GÉNESIS 22 - Wuj Pa K'ubultzij

I Dios xuk'am upam ukub'ib'al uk'ux mam Abraham

¹ X-on panoq i Dios xuk'am upam mam Abraham, xub'ij che: Mam Abraham, i mam Abraham le xub'ij: —In o chi, Ta.

² I Dios xub'ij che: —Chak'ama b'i ak'ojol chi xa jun, chi xaq lik k'ax kana'o, jat chila che ulew Moriah, chila chaporoj wi pa re asipon puwi jun jyub' chi kinb'ij ni chawe.

³ I mam Abraham lik we' xwalijik, xuwiq b'i u'axna, xaq xumut b'i si' re porb'al sipon. Xeuk'am b'i keb' chke umokom ru' xaq i uk'ojol chi a Isaac, xe'e che i k'ijib'al ipa b'ital wi che rumal i Dios.

⁴ Churox ij mam Abraham xtzun b'i naj, are uri xril pan uwach i jyub' chinaj.

⁵ Xub'ij chke umokom: —Chixkanaj kan yix waral ru' i axna. Yin ru' i ala le, koj-e k'a jela chukojik u'ij i Dios, te'uri kojtzalij chali iwu' —xcha.

⁶ I mam Abraham xuk'am i si' xuya an chel rij uk'ojol chi a Isaac, ire xuk'am b'i a' xaq i kuchil, chekeb' xkimaj b'i kib'e junam.

⁷ I a Isaac xub'ij che uqajaw: —¡Ta! —¿Wach, kawaj wak'al? —Xub'ij mam Abraham che uk'ojol; are uri a Isaac le xub'ij che uqajaw: —O chik i a' xaq o chik i si', xwiri ¿Ipa o wi i chij ma chi kqaporoj chwach i Dios?

⁸ —Are uri mam Abraham xub'ij che uk'ojol: Wak'al, are i Dios kyaw i chij chi kqaporoj chwach Ire. Lik junam ru' rak'al ketijin che i b'e.

⁹ Are xeupon che i jyub' ipa b'ital wi che rumal i Dios, i mam Abraham xuyijb'a jun sujb'al sipon xaq xutus i si' puwi, te'uri xuyut' uk'ojol chi a Isaac, xaq xuya an puwi i si' chi o chik puwi i sujb'al sipon le.

¹⁰ Are uri xuk'am pan i kuchil kukamsab'ej re uk'ojol.

¹¹ Are ya kukamsaj te'eq uk'ojol chi a Isaac are uri jun ángel xsik'in li che chikaj, xub'ij: —¡Mam Abraham, mam Abraham! —In o chi, Ta —xub'ij mam Abraham.

¹² I ángel xub'ij che: —Makamsaj i ala le xaq ma'an taq jun k'ax che, man wo'or weta'am chik chi lik kaxij awib' chwach Dios, man xaxuyaj ti ak'ojol che chi xa jun o awu' —xcha.

¹³ Are uri mam Abraham xaqte'et xril pan jun chij ma, ch'apal pa taq k'ix rumal i rok'a', juntir x-e chuk'amik, xukamsaj xaq xuporoj puk'exel uk'ojol.

¹⁴ Rumali mam Abraham xuya pub'i i k'ijib'al le: “DIOS KYAWIK”, xaq k'a are kb'ix che “wo'or chi puwi i jyub' i Ajwal kuya'o wach i rajwaxik”.

¹⁵ I ángel xch'aw chali che mam Abraham, xub'ij che:

¹⁶ I Ajwal kub'ij: —Man xaxuyaj ti ak'ojol chwe chi xa jun o awu', rumali kinya intzij chawe,

¹⁷ lik kinya ni utzil chomal pawi xaq lik keink'iyarsaj ni amuq axikin pacha uk'iyal i ch'umil chi o chwa taq kaj xaq pacha uk'iyal i seneb' chi o chi taq ya. Xaq i amuq axikin lik kekich'ak ni i je ajch'oj chkij.

¹⁸ Kinya ni utzil chomal pkiwi konojel i winaq chwach i jyub' ta'aj kumal amuq axikin, man xatkojon chwe —keje ile xub'ij i Dios che mam Abraham.

¹⁹ Te'uri xtzalij li mam Abraham junam ru' uk'ojol chi a Isaac; are xek'un ku' umokom ipa je o wi kanoq, xeuk'am b'ik junam xe'e pa Beerseba, chila ipa xejeqi wi mam Abraham.

I je rak'al ma Nacor

²⁰ X-on panoq i mam Abraham xretamaj chi je alaxnaq chik rak'al ma Nacor ru' ati Milca. I ma Nacor le are ucha' mam Abraham.

²¹ I nab'e kak'al are a Uz te'uri a Buz, a Kemuel, chi uqajaw a Aram;

²² a Quesed, a Hazo, a Pildas, a Jidlaf xaq i a Betuel.

²³ I ma Betuel le are uqajaw al Rebeca. I wajxaqib' alk'uwalxelab' le je are kak'al ma Nacor ru' ati Milca.

²⁴ I ma Nacor le xaq xealax rak'al ru' ati Reúma chi qas ti rixoqil; i kak'al le je are iri: A Teba, a Gaham, a Tahas xaq a Maaca.