GÉNESIS 36 - Wuj Pa K'ubultzij

I je umuq uxikin mam Esaú

¹ Iri je are umuq uxikin mam Esaú chi xaq mam Edom kb'ix che.

² I mam Esaú xk'uli ku' ixoqib' aj Canaán: Ru' ati Ada chi umi'al mam Elón aj Het; ru' ati Aholibama, chi umi'al mam Aná chi xaq ri umam mam Zibeón aj Jiw;

³ xaq ru' ati Basemat chi umi'al ma Ismael, chi ranab' a Nebaiot.

⁴ I mam Esaú le xuk'uwalij rak'al ku' i rixoqil: Xuk'uwalij jun rak'al ru' ati Ada chi a Elifaz ub'i, xuk'uwalij jun rak'al ru' ati Basemat chi a Reuel ub'i;

⁵ xaq xuk'uwalij oxib' rak'al ru' ati Aholibama chi a Jeús, a Jaalam xaq i a Coré. Ike le je are rak'al mam Esaú chi xealax chila Canaán.

⁶ X-on panoq mam Esaú xeuk'am b'i rixoqil, je uk'ojol, je umi'al, konojel i winaq chi je o ru' chi rachoch, xeuk'am b'i jalajuj taq chikop xaq ronojel ub'itaq re chi xuch'ak chila Canaán x-e jeqi che jun chik tinimit jek'b'al rib' ru' ucha' chi ma Jacob,

⁷ man ike chekeb' lik k'i ub'itaq ke, rumali chi kumaj taj chi kek'iji junam rumali xkijach kiwach man i ulew ipa je o wi te'eq ke'on ti chik i es re kichikop.

⁸ Rumali mam Esaú chi xaq mam Edom kb'ix che, x-e jeqi che i jyub' Seir.

⁹ Iri je are umuq uxikin mam Esaú chi kiqajaw i aj Edom chi xejeqi che i jyub' Seir.

¹⁰ I kib'i i rak'al je are iri: A Elifaz chi ralab' ati Ada rixoqil mam Esaú; a Reuel chi ralab' ati Basemat chi xaq rixoqil mam Esaú.

¹¹ I rak'al ma Elifaz je are a Temán, a Omar, a Zefo, a Gatam xaq a Cenaz.

¹² Xaq i jun rak'al ru' qas ti mer rixoqil chi ati Timna a Amalec ub'i; ike le je ri umam ati Ada chi rixoqil mam Esaú.

¹³ I rak'al ma Reuel je are iri: A Nahat, a Zera, a Sama xaq i a Miza; ike le je are ri umam ati Basemat, chi rixoqil mam Esaú.

¹⁴ I rak'al mam Esaú ru' jun chik ixoq chi ati Aholibama chi umi'al ma Aná chi xaq ri umam ma Zibeón je are iri: A Jeús, a Jaalam xaq i a Coré.

¹⁵ Ike ri are je aj-atzil chkixol i je umuq uxikin mam Esaú: I je aj-atzil chke i rak'al ma Elifaz chi nab'e uk'ojol mam Esaú are: Ma Temán, ma Omar, ma Zefo, ma Cenaz,

¹⁶ ma Coré, ma Gatam xaq i ma Amalec; konojel ike le je are aj-atzil chke uk'ojol ma Elifaz chila che i ulew Edom, konojel ike le je ri umam ati Ada.

¹⁷ I je aj-atzil chke i rak'al ma Reuel chi uk'ojol mam Esaú are: A Nahat, a Zera, a Sama xaq i a Miza, konojel ike le je are aj-atzil chkixol uk'ojol ma Reuel chila che i ulew Edom, je ri umam ati Basemat chi rixoqil mam Esaú.

¹⁸ I je aj-atzil chke i rak'al ati Aholibama, chi rixoqil mam Esaú are: A Jeús, a Jaalam xaq i a Coré; i ati Aholibama le umi'al ma Aná.

¹⁹ Konojel ike le je umuq uxikin mam Esaú chi xaq ma Edom kb'ix che, je are ike le je aj-atzil chke kitzob'ajil.

