Ezequiel 30 - Wuj Pