Ezequiel 32 - Wuj Pa K'ubultzij

I ma faraón junamsam ru' jun nim laj itzel chikop

¹ Che nab'e ij re ukab'lajuj ik' re i kab'lajuj junab', i Ajwal xlapan wu' i xub'ij chwe:

² Chab'ixaj i b'ixi re muqunik che i ma faraón, chi ajawinel re i tinimit Egipto: Lik at pacha jun koj ke i nimaq taq tinimit; lik at pacha jun itzel chikop aj pa mar: Kapach'pa awib' chupam araqana, ru' awaqan ka'an tz'il che uwach i ya xaq katukta upam i ya.

³ Iri are kub'ij i Ajwal: Tupu lik at o chkixol uk'iyal taq tinimit, kink'aq ni ink'at pawi i ru' ile katinchap na.

⁴ Katinjukekej b'i chwach ulew xaq katinjab'b'a ni kan chwach ulew. Kin-an na chi konojel i tz'ikin je aj chikaj ketak'i pawi, xaq chkitzuqu ni kib' che ati'lal konojel ni'pa chikop aj pa taq es.

⁵ Ru' i aynaq laj ti' re ach'akul kinnojsaj uwi taq i jyub' xaq i uwi taq ta'aj.

⁶ Kin-an ni tz'ub'ub' che ulew ru' akik'el, chi kupon k'a chwi taq jyub', xaq ru' ile kenoj ni ni'pa i k'otolaq re i raqana.

⁷ Yin, are kinsach awach, kin-an na chi uwakaj k-equmarik xaq kechup i ch'umil; kinch'uq ni uwach i ij ru' i sutz' xaq i ik' kwalch'in ti chik mas.

⁸ Awumal yet kinchup ni ni'pa taq i a' chi kewalch'in li chwa kaj, xaq lik kin-an ni equm che atinimit. Yin in Ajwal, kinb'ij.

⁹ Are kel utzijol asachb'al kupon utzijol pa taq tinimit chi aweta'am ti te kiwach, kin-an na chi kek'achir ni uk'iyal taq tinimit.

¹⁰ Awumal yet kinya ni xib'in ib' pa taq uk'iyal tinimit; i kajawinelab' lik kkixij ni kib' are yin kwesaj li inch'ich' chi k'ulala o uware chkiwach ike. Are kattzaqik, ike keb'arb'at ni ru' xib'rikil rumal kik'aslemal chkijujunal.

¹¹ I Ajwal kub'ij: I uch'ich' i ajawinel re Babilonia chi k'ulala o uware ktzaq ni pawi yet, ma faraón.

¹² Kin-an ni che uk'iyal taq atinimit chi kesoktaj ni rumal kich'ich' i je itzel laj taq ajch'oj. Kkik'is ni uwach ucho'ab' i tinimit Egipto xaq kkisach ni uwach uk'iyal taq utinimit.

¹³ Kinsach ni kiwach konojel i chikop chi kkitu' kiya' che araqana, xaq lik nti chik jun winaq xaq mijun chik chikop kki'an tz'il che uwach i ya ru' kaqan.

¹⁴ Are uri kin-an na chi i ya ku'an saq uwach xaq i raqana nti kkich'ob' che are keb'inik pacha i aceite. Yin in Ajwal, kinb'ij.

¹⁵ Are kin-an che Egipto pacha jun tz'inilik jyub' chaqij, i tinimit kkanajik nti chik winaq chwach, are uri kketamaj na chi Yin in Ajwal.

¹⁶ Iri are jun b'ix re muqunik, xaq rajwaxik keje ub'ixaxik ile kki'an ixoqib' re jalajuj taq tinimit are ke'o' che Egipto xaq che uk'iyal uwinaq. Yin in Ajwal, kinb'ij.

I kamik krajawin puwi i tinimit Egipto

¹⁷ Che i jo'lajuj ij che ukab'lajuj ik' re i kab'lajuj junab', i Ajwal xlapan wu' i xub'ij chwe:

¹⁸ Yet, winaq, chatb'ixan junam ku' ixoqib' re jalajuj taq tinimit jun b'ix re muqunik rumal uk'iyal i tinimit Egipto xaq kumal i kaj-atzil: I nimaq ki'ij ketzaq ni chwach i jyub' ta'aj chuxe' ulew, ku' i je kamnaq chi je o chik pa jul.