²⁰ I jub'an chiki je are umuq uxikin ma Seir chi aj Hor, chi je jeqel chila che i ulew le: Ma Lotán, ma Sobal, ma Zibeón, ma Aná,

²¹ ma Disón, ma Ezer xaq ma Disán. Ike le je are uwi ujolom chke aj Hor, chila chwach ulew Edom, chi je rak'al ma Seir.

²² I rak'al ma Lotán je are iri: A Hori xaq i a Hemam. I ati Timna are ranab' ma Lotán.

²³ I rak'al ma Sobal je are iri: A Alván, a Manahat, a Ebal, a Sefo xaq i a Onam.

²⁴ I jub'an chiki je are rak'al ma Zibeón: A Aja xaq i a Aná. I a Aná le are xriqaw i ralaxb'al ya pa tz'inilik jyub' chaqij are keuyu'uj u'axna uqajaw, chi ma Zibeón.

²⁵ I ma Aná le xuk'uwalij jun uk'ojol chi a Disón ub'i xaq xuk'uwalij jun umi'al chi Aholibama ub'i.

²⁶ I rak'al ma Disón je are iri: A Hemdán, a Esbán, a Itrán xaq i a Querán.

²⁷ I rak'al ma Ezer je are iri: A Bilhán, a Zaaván xaq i Acán.

²⁸ I rak'al ma Disán je are iri: A Uz xaq i Arán.

²⁹ I jub'an chiki je are uwi ujolom chke aj Hor: Ma Lotán, ma Sobal, ma Zibeón, ma Aná,

³⁰ ma Disón, ma Ezer xaq i ma Disán. Je are uwi ujolom ike le ke i aj Hor pa taq kitzob'ajil chila che ulew Seir.

³¹ Are k'amaja kok jun chke i aj Israel pa ajawinik, i xe'ajawin pkiwi i winaq chila che ulew Edom je are iri:

³² Ma Bela chi uk'ojol mam Beor, are ire xrajawin pkiwi i winaq chila che ulew Edom, i ub'i utinimit Dinaba.

³³ Are xkam ma Bela xkanaj ma Jobab puk'exel, ire le are uk'ojol ma Zera aj pa tinimit Bosra.

³⁴ Are xkam ma Jobab, xkanaj ma Husam puk'exel chu'atik tzij, i ma Husam le aj Temán.

³⁵ Are xkam ma Husam, xkanaj ma Hadad puk'exel chu'atik tzij; ma Hadad le uk'ojol ma Bedad, chi xtiki chuch'akik ma Madián che i ch'oj chila che ulew Moab, ub'i utinimit le Avit.

³⁶ Are xkam ma Hadad, xkanaj ma Samla puk'exel chi aj Masreca.

³⁷ Are xkam ma Samla, xkanaj ma Saúl puk'exel chi aj Rehobot; i tinimit Rehobot le o chuchi' i raqana.

³⁸ Are xkam ma Saúl, xkanaj ma Baal-hanán puk'exel; ma Baal-hanán le uk'ojol mam Acbor.

³⁹ Are xkam ma Baal-hanán, chi uk'ojol ma Acbor, xkanaj ma Hadar puk'exel, ub'i i nim laj utinimit le Pau, xaq i rixoqil le ati Mehetabel ub'i, umi'al ma Matred ri umam ma Mezaab.

⁴⁰ Are kib'i konojel i je uwi ujolom chke i rak'al mam Esaú pa taq kalk'uwalil, pa taq kik'ijib'al xaq chrij taq kib'i: I ati Timna, ma Alva, ma Jetet,

⁴¹ ati Aholibama, ma Ela, ma Pinón,

⁴² ma Cenaz, ma Temán, ma Mibzar,

⁴³ ma Magdiel xaq i ma Iram. Ike le je are uwi ujolom chke i rak'al ma Edom, chrij taq kik'ijib'al ipa xejeqi wi chwach ulew. I ma Edom le are mam Esaú, chi kiqajaw konojel aj Edom.