GÉNESIS 21 - Wuj Pa K'ubultzij

Ralaxik a Isaac

¹ I Ajwal xuk'ut i k'axnab'al uk'ux che tit Sara, rumali xuya che pacha i xusujuj.

² Rumali xk'aqtaj tit Sara, xalax jun rak'al re i rachijil chi mam Abraham. Lik purijal chik xalax i kak'al le, lik xalax che i ij chi ub'im i Dios che mam Abraham.

³ I rak'al mam Abraham chi xalax ru' tit Sara, xuya pub'i, a Isaac.

⁴ Are xel wajxaqib' ij ralaxik a Isaac, are uri mam Abraham xu'an i circuncisión che, chrij pacha taqtal che rumal i Dios.

⁵ I mam Abraham o chik jo'winaq (100) junab' che are xalax uk'ojol chi a Isaac.

⁶ I tit Sara xub'ij: “I Dios xu'an chwe chi xintzenik, xaq xapachin kuta utzijol chi xinalanik, ktzen ni uri wu'.

⁷ I mam Abraham lik xik'aw ti ile pujolom chi kril ni uwach jun rak'al wu', xwiri wo'or xinya jun rak'al purijal.” Xcha tit Sara.

Kelsaxik b'i ati Agar xaq a Ismael prachoch mam Abraham

⁸ I a Isaac nim chik are xmaj i tz'um che, lik che i ij are xmaj i tz'um che, i mam Abraham xu'an jun nim laj nima'ij.

⁹ I tit Sara are xunab'ej chi ralab' ati Agar ru' mam Abraham, kuyo'ya ralab' ire,

¹⁰ xub'ij che mam Abraham: “Chawesaj b'i ajke'el le junam ru' i ralab', man i ralab' ajke'el le lik kel ti ub'itaq re ru' i walab' yin chi a Isaac.” Xcha.

¹¹ I mam Abraham are xuta i tzij le lik xk'achir rumal, man a Ismael le xaq uk'ojol ire.

¹² Rumali xub'ij i Dios che mam Abraham: “Matk'achir rumal i ala le xaq mita rumal awajke'el. Cha'ana ronojel ni'pa kub'ij awixoqil chawe chi tit Sara man rumal a Isaac chi ak'ojol kepe ni amuq axikin.

¹³ Xaq i ralab' i ajke'el le kin-an ni chke i rak'al chi ke'on jun nim laj tinimit, man ire le xaq lik awak'al yet.”

¹⁴ Chukab' ij i mam Abraham lik we' xwalijik, xuk'am i lejom wa re trigo, xaq xuk'am jun tz'um chi o ya chupam, xuya che ati Agar. Xuya an xol uteleb' xaq xuya b'i ralab' che, are uri xutaq b'ik. Are u'ankil uri chi xel b'i ati Agar, to' x-e b'i pa taq tz'inilik jyub' chaqij chila Beerseba.

¹⁵ Are xk'is i ya chupam i tz'um, xumin kan ral ralab' le chuxe' jun ch'ixch'ik che'.

¹⁶ Are uri x-ekub'i pan chinaj che i ak'al, man xub'ij puk'ux: Kwaj taj kwilo are kkam wak'al. Xwiri are xkub'i pan chinaj, i ala le ko xsik'in che o'ej.

¹⁷ I Dios are xuta chi kjek'jat i ak'al che o'ej, are uri i ángel re i Dios xch'aw li chikaj che ati Agar, xub'ij che: “¿Wach xak'ulmaj ati Agar? Maxij awib', man i Dios xuta chi ak'al le lik kjek'jat che o'ej chila ipa aya'om wi kanoq.

¹⁸ Chatwalijoq, jak'ama i ak'al le, maya che chi ktzaq pulew, man Yin kin-an na chi ke'on ni jun nim laj tinimit amuq axikin ru' ire le.”

¹⁹ Are uri i Dios xu'an che ati Agar chi xril pan jun k'otom o ya chupam. Rumali x-e chunojsaxik i tz'um che i ya, te'uri xuya uya' i ralab'.

²⁰ I ala le chila xjeqi wi xaq chila xk'iy wi pa tz'inilik jyub' chaqij, man i Dios xrok'aj xaq xe'eloq chi lik sik'aj u'ab' che i k'aqanik ru' ch'ab'.

²¹ I tz'inilik jyub' chaqij le ipa xjeqi wi are Parán; i ati Agar xuk'ulb'a i ralab' le ru' jun ixoq aj Egipto.

I Mam Abraham xaq ma Abimelec kki'an jun trat

²² Che taq i ij le i ma Abimelec junam ru' ma Ficol, chi are aj-atzil ke i achiyab' chi je yij che i ch'oj, xe'elapan ru' mam Abraham, xkib'ij che: —I Dios o awu' che ronojel ni'pa taq ka'ano.

²³ Wo'or lik chab'ij chwe waral pub'i i Dios, chi ka'an ti jun utz taj chwe, mita chke wak'al, mita chke inmuq inxikin, man pacha i rutzil ink'ux yin chi xin-an chawe yet xaq keje cha'ana ni yet ile chwe yin, xaq keje cha'ana chke konojel i winaq ipa at o wi wo'or.

²⁴ I mam Abraham xub'ij: —Lik kinb'ij pub'i i Dios chi lik mijun utz taj kin-an chawe.

²⁵ Xwiri mam Abraham xukoj uch'ojil che ma Abimelec, chi i je umokom ma Abimelec xkimaj jun k'otom che mam Abraham.

²⁶ Are uri xub'ij ma Abimelec: —Yin lik intom ti ile, k'ate ne wo'or xinta, xaq yet xab'ij ti chwe. Yin lik weta'am taj pachin x-anaw ile,

²⁷ Are uri mam Abraham xeuk'am i chij xaq i b'akib' xuya che ma Abimelec, lik chekeb' xki'an jun trat.

²⁸ Te'uri mam Abraham xuya wuqub' atitab' chij junla,

²⁹ rumali ma Abimelec xutz'onoj che mam Abraham: —¿Wach usuk' i wuqub' atitab' chij le chi je aya'om junla?

³⁰ I mam Abraham xub'ij che: —Cheak'ama i wuqub' atitab' chij le, ilb'al re chi yin in-anom i k'otom le —xcha.

³¹ Rumali xkiya pub'i i k'ijib'al le Beerseba, man chila xkib'ij wi chi lik xwi i utz kki'an chkiwach; keje i trat ile xki'an chila Beerseba.

³² Te'uri ma Abimelec chi ajawinel re i tinimit Gerar xaq ma Ficol chi kaj-atzil i achiyab' chi je yij che i ch'oj xetzalij chik pkulew.

³³ I mam Abraham xutik jun che' Tamarisco chila pa Beerseba xaq chila xukuxtaj xunataj wi ub'i i Ajwal, chi are i Dios ronojel ij saq.

³⁴ Lik k'iyal ij xk'iji mam Abraham chila che kulew i aj Filistea.