GÉNESIS 12 - Wuj Pa K'ubultzij

I Dios kusik'ij ma Abram

¹ Jun ij, i Ajwal xub'ij che ma Abram: “Chawo'taj kan awulew, awachalal, xaq i kachoch aqajaw achuch, man kat-e che ulew chi kink'ut ni Yin chawe.

² Kin-an ni jun nim laj tinimit chke amuq axikin, kinya ni utzil chomal pawi; i ab'i xaipa na kkuxtax wi, xaq at utzil chomal na chke jub'an chik winaq.

³ Kinya ni utzil chomal pkiwi i winaq chi kkitz'onoj utzil chomal pawi, xaq keink'oqoj ni jub'an chi kkitz'onoj i k'oqb'al pawi; xaq awumal yet kinya ni utzil chomal pkiwi konojel i alk'uwal chwach i jyub' ta'aj.”

⁴ X-e uri ma Abram chrij pacha xb'ix che rumal i Ajwal xaq x-e ma Lot ru' chi rika'; ma Abram le o jo'lajuj oxwinaq (75) junab' che are xel chila pa Harán.

⁵ Ma Abram xuk'am b'i rixoqil ru', chi ati Sarai, xaq i rika' chi ma Lot, xaq ronojel ub'itaq ke chi kich'akom, xaq i winaq chi kich'akom chila pa Harán, junam xe'el chila che ulew Harán le xaq junam xeupon k'a che ulew Canaán,

⁶ i mam Abram xeik'aw chupam ronojel ulew Canaán xeupon k'a che ulew Siquem, chila ipa o wi i sik'al More. Che taq i ij le je are aj Canaán je o chwach ulew le.

⁷ I Ajwal chila xuk'ut wi rib' che ma Abram xaq xub'ij che: “Chke amuq axikin kinya wi ulewi.” Are uri ma Abram xuyijb'a jun sujb'al sipon chila, re kojb'al u'ij i Ajwal man chila xuk'ut wi rib' che.

⁸ Relik chila x-e chik chijyub' prelb'al ij che ulew Bet-el, are xuponik xuyijb'a umujb'al chila; i Bet-el le xkanaj puqajb'al ij che, xaq i ulew Hai xkanaj prelb'al ij che, xaq xuyijb'a chik jun sujb'al sipon chila re i Ajwal; xaq xukuxtaj xunataj ub'i i Ajwal.

⁹ Te'uri xel ma Abram chila, kok'ilal xupon k'a pa Neguev.

Ma Abram pa Egipto

¹⁰ Che taq i ij le xpe jun nim laj wa'jal chila ipa jeqel wi te'eq ma Abram; rumali x-e jeqi pa Egipto.

¹¹ Are okik chik ke pa Egipto, xub'ij che i rixoqil chi ati Sarai: “Yin weta'am chi lik at chom laj ixoq;

¹² saq laj tzij are katkil achiyab' aj Egipto, kkib'ij na: I ixoq le rixoqil i achi le; kecha na. Rumal ile kinkikamsaj na, xwiri yet katkik'asb'a.

¹³ Rumali kab'ij ni chke chi at wanab', keje ile kinkikamsaj taj xaq lik utz inwach uri kin-ek, man yet kinato.”

¹⁴ Are xeupon pa Egipto, i achiyab' chi je aj chila xkilo chi ati Sarai lik chom laj ixoq.

¹⁵ Xaq x-iltaj uwach kumal i je uwi ujolom re ma faraón, are uri ike le xe'e la chub'ixkil che chi ati Sarai lik chom laj ixoq, rumali xk'am b'i ati Sarai pa nim laj ja re i ajawinel ma faraón.

¹⁶ Rumali lik utz rilik ma Abram x-anik man xsipax uchij, uchikop, u'axna, ukamey xaq i winaq chi je o pa k'ax.

¹⁷ Xwiri i Ajwal xuk'ajsaj uwach ma faraón ru' nimaq taq yob'il, rumal ati Sarai chi rixoqil ma Abram, xaq keje xu'an chke ni'pa je o prachoch.

¹⁸ Are uri ma faraón xutaq usik'ixik ma Abram, xutz'onoj che: “¿B'uchak xinat'oro? ¿B'uchak xab'ij ti chwe we awixoqil?

¹⁹ ¿B'uchak xab'ij chwe chi xa awanab'? Rumali, yin laj xin-an te wixoqil che. Wo'or chak'ama b'i awixoqil i jat.”

²⁰ Are uri ma faraón xeutaq uwinaq che chi kekito ma Abram ru' rixoqil chrelsaxik b'i ub'itaq ke.