Hechos 19 - Wuj Pa K'ubultzij

Ma Pablo o pa Éfeso

¹ Tz'aqat i ma Apolos o pa tinimit Corinto, i ma Pablo xik'aw chwi taq jyub', xupon k'a pa tinimit Éfeso, chila xeuriq k'iyal winaq chi kekojon che i Dios.

² Xutz'onoj chke: —¿Xqaj i Lo'laj Utewal i Dios piwi yix are xixkojon che i Dios? Ike xkila' uwach che: —Yoj qeta'am teneri we o i Lo'laj Utewal i Dios, xecha.

³ Are uri ma Pablo xutz'onoj chke: —¿Wach taq uri uqajsaxik ya x-an piwi yix? Ike xkila' uwach: —Are uqajsaxik ya chi xuk'ut kan ma Wan Ajqajsanel Ya, xecha.

⁴ I ma Pablo xub'ij chke: Qatzij ile, i ma Wan xuqajsaj ya pkiwi ni'pa i xkitz'onoj kuyb'al mak che i Dios, xwiri, xub'ij chke chi kkikoj i Jun chi kk'un chrijil ire chi are i Jesús.

⁵ Are xkita ile, xqajsax ya pkiwi pub'i i Ajwal Jesús;

⁶ i ma Pablo are xuya u'ab' pkiwi, xaq xk'un i Lo'laj Utewal i Dios pkiwi, are uri xkijeq ch'awik pa k'ak' taq ch'ab'al xaq xkijeq ub'ixkil i tzij ni'pa kb'ix chke rumal i Dios.

⁷ Konojel ni'pa xqaj i Lo'laj Utewal i Dios pkiwi, je kab'lajuj achiyab'.

⁸ Oxib' ik' xuch'ij ma Pablo, chi arewi k-e pa ja re molb'al ib' ke i judío, ipa xutzijoj wi utzij i Dios chi lik xuxij ti rib' chub'ixkil, lik xlapan ku' i winaq xaq xuyu'uj kixikin chupam i ajawinik re i Dios.

⁹ Xwiri, je o jujun winaq chi lik je b'uy, xkaj ti xkikoj i Jesús, lik chkiwach i winaq xane xe'ok chuyo'yaxik i K'ak' B'e re i Jesús. Rumali i ma Pablo xel ku', xaq xeuk'am b'i i winaq chi xekojon che i Dios, xeuk'am b'i pa tijonb'al ib' re jun achi ma Tiranno ub'i. Chila xok wi chub'ixkil utzij i Dios ij ij chke i winaq.

¹⁰ Keje ile xu'an che i keb' junab'. Rumali chi konojel ni'pa i je o pa tinimit Asia, aj Judío xaq aj Grecia xkita utzij i Ajwal.

¹¹ Xaq i Dios xuya pu'ab' ma Pablo chi xu'an i nimaq taq il,

¹² lik k'iyal taq il xu'ano, i winaq olik kkik'am b'i k'ul o xaq we jun sut chi uyinom ma Pablo, ke'e kikojo chke iwab'ib', are uri lik juntir keutzir che kiyob'il xaq i itzel taq tew ke'el chke.

¹³ Xwiri o jujun aj Judío keb'in pa taq b'e re i tinimit chi relsaxik itzel taq tew chke i winaq. Ike xaq xkaj ukuxtaxik ub'i i Ajwal Jesús ru' i kki'ano le, rumali chi kkib'ij chke i itzel taq tew: “¡Pub'i i Jesús chi ktijin ma Pablo chub'ixkil, kinb'ij chiwe: Chixel chke i winaq.”

¹⁴ Keje ile kki'an i wuqub' uk'ojol jun achi aj Judío chi ma Esceva ub'i, chi xaq kaj-atzil i rajpatan i Dios.

¹⁵ Xwiri, xuriq jun ij chi i itzel tew xula' uwach chke: Yin weta'am uwach i Jesús xaq weta'am pachin i ma Pablo, xwiri yix ¿Ix pachinoq?

¹⁶ Are uri achi chi o itzel tew che, xuk'aq b'i rib' chkij, lik xtiki chupek'ik kicho'ab' konojel, lik xu'an k'ax chke, rumali chi konojel xe'anmajik, lik je ch'analik xe'el b'i chila ru' ja le.

¹⁷ Konojel i winaq chi je jeqel pa tinimit Éfeso, ni'pa i aj Judío xaq i je ne te aj Judío, konojel xketamaj ile xaq lik xkixij kib'. Rumal ronojel ni'pa ile, lik ktijin unimarik u'ij ub'i i Ajwal Jesús.

¹⁸ Xaq je k'i chke i winaq chi xekojon che i Dios, xe'upon chkiwach konojel i winaq chub'ixkil chke ronojel ni'pa i utz taj chi ki'anom ujer.

¹⁹ Xaq je k'i chke chi je aj-itz te'eq, xkik'am li kiwuj re i itz xaq xkiporoj chkiwach konojel i winaq, ni'pa i wuj le xe'eloq kolo jo'mo' waqchiy (50,000) saqpwaq rajil.

²⁰ Keje uri ile chi utzij i Dios ktijin upaxsaxik xaq uk'utik chi i Dios lik nim ucho'ab'.

²¹ Chrijil chik ni'pa ile, i ma Pablo xuch'ob'o chi k-e chkisolixik i aj Macedonia, xaq i ulew Acaya, te'uri k-e k'a Jerusalén. Xwi ta la ile, xaq xub'ij: Are in o chik Jerusalén, welik b'i chila kin-e k'a pa tinimit Roma, xcha.

²² Are uri xeutaq b'i keb' rachi'il chila pa Macedonia man kekito, je are a Timoteo xaq i ma Erasto, tz'aqat ire k'a xnajtin kan jub'i' pa Asia.

Ch'oqowik pa tinimit Éfeso

²³ Che taq i ij le, pa tinimit Éfeso, lik xpe jun nim laj ch'oqowik puwi i k'utunik re i K'ak' B'e.

²⁴ I xjeqaw ile are jun achi ma Demetrio ub'i chi ajch'ayol ch'ich' saqpwaq, i achi le ku'an i ral taq uk'exwach i rachoch ati tiox Diana xaq ni'pa kechakun ru' ire lik nim kkich'ak chrij.

²⁵ Are uri xumol kichi' i rachi'il junam ku' i jub'an chik chi laj xaqjun kichak, xaq xub'ij chke: “Winaq, yix iweta'am chi che i chaki oj k'asinaq wi,

²⁶ xwiri pacha iwilom yix xaq itom, i ma Pablo ktijin chub'ixkil chi ni'pa i tiox chi ki'anom i winaq ru' ki'ab', je dios taj; ru' ile je k'i chik i winaq je utunum chik chupam, xwi ti chi pa Éfeso xaq lik ya ktz'aqat ub'ixkil che ronojel ulew Asia.

²⁷ Ile lik xib'in ib' ru', man i qak'ay yoj k-ax ti chik, xwi ta la ile xaq i rachoch i nim laj ati tiox Diana kqaj u'ij, xaq kjeqan uri uyo'yaxik, i wo'or lik o ne u'ij kumal i winaq pa ronojel i tinimit Asia xaq chwach ronojel i jyub' ta'aj”. Xub'ij ma Demetrio.

²⁸ Are xkita ile, lik xmi' koywal xaq xesik'in chub'ixkil: ¡Lik nim u'ij ati tiox Diana ke i aj Éfeso! Xecha.

²⁹ I tzij le, xu'an chke i winaq chi xe'ok che i ch'oqowik che i ronojel i nim laj tinimit. Xekichap i ma Gayo xaq i ma Aristarco chi je rachi'il i ma Pablo, i keb' achiyab' le aj Macedonia, xekicharej b'i k'a chila ipa o wi i nim laj k'ijib'al ipa kelapan wi ku' i k'iyal taq winaq.

³⁰ I ma Pablo xraj te'eq okik chila man kraj klapan ku' i winaq, xwiri i winaq chi kekojon che i Dios xkiya ti che.

³¹ Xaq je o jujun ramiy ma Pablo chkixol i uwi ujolom i atb'al tzij re i tinimit Asia, ike le xaq xkitaq b'i ub'ixkil che chi utz taj kok b'i che i k'ijib'al le.

³² Tz'aqat pa moloj ib' le, je o jujun kesik'in chub'ixkil jalajuj taq tzij xaq keje i jub'an chik lik kesik'in chub'ixkil man konojel i winaq to' kech'oqowik, xaq laj konojel keta'am teneri wach taq rumal kimolom kib'.

³³ Xwiri jujun chke i aj Judío xkitakpuj b'i ma Alejandro chkiwach konojel i winaq xaq xkib'ij usuk' i moloj ib' le che. Are uri i ma Alejandro le xuk'ut chke ru' u'ab' chi mech'aw chik man klapan ku' i winaq tob'al ke aj Judío chkiwach i winaq.

³⁴ Xwiri, are xkinab'ej chi ire xaq aj Judío, konojel xe'ok che i sik', kolo keb' or xkich'ij chub'ixkil iri: “¡Nim u'ij i ati tiox Diana ke aj Éfeso!” Xecha.

³⁵ I ajtz'ib' re i tinimit are xtiki chki'atixik i winaq, xub'ij chke: Ix aj Éfeso; konojel i winaq re uwach i jyub' ta'aj lik keta'am chi chqaqul yoj o wi uchajixik rachoch i nim laj ati tiox Diana xaq i uk'exwach chi tzaqnaq li chikaj.

³⁶ Ile, mijun kub'ij we qatzij taj. Rumali, chixuxlanoq xaq chich'ob'o ub'e wach i ki'ano.

³⁷ Man i achiyab'i chi je ik'amom loq, nti jun yo'yanik ki'anom chrij i rachoch i qatiox xaq nti k'ax laj taq tzij kib'im chrij.

³⁸ We ma Demetrio xaq i jub'an chi kechakun ru' kkaj kkikoj umak jun winaq, are uchaki chi je o i atol tzij xaq o i atb'al tzij, chkich'ojij uri chke ike xaq chkijujunal chkito ni kib' uri.

³⁹ Xaq yix we kiwaj utz'onoxik jun chik b'iroxik, rajwaxik uri chi kiyijb'a pa jun nim laj moloj ib'.

⁴⁰ Ni'pa xk'ulmax wo'or le, lik xib'in ib', man moqxa kb'ix chqe chi xa oj ajch'oj chrij i atb'al tzij xaq we ktz'onox chqe b'uchak taq xqa'an ile, wach ula'ik uwach uri kqa'ano man lik nti rumal chi kojch'oqowik.

⁴¹ I ajtz'ib' are xutzin chub'ixkil ile, xeu'ijla b'i konojel i winaq.