GÉNESIS 39 - Wuj Pa K'ubultzij

A José xaq i rixoqil i ma Potifar

¹ Are xk'am b'i a José pa Egipto kumal i aj Ismael, ike le xkik'ayij che jun achi chi o upatan chrij ma faraón, i achi le ma Potifar ub'i, kaj-atzil i chajal.

² Xwiri i Ajwal o ru' a José, rumali ni'pa i ku'ano lik utz kel ru' are o chila chi rachoch i rajaw chi aj Egipto.

³ I ma Potifar xunab'ej chi Ajwal o ru' a José, man ronojel ni'pa i ku'ano, i Ajwal ku'an che chi kel utz ru'.

⁴ Rumali ma Potifar le xukub'a uk'ux che a José, rumali xuya pa aj-atzil puwi ronojel ni'pa o prachoch xaq ronojel ni'pa i o ru'.

⁵ Xuk'ulmaj are xya' kan a José le pa aj-atzil rumal ma Potifar puwi ronojel ub'itaq re chi o prachoch xaq ronojel ni'pa o pa taq es. Are uri i Ajwal xuya utzil chomal puwi ronojel ni'pa taq ile, i utzil chomal re i Ajwal xaq lik xqaj puwi ronojel ni'pa ub'itaq re ma Potifar.

⁶ Rumali ma Potifar le lik nti kub'isoj che ub'itaq re man ronojel xuya pu'ab' a José, ire lik ij ij xwi kb'ison che uwa'im. I a José le lik chom laj ala xaq lik b'irir uch'akul.

⁷ X-on panoq i rixoqil ma Potifar chi rajaw uchak lik qus xril a José, rumali xel uchi' che, xub'ij: —Kwaj yin kamin awib' wu' —xcha.

⁸ Xwiri a José lik xraj ti utayik che, rumali xub'ij che: —Chata pe', i wajaw is uya'om kan chinqul ronojel ni'pa ub'itaq re, rumali ire lik kul uk'ux chwe —xcha.

⁹ Che i ja ri lik nti jun chik nim u'ij chinwach yin; i wajaw is uya'om chwe ronojel, xwiri uya'om ti chwe we kinmin taq wib' awu', man yet lik at rixoqil i wajaw le ¿Wach usuk' uri ile chi kin-an taq jun utz taj che i wajaw xaq kinmakun taqi chwach i Dios? —Xcha a José.

¹⁰ Tupu ixoq le lik ij ij k-on pen che a José, xwiri ire le lik xuya ti uwach che chi kumin rib' ru' xaq lik xraj ti rachnimaxik xaipa x-e wi.

¹¹ Xuriq jun ij chi konojel ajchakib' chi kechakun chila ru' ja, je nti tan pa ja are xok b'i a José chu'anik uchak chi o chuqul.

¹² Are uri i rixoqil ma Potifar le xuchap che u'u' a José, xub'ij che: —Chamina awib' wu' —xcha. Xwiri a José pa'anem x-anmajik, lik xkanaj kan u'u' pu'ab' ixoq le.

¹³ I ixoq le are xrilo chi xkanaj kan u'u' a José pu'ab', rumal pa'anem x-anmajik,

¹⁴ xeusik' la ajchakib' chi kechakun chila ru' ja, xub'ij chke: —Chiwila pe', i achi aj Hebreo chi xukoj li wachijil pqachoch xa xoluqajsaj qa'ij, xok li wu' pa ja lik xraj xumin rib' wu', xwiri yin ko xinsik'inik.

¹⁵ Are xuta chi lik ko xinsik'inik, pa'anem xel b'i chisaq xuk'am ti chub'i u'u', xuya kan pintzal —xcha.

¹⁶ I ixoq le xuk'ol u'u' a José ru' k'a xupon ni rachijil ru' ja.

¹⁷ Are xupon i rachijil ru' ja xaq keje ub'ixkil xub'ij che pacha xub'ij chke ajchakib': —I mokom aj Hebreo chi xakoj li waral ru' ja lik xok wu' pa ja, lik xraj xumin rib' wu'.

¹⁸ Xwiri are ko xinsik'inik, pa'anem x-anmajik, xuk'am ti chub'i u'u', xuya kan chi —xcha.

¹⁹ I ma Potifar are xuta wach xu'an a José, chi xb'ix che rumal i rixoqil, are uri lik xpe roywal.

²⁰ Rumali xuchap a José, xutaq uminik prexil chila ipa je utz'apim wi jujun ajprex re i ajawinel, keje u'enam a José ile prexil.

²¹ Tupu xmin b'i a José prexil xwiri i Ajwal xro'taj taj xaq xumayij ti uk'utik i k'axnab'al uk'ux che, man xu'an che chi utz x-il rumal i chajal ke ajprexil.

²² Rumali xuya kan a José pa aj-atzil pkiwi i je tz'apil chila prexil, xaq puwi ronojel i taqanik, xaq jalajuj taq k-an chila.

²³ I Ajwal o ru' a José, rumali lik utz kel ronojel ni'pa i ku'ano, i atz laj chajal ke i ajprexil lik nti kuch'ob' chkisolixik ajprex man lik kul uk'ux che a José.