¹⁹ ¿Xatab'a lik mas at chom yet chkiwach i jub'an chik? Chatqaj loq xaq chajab'ij b'i awib' junam ku' i jub'an chi kkikoj ti u'ij i Dios.

²⁰ Ike ketzaq ni junam ku' i jub'an chi kekam pa ch'oj. Yij chik i ch'ich' chi k'ulala o uware. Ku' ike ke'e wi uk'iyal winaq.

²¹ I je aj-atzil chi mas o ki'ij kkiya ni utz laj uponik chke aj Egipto chila ipa krajawin wi kamik xaq chke i kijunamsam kiwach ku', kkib'ij: ¡Ya xeqaj loq! ¡Lik xejab'i kan ike chi kkikoj ti u'ij i Dios, chi xekam pa ch'oj!

²² Chila o wi i tinimit Asiria, junam ku' i achiyab' chi je yij che i ch'oj kisutim rij i jul pa muqtal wi. Konojel ike le xekam pa ch'oj.

²³ Je muqtal k'a chupam unajtil upam i jul. I achiyab' chi je yij che i ch'oj xekikoj il i k'a je k'aslik, xwiri xekam pa ch'oj i wo'or kisutim rij i jul ipa muqtal wi i tinimit Asiria.

²⁴ Chila o wi Elam junam ku' uwinaq chi je yij che i ch'oj kisutim rij i jul re muqb'al. Konojel ike le xekam pa ch'oj, winaq chi kkikoj ti u'ij i Dios xetzaq chwach i jyub' ta'aj chuxe' ulew. Xekikoj il ni'pa k'a je k'aslik, xwiri wo'or lik nti chik ki'ij chkixol ni'pa xeqaj pa jul re muqb'al.

²⁵ I Elam jab'al chkixol konojel uwinaq chi je yij che i ch'oj chi je kamnaq chik, konojel ike xkikoj ti Dios i je kamnaq pa ch'oj, chi wo'or kisutim rij i jul re muqb'al. Lik xekikoj il i k'a je k'aslik, xwiri wo'or nti ki'ij chkixol i xeqaj pa jul. Xekanaj chkixol i winaq chi je kamsam.

²⁶ Chila je o wi Mesec xaq Tubal, ku' konojel kiwinaq chi je yij che i ch'oj kesutin chrij kijul re muqb'al, konojel ike kkikoj ti Dios, je kamnaq pa ch'oj, chi lik xekikoj il i k'a je k'aslik.

²⁷ Lik je muqtal ti ku' i o ki'ij ujer, chi xeqaj junam ru' kich'ojb'al ipa krajawin i kamik chi lik kiya'om kich'ich' chi k'ulala o uware chuxe' kijolom, xaq i kitob'al kib' o puwi kich'akul, iri xuk'ulmaj chrijil chik uya'kil kan i xib'in ib' chkixol i je k'aslik.

²⁸ Xaq chila katk'iji ni yet, tinimit Egipto, chkixol i winaq chi kkikoj ti u'ij i Dios, anom ch'aqa taq chawe xaq at muqum chkixol i je kamnaq pa ch'oj.

²⁹ Chila o wi Edom, ku' i rajawinelab' xaq i je raj-atzil. Tupu lik o te'eq ki'ij xwiri lik je o chkixol i je kamnaq pa ch'oj, je muqtal chkixol i jub'an chi kkikoj ti u'ij i Dios, chkixol i xeqaj pa taq jul re i kamik.

³⁰ Chila je o wi konojel i je aj-atzil re pa moxab' junam ku' konojel aj Sidón. Lik o te'eq ki'ij xaq xe'oksan il, xwiri wo'or xeqaj pa jul re i kamik ke i je kamnaq pa ch'oj, lik ch'uqtal chik kij rumal uqajsaxik ki'ij. Lik kkikoj ti Dios, konojel je muqtalik chi lik nti ki'ij neri chkixol je kamnaq pa ch'oj, chkixol ni'pa i xeqaj pa jul.

³¹ Are keril ma faraón, kkub'i ni uk'ux che kikamik konojel uwinaq, man ire xaq konojel i uwinaq chi je yij che i ch'oj xekam pa ch'oj. Yin in Ajwal, kinb'ij.

³² Ma faraón lik xuya xib'in ib' chkixol i je k'aslik; rumali muqtal chkixol i winaq chi kkikoj ti Dios, chkixol i je kamnaq pa ch'oj, xaqjunam ku' uk'iyal uwinaq chi je yij che i ch'oj. Yin in Ajwal, xinb'ij.