Ezequiel 39 - Wuj Pa K'ubultzij

Uch'akik i ma Gog

¹ Yet, winaq, chatch'aw pinb'i chrij i ma Gog, xaq chab'ij che: Iri are kub'ij i Ajwal: Ma Gog chi aj-atzil re i Mesec xaq i Tubal, Yin kinsaqij chawe chi in ajch'oj chawij.

² Kin-an chawe chi kattzalij chaloq; kok'il katwesaj li che i naj laj k'ijib'al che i moxab' xaq katink'am li chwi taq jyub' re Israel.

³ Te'uri kinpatz' ni k'aqb'al ch'ab' chi awok'am pa'ab' moxim xaq kin-an na chi ketzaq li ch'ab' chi awok'am pa'ab' wiqab'im.

⁴ Yet, ku' i awinaq chi je yij che i ch'oj xaq i tinimit chi je awachi'ilam, kixkam ni chwi taq jyub' re Israel. Chila kixinjach wi chke k'iyal taq tz'ikin chi ajtijol ti' xaq chke itzel taq chikop aj pa taq es, man keje ile kixkitij b'ik.

⁵ Kixjab'i ni kan chwach taq ulew. Yin in Ajwal, xinb'ij. Yin inya'om intzij.

⁶ Kintaq nu b'i a' puwi i Magog xaq pkiwi ni'pa i utz kkina pkik'aslemal chi je jeqel chi taq mar. Are uri kketamaj na chi Yin in Ajwal.

⁷ Yin kin-an na chi lo'laj inb'i k-etamax uwach rumal intinimit Israel, xaq kinya ti chik chi kqajsax u'ij. I nimaq taq tinimit aj naj kketamaj na chi Yin in Ajwal, kink'ut ni i lo'laj inch'amil pa tinimit Israel.

⁸ I ij chi kinb'ij le lik keuriqa na. Yin in Ajwal, kinb'ij.

⁹ I winaq re i tinimit Israel ke'el na loq xaq kkinak' a' che i kich'ojb'al, jalajuj taq uk'iyal uwach ch'ich' re tob'al ib', k'aqb'al ch'ab', ch'ab', che' ch'ich' utzam xaq lik k'i ni kisi' olik chi kuch'ij wuqub' junab' chi kkinuk' ki'a' che.

¹⁰ Nti chik uchak ke'e chutzukuxik kisi' pa taq es, xaq kkik'atzij ti chik pa taq k'achelaj, man ronojel taq kich'ojb'al le kajwax ni chke re si'. Keje ile ike kkesaj na li ub'itaq ke i jub'an chi xkesaj li ub'itaq ke ike nab'e, xaq kekesaj nu b'i jub'an chi xekesaj b'i ike nab'e. Yin in Ajwal, xinb'ij.

Umuqb'al i ma Gog

¹¹ Che taq i ij le kinya ni che i ma Gog jun k'ijib'al pa tinimit Israel, chwa Ta'aj chila ipa ke'ik'aw wi Ajb'iaj, chwach i mar, man keje ile kmuqik. I k'ijib'al le ku'atij ni ik'awb'al, chila na kmuq wi i ma Gog xaq konojel uwinaq chi je yij che i ch'oj, xaq kkiya ni pub'i, Uwa Ta'aj ke i winaq chi je yij che i ch'oj re ma Gog.

¹² I aj Israel kajwax ni wuqub' ik' chke re muqb'al ke xaq re kkijos-ij kan i tinimit.

¹³ Konojel i winaq latz' ni kiwach chkimuqik, lik are ni jun yab'al ki'ij ike. Che i ij le Yin kink'ut ni wib' ru' inchomal. Yin in Ajwal kinb'ij.

¹⁴ Xwi ta la ile, chrijil chik wuqub' ik' le, kya'ix ni chkiqul jutzob'aj winaq chi kemalkat chupam xaq kkilo wach o chupam i tinimit le, xaq chkimuqu konojel i je kanajnaq kan chwach ulew, re kki'an kan ch'am che.

¹⁵ Jun chke i winaqi, are kmalkat chupam i tinimit kril jun ub'aqil winaq, kukoj ni jun retalil chuk'ulel, k'a keupon ni ajmuqunel re kkimuq chwa Ta'aj ke i achiyab' chi je yij che ch'oj re i ma Gog.

¹⁶ (Xaq o jun tinimit ub'i Achiyab' chi je Yij che i ch'oj.) Keje ile kkijos-ij kan i tinimit.

¹⁷ I Ajwal xub'ij chwe: Chab'ij chke konojel i tz'ikin xaq chke konojel itzel taq chikop, chi chkimolo kib' chrij chwach xaq chepet tzam taq jyub' re Israel, che sujb'al chi kin-an chila ke ike. Utz na kkitij ni ti' xaq kkitu' ni kik' le;

¹⁸ kkitij ni kiti'lal i achiyab' chi je yij che i ch'oj xaq kkitu' ni kikik'el i je aj-atol tzij re i uwach jyub' ta'aj, pacha taq kikik'el mama'ib' chij, ral taq chij, me', o we xaq ti'ojib' taq torib' re i jyub' Basán.

¹⁹ Che i sujunik chi kin-an chke ike, kkitij ni xepu chi lik k'a keu'on ni iwab' rumal, xaq kkitu' ni i kik' chi lik k'a ke'ab'ar ni rumal.

²⁰ Kinyijb'a ni jun chom laj wa'im chke, ru' ti' ke i kaway, xaq ti' ke i winaq chi ke'an rij kaway, xaq ke i achiyab' chi je yij che i ch'oj, xaq kiti'lal i jalajuj taq ajch'oj, re kkitijo k'a kenoj ni che. Yin in Ajwal, xinb'ij.

Uyakik tan chik i tinimit Israel

²¹ Keje ile kink'ut ni in-ij inchomal chke i nimaq taq tinimit je aj naj. Konojel nimaq taq tinimit kkil na chi in atom tzij pkiwi xaq inya'om utojb'alil chke.

²² Che i ij le arewi x-ek, i tinimit Israel kretamaj na chi Yin in Ajwal ki-Dios.

²³ I tinimit aj naj, kketamaj na chi i winaq aj Israel xe'elsax b'i pa cho'ab' chwach kulew rumal kimak, man xekojon ti chwe; rumali Yin xwaj ti xeinto, xaq xinya'o chi je ajch'oj chkij xekich'ak na xaq xekamsax konojel pa ch'oj.

²⁴ Yin xin-an na pacha i kmajaw chke rumal ne te je ch'am xaq lik je qelqel, rumali xwaj ti xeinto.

²⁵ Rumali, Yin in Ajwal, kinb'ij: Wo'or kwil ni tob'al uwach ronojel i tinimit Israel, ni'pa i je umuq uxikin i ma Jacob. Kin-an chke chi kjaltaj ni kik'aslemal, man keje ile lik keintaq chu'anik chi kya' u'ij i lo'laj inb'i.

^26-27 Yin kinmol tan chik kichi' are kech'ojin i nimaq taq tinimit chi je aj naj xaq i jub'an chik tinimit chi ajch'oj chkij; te'uri utz na kejeqi pkik'aslemal pkulew, lik nti kexib'iwik. Keje ile kink'ut ni i lo'laj inch'amil, xaq je k'i nimaq taq tinimit kkil na. I aj Israel kkich'ij ni uqajsaxik ki'ij rumal xekojon ti chwe.

²⁸ Yin xewesaj b'i pa cho'ab' chwach i kulew xaq xeintaq b'i chkixol i nimaq taq tinimit aj naj, Yin kinmol tan chik kichi' pkulew. Mijun we kink'am ta loq. Are uri kketamaj na chi Yin in are i Ajwal ki-Dios.

²⁹ Kinya ti chik uchel wij chke, man lik inya'om li incho'ab' puwi i tinimit Israel. Yin in Ajwal, xinb'ij.