq.

³² Are uri chi xumol la kichi' i achiyab' chi je yij che i ch'oj xaq i kaj-atzil, juntir xe'e pa'anem k'a chila ipa kimolom wi kib' i winaq. I winaq are xkil i achiyab' chi je yij che i ch'oj xaq i aj-ok'al utzam chke, xkimayij uri uch'ayik ma Pablo.

³³ Are uri i aj-ok'al utzam chke i achiyab' chi je yij che i ch'oj, xtejeb' pan ru' ma Pablo xuchapo xaq xutaq uximik ru' keb' karena. Te'uri xutz'onoj chke i winaq pachin ire le xaq wach umak u'anom.

³⁴ Xwiri, o jujun kkib'ij jun tzij xaq o jub'an chik kkib'ij junwi tan chik tzij, rumali chi i aj-ok'al utzam chke i achiyab' chi je yij che i ch'oj xumaj ti usuk' wach taq uchak xki'an i ch'oqowik le; rumali xub'ij chke chi kkik'am b'i chila pkik'ijib'al i achiyab' chi je yij che i ch'oj.

³⁵ Are xeupon che i cholchol re i k'ijib'al ipa ke'uxlan wi i achiyab' chi je yij che i ch'oj, xkeq la b'i ma Pablo chel kij man i winaq lik kkaj ukamsaxik;

³⁶ man konojel je teren b'i chkij kesik'in chub'ixkil i tziji: ¡Chkamsaxoq!

Ulapanik i ma Pablo chkiwach i winaq

³⁷ Are ya koksax b'i pa k'ijib'al ke i achiyab' chi je yij che i ch'oj i ma Pablo xutz'onoj che i atz laj aj-ok'al utzam: —¿Kaya chwe kinlapan jub'i' awu'? I atz laj aj-ok'al utzam le xub'ij che: —¿Kariq b'awa ch'awik pa ch'ab'al griego?

³⁸ ¿Yet ti b'ari at aj Egipto chi jela kanoq xajeq jun ch'oj, xaq xeak'am b'i lajujmo' (4,000) achiyab' chi ajkamsanelab' pa tz'inilik jyub' chaqij?

³⁹ I ma Pablo xub'ij che: —Yin taj. Yin in aj Judío, in alaxel pa tinimit Tarso chi are jun tinimit lik nim u'ij re i nim laj tinimit Cilicia; xwiri kintz'onoj utzil chawe chi chaya chwe kinlapan ku' i winaq.

⁴⁰ I aj-ok'al utzam chke i achiyab' chi je yij che i ch'oj, xuya che chi klapan ku' i winaq, are uri ma Pablo xtak'i an che i cholchol xaq ru' u'ab' xuk'ut chke i winaq chi mech'aw chik. Are xkimayij i ch'oqowik, xeu'ijla pkich'ab'al aj Judío chi are i hebreo, xub'ij: