Ezequiel 34 - Wuj Pa K'ubultzij

Tzijonik re i Ajwal chkij i je ajyu'ul chij, re i tinimit Israel

¹ I Ajwal xlapan wu', i xub'ij chwe:

² Yet, winaq, chatlapan pinb'i chkij i ajyu'ul chij re i tinimit Israel, chab'ij chke: Iri are kub'ij i Ajwal: ¡Lik to' kiwach i ajyu'ul chij re i tinimit Israel, chi xa are ike kkichajij kib'! Are i o uchak chi kkichajij i ajyu'ul, are i jutzob'aj chij.

³ Yix kitu' i leche, ki'an i'u' che i kismal i chij le, xaq lik kikamsaj i chij chi lik je ti'oj, xwiri keichajij taj.

⁴ Yix keito ti chij chi nti kicho'ab', xaq keikunaj ti je iwab', xaq kib'atz' ti k'ul che raqan jun chij we ajnaq jun raqan, xaq keitzalijsaj ti kisachom kib'e, keitzukuj ti kesach kanoq, xa to' kixyajan chkij, xaq lik ki'an k'ax chke.

⁵ Inchij xekanaj kanoq nti chajinel ke, to' xekicher b'ik, i itzel laj taq chikop xekitij b'ik.

⁶ Xkikichersaj b'i kib' pa taq es, xaq chwi taq jyub' naj uwi xesachik, xe'e b'i chwach ronojel ulew, lik mijun xu'at upen chkilik, xaq we keutzukuj.

⁷ Rumali, ajyu'ul chij, lik chita intzij.

⁸ Yin in Ajwal, lik kinsaqij pub'i ink'aslemal: K'iyal taq kiwach itzel taq chikop xekel-aj b'i inchij xaq xekitij b'ik, man nti kechajiwik. I je inchajinelab' ke'e ti chkitzukuxik i chij. I chajinelab' xa are ike kkichajij kib', are ti kkichajij inchij.

⁹ Rumali, ajchajinelab', chita i tziji

¹⁰ chi Yin in Ajwal, kinb'ij chiwe: Ix ajyu'ul chij, Yin kinsaqij chiwe chi in ajch'oj chiwij, lik kinkoj uch'ojil inchij chiwe; kinya ti chik chiqul kchajixik, man keje ile kichajij ti chik iwib' yix; keinto ni kik'aslemal inchij, man keje ile yix keitij ti chik.

I utz laj ajyu'ul chij

¹¹ Yin in Ajwal, kinb'ij: Lik are Yin kinya wib' chkichajixik inchij.

¹² Keje pacha jun ajyu'ul chij chi lik kb'ison chke uchij are je kichernaq b'ik, keje ile kinb'ison ni Yin chke inchij; keintzukuj na li chila che taq i k'ijib'al ipa je kichernaq wi b'ik che jun ij are equm xaq are o jab' tew upam.

¹³ Kewesaj na li che i nimaq taq tinimit aj naj, keinmol ni kichi' xaq keink'am nu b'i che i kulew. Keink'am nu b'i chutzuqik kib' chwi taq jyub' re i tinimit Israel, xaq pa taq b'eya, xaq che ronojel i k'ijib'al chi o winaq chwach re i tinimit le.

¹⁴ Keink'am nu b'ik re kkitija i chomiq laj taq k'im, pa taq es chwi taq jyub' naj uwi re Israel. Chila na ke'uxlan wi, xaq kkitij i chomiq laj taq k'im chi lik jel.

¹⁵ Lik are ni Yin inchajinel ke inchij, lik Yin keink'am nu b'i pa uxlanem. Yin in Ajwal, kinb'ij.

¹⁶ Keintzukuj ni chij chi je sachnaq, keink'am na li i kisachom kib'e, kinb'atz ni k'ul chrij kaqan i chij le we ajnaq kaqan, keinto ni nti kicho'ab', ke'inchajij ni je ti'ojib' xaq i o kicho'ab'. Yin ke'inchajij na pacha i rajwaxik.

¹⁷ Yin in Ajwal, kinb'ij: Chita, chij chi ix we Yin: Kin-at ni tzij pkiwi i chij xaq i chab'at.

¹⁸ ¿Kixu'on ti ile chi kitij b'i chomiq laj taq k'im, xa kiya'ya kan uwi i jub'an chik chi kitij taj? Kitu' iya' k'arar uwach, i jub'an chik xa ki'an tz'il che uwach ru' iwaqan.

¹⁹ Are inchij Yin kkitij i k'im chi yix iya'yam kan uwi, xaq kkitu' i ya chi yix i'anom kan tz'il che uwach.

²⁰ Rumali Yin in Ajwal, kinb'ij chiwe: Kin-an ni atb'al tzij pkiwi i chij chi je ti'ojib', xaq pkiwi i je b'aq.

²¹ Yix je itakpum b'i k'a naj ni'pa nti kicho'ab' elsab'al b'i ke, lik xeito' b'i ru' iwok'a', rumali xi'an chke chi xe'anmaj b'ik.

²² Xwiri Yin keinto inchij. Kinya ti chik chi ke'el-ax b'ik. Kin-an ni atb'al tzij chkixol i chij.

²³ Kin-an na chi ktzalij li wajpatan ma David, i kinkoj ni pa chajinel ke inchij le chi lik xwi ire keuchajij na. Ire are chajinel ke.

²⁴ Yin in Ajwal, in ki-Dios na, i ma David, chi wajpatan, are ni ire kaj-atzil. Yin in Ajwal, xinb'ij.

²⁵ Kin-an ni jun trat ku' ike, man keje ile kinjikb'a jun kik'aslemal chi lik utz. Kinsachsaj ni kiwach itzel taq chikop pa nim laj tinimit, man keje ile inchij lik utz kek'asi ni che jun k'ijib'al chi lik nti xib'in ib' chke, xaq xaipa kewar wi kan pa taq k'achelaj.

²⁶ Yin ke'inya ni inchij chrij chwach injyub' chi o u'ij, xaq lik kinya ni utzil chomal pkiwi; kintaq na li jab' pkiwi anb'al utz chke are kuriq i ij.

²⁷ I che' chi je o pa taq es kewachin na, i ulew kuya ni uwach, ike utz ni jeqelem kki'an pkulew. Are Yin kewesaj intinimit pki'ab' ike chi je kiya'om pa k'ax kumal ike, are uri kketamaj na chi Yin in Ajwal.

²⁸ I tinimit aj naj kekiya ti chik ike pa k'ax, xaq mitene itzel taq chikop kekitij ti chik. Lik utz ni kik'aslemal xaq lik mijun kexib'iwik.

²⁹ Kinya ni kija' chi lik kpo'ik, rumali ike le lik kkitij ti chik numik xaq ni'pa i jub'an chik nimaq taq tinimit kekiyo'ya ti chik.

³⁰ Are uri kketamaj na chi Yin in Ajwal ki-Dios, in o ku' ike, i tinimit Israel are intinimit. Yin in Ajwal, kinb'ij.

³¹ Yix ix are inchij, chij chi je o pink'olb'al. Yin in Ki-Dios. Yin in Ajwal, xinb'ij.