GÉNESIS 32 - Wuj Pa K'ubultzij

Uriqik kib' ma Jacob ru' ma Esaú

¹ I ma Jacob xumaj chub'i ub'e, are uri xek'un jub'an ángel re i Dios chuk'ulaxik.

² Are xerilo, xsik'in chub'ixkil i tziji: “¡Ike le je ajch'oj re i Dios!” Rumali xuya pub'i i k'ijib'al le Mahanaim.

³ Are uri ma Jacob xeunab'saj b'i jub'an ajb'il utzij che i ratz chila che ulew Seir, ukwenta ulew chi Edom, re kkiya utzijol chi ire ktijin ruponik

⁴ Are xeutaq b'ik, xub'ij i tziji chke chi kkib'ij pan che i ratz: “Nim laj winaq ma Esaú, i acha' chi ma Jacob oj utaqom li chub'ixkil chawe, chi ire jeqinaq chi rachoch ma Labán ronojel ni'pa i junab' chi petnaqi;

⁵ ire je o uchikop, u'axna, uchij, uchab'at, umokom xaq i rajke'el; rumali xutaq li ub'ixkil i tziji chawe riqb'al re rutzil ak'ux”. Xcha.

⁶ Are xek'un i ajb'il tzij, xkib'ij che ma Jacob: —Yoj ya xojupon chub'ixkil i tzij che i awatz chi xojataq b'i che, wo'or ire xpe chak'ulaxik je rachi'ilam li jumo' (400) achiyab'.

⁷ Are uri ma Jacob lik xuxij rib', xaq lik xb'isonik; rumali xujach kiwach i winaq chi je o ru', xaq keje xu'an chke i chikop, chij xaq i kamey, xu'an keb' tzob'aj chke,

⁸ man xuch'ob'o: “We xpe ma Esaú chrij i jutzob'aj xaq we xeukamsaj, i jutzob'aj chik ke'anmaj na.” Xcha.

⁹ Are uri ma Jacob xok che i lapanik ru' i Dios: “Wajwal chi at u-Dios i etz inmam mam Abraham, chi xaq at u-Dios inqajaw mam Isaac, chi xab'ij chwe chi kintzalij chik che i wulew xaq ku' i wachalal, xaq xab'ij chi kin-el ni utz ru',

¹⁰ saq laj tzij yin chi in awajchak kmajaw ti rutzil ak'ux chwe, xaq mitene atzij chi lik saqil chi aya'om chinqul are xin-axuj i raqana Jordán lik xwi inch'amiy wok'am, xwiri wo'or je keb' tzob'aj chik winaq je o wu'.

¹¹ Wajwal chinawesaj pu'ab' i watz ma Esaú, man yin lik kinxij wib'; moqxa chinkamsaxik petnaq wi keukamsaj uri wixoqil xaq i wak'al.

¹² Man yet ab'im chwe chi kin-el ni chisaq, xaq ka'an ni chke inmuq inxikin pacha uk'iyal i seneb' chuchi' i mar, chi mijun ktiki chrajlaxik.” Xcha.

¹³ Che i a'ab' le ma Jacob xwar chila Mahanaim, xaq xuch'ob' uya'ik jun sipon che i ratz chi ma Esaú, rumali xu'ul ni'pa i chomiq che ronojel ub'itaq re:

¹⁴ Lajujwinaq (200) atitab' chab'at, juwinaq mama'ib' chab'at, lajujwinaq (200) atitab' chij xaq juwinaq mama'ib' chij,

¹⁵ lajuj juwinaq (30) atitab' kamey chi o kak'al ch'utiq, kawinaq (40) b'akib' xaq lajuj torib', juwinaq atitab' axna xaq lajuj mama'ib' axna.

¹⁶ Te'uri xuya pki'ab' umokom tzob'aj pa taq tzob'aj xki'an chke chrij kichikopil, are uri xub'ij chke: —Chixnab'ej b'ik xwiri chiya kixol i chikop pa taq kitzob'ajil.

¹⁷ I jun chi xunab'saj b'i nab'e xub'ij b'i che: —Are kak'ulaj i watz chi ma Esaú, keje iri kab'ij ni che are kutz'onoj chawe: “¿Pachin ru' katchakun wi yet? ¿Ipa kat-e wi? ¿Xaq pachin rajaw i chikop chi je awok'am le?”

¹⁸ Keje iri kab'ij ni che: “I kajaw i chikopi are awajchak ma Jacob chi rajaw inchak yin, iri are jun sipon chi xutaq li chawe, nim laj winaq, xu'ul li ma Jacob chkixol uchikop; xaq ire teren li chqij yoj.” Kixcha che.

¹⁹ I ma Jacob xaq keje ile xub'ij b'i che ukab' chi xk'amaw b'i jalajuj taq tzob'aj chikop xaq keje xub'ij chke i jub'an chi xeterej b'i chkij i chikop. Xaq yix are kik'ulaj i watz chi ma Esaú keje ile chib'ij che.

²⁰ I awajchak chi ma Jacob teren li chqij yoj chixcha che, xub'ij ma Jacob chke umokom. Man ma Jacob xuch'ob'o: “Ru' i sipon chi kinnab'saj b'ik kinqajsaj ni roywal i watz; lik qajnaq chik roywal are kinupon pan yin ru', keje ile moqxa utz ink'ulaxik ku'ano.” Xcha.

²¹ Keje unab'saxik b'i sipon ile xu'an ma Jacob, xwiri ire xwar kan chila che a'ab' le.

Uchapik kib' ma Jacob pa cho'ab' ru' jun ángel

²² Xaq che a'ab' le xwalij ma Jacob, xeuk'am i keb' rixoqil, keb' rajke'el xaq i julajuj rak'al, xeu'atsaj che i raqana Jaboc, chila ipa xax wi uwach i ya.

²³ Te'uri xu'atsaj ronojel ub'itaq ke.

²⁴ Utukel chik ire xkanaj kanoq, are uri o jun achi xkimaj kib' ru' pa cho'ab' k'a xesaqirsanik.

²⁵ Are xuna i achi chi kuch'ij ti ucho'ab' ma Jacob, xuch'ay chwi ra' ipa utiqom wi rib' ub'aqil, are uri xel ub'aqil i ra' le puk'ijib'al are k'a kichapom kib' pa cho'ab'.

²⁶ I achi xub'ij che: —Chinawo'taj, man ktijin chik usaqirik. I ma Jacob xub'ij che: —Katwo'taj taj we kaya ti utzil chomal pinwi —xcha.

²⁷ Are uri i achi le xutz'onoj che: —¿Wach ab'i? Ire xub'ij: —Yin in ma Jacob.

²⁸ Are uri i achi le xub'ij che: —Kb'ix ti chik ma Jacob chawe, wo'or ma Israel kb'ix ni chawe, man xapaj awib' pa cho'ab' ru' i Dios xaq ku' i winaq, xwiri yet xatch'akanik —xcha.

²⁹ Are uri ma Jacob xaq xutz'onoj che: —Wach ab'i yet. Are uri i achi le xub'ij che: —¿Wach uchak chawe yet katz'onoj inb'i yin? Are uri i achi le xuya utzil chomal puwi chila che i k'ijib'al le.

³⁰ I ma Jacob xuya pub'i i k'ijib'al le Peniel, man xub'ij: “Lik saqil xwil uwach i Dios, xwiri xtotaj ink'aslemal.” Xcha.

³¹ I ma Jacob ktijin rik'awik che i k'ijib'al le chi Peniel ub'i are xel li ij. Xwiri lik kjetz'pin rumal ub'aqil i ra' chi xel puk'ijib'al.

³² Rumali i je aj Israel kkitij ti ib'och' chi chapawnaq i b'aq re uwi ka' i jalajuj taq chikop, man chila xch'ay wi ma Jacob che uwi ra'.