GÉNESIS 35 - Wuj Pa K'ubultzij

I Dios xuya utzil chomal puwi ma Jacob pa Bet-el

¹ I Dios xub'ij che ma Jacob: “Chayijb'a awib', man kat-ejeqi pa Bet-el. Chk'un chak'ux chi Yin xink'ut wib' chawe chila pa Bet-el are xat-anmaj chwach awatz ma Esaú, rumali cha'ana jun sujb'al sipon chila we Yin.” Xcha.

² Are uri ma Jacob xub'ij chke i ralk'uwal xaq chke konojel ni'pa je o ru': —Chiwesaj b'i konojel i jalajuj taq tiox chi je ik'olom iwu', chijos-ij iwib' xaq chijalwachij i'u',

³ jo pa Bet-el, man kin-an jun sujb'al sipon chila re i Dios chi xinuto are in o te'eq chwach i kamik, man xaipa lik in rachnimam che inb'e —xcha.

⁴ Are u'ankil uri chi xkijach ronojel ni'pa i jalajuj taq tiox che ma Jacob xaq i arit chi o che kixikin, te'uri ma Jacob le x-e chumuqik chuxe' jun sik'al chi o naqaj che i Siquem.

⁵ Are xe'el ike chila, mijun chke i winaq xterej b'i chu'anik ch'oj chkij i rak'al ma Jacob, man i Dios xu'an chke i winaq chi je o chwach i tinimit le lik xkixij kib'.

⁶ Keje ruponik ma Jacob ile chila pa Luz chi xaq Bet-el ub'i, chi o chwach ulew Canaán, xaq konojel i winaq chi je o ru' lik junam xeuponik.

⁷ Are xeupon chila i ma Jacob xuyijb'a jun sujb'al sipon xaq xuya pub'i i k'ijib'al le, El-Bet-el. Man chila xuk'ut wi rib' i Dios che are x-anmaj chwach i ratz chi ma Esaú.

⁸ Che taq i ij le xkam ati Débora, chi k'itsawnaq tit Rebeca, xkimuq kan chila chuxe' i Sik'al chi o naqaj che i Bet-el, rumali ma Jacob xuya pub'i i k'ijib'al le: “Sik'al re o'ej.”

⁹ Are xtzalij b'i ma Jacob chila Padan-aram, I Dios xuk'ut chik rib' che xaq xuya utzil chomal puwi ru' i tziji:

¹⁰ “Yet ma Jacob ab'i, xwiri wo'or keje ti chik kb'ix ile chawe, wo'or ma Israel kb'ix ni chawe.” Lik are ub'i ile xya' che rumal i Dios.

¹¹ Are uri i Dios xub'ij chik che: “Yin in Dios chi lik ronojel kintiki che, chatk'uwalinoq xaq chek'iyar ni amuq axikin. Lik chawe yet kel ni jun nim laj tinimit xaq k'iyal taq tinimit, xaq chkixol i amuq axikin le ke'el ni k'iyal taq ajawinelab'.

¹² I ulew chi xinya che mam Abraham xaq che uk'ojol chi a Isaac, xaq kinya chawe yet, keje ile xaq kinya ni chke amuq axikin chawijil chik yet.”

¹³ Are xb'itaj ile rumal i Dios, are uri xel chila che i k'ijib'al le ipa xlapan wi ru' ma Jacob.

¹⁴ I ma Jacob xutik jun ab'aj, xutak'b'a uwach pacha jun aqan, chila che i k'ijib'al le ipa xlapan wi i Dios ru', te'uri xukitzka uwa'al uva muqb'am xaq xujam aceite puwi yab'al u'ij.

¹⁵ I ma Jacob xuya pub'i i k'ijib'al le ipa xlapan wi Dios ru', Bet-el.

Ukamik ati Raquel

¹⁶ Te'uri xe'el chik chila pa Bet-el, xe'e pa Efrata, are k'amaja keuponik xchaptaj ati Raquel pa b'e man ire rax winaq, chila xalax wi rak'al, lik k'ax utzirik xu'ano.

¹⁷ Are o chik chupam i k'ax i ati ilol ajtujab' xub'ij che: “Maxij awib', man xalax chik jun awalab'.”

¹⁸ Xwiri ire ktijin chik ukamik, lik xaqpachalo chik xuya kan pub'i i ralab' a Benoni, xwiri ma Jacob chi uqajaw i ak'al le xuya pub'i a Benjamín.

¹⁹ Keje ukamik ati Raquel ile, xmuq kan chila pa b'e chi k-e pa Efrata chi wo'or are i Belén.

²⁰ I ma Jacob xutik jun tak'tik ab'aj, chila puwi i etz rixoqil xutak'b'a uwach pacha jun aqan, i ab'aj le k'a o chila wo'or, ilb'al re ipa xmuq wi ati Raquel.

²¹ Te'uri ma Israel xumaj chub'i ub'e, xek'iji k'a jela chwach i Migdal-edar.

²² Are je o chik chila che i k'ijib'al le i ma Rubén xumin rib' ru' ati Bilha chi qas ti mer rixoqil uqajaw; i ma Israel are xretamaj lik xpe roywal. I ma Israel xeuk'uwalij kab'lajuj rak'al.

I je rak'al ma Jacob

²³ I nab'e rak'al ru' ati Lea are a Rubén, te'uri a Simeón, a Leví, a Judá, a Isacar xaq i a Zabulón.

²⁴ I rak'al ru' ati Raquel je are: A José xaq i a Benjamín.

²⁵ I rak'al ati Bilha, chi rajke'el ati Raquel je are: A Dan xaq i a Neftalí.

²⁶ I rak'al ru' ati Zilpa, chi rajke'el ati Lea je are: A Gad xaq a Aser. Iri je are rak'al ma Jacob chi xealax chila Padan-aram.

Ukamik mam Isaac

²⁷ I ma Jacob x-e chusolixik uqajaw chi mam Isaac chila Mamre, chila naqaj che i Quiriat-Arba, chi are Hebrón chi xaq ipa xjeqi wi mam Abraham junam ru' uk'ojol chi ma Isaac.

²⁸ I mam Isaac xk'asi b'elejwinaq (180) junab' te'uri xkamik.

²⁹ Ire lik rij chik rumali xkamik, x-e pa uxlanem ku' i ratit umam chi je kamnaq chik, xmuq kumal i keb' uk'ojol chi ma Esaú xaq i ma Jacob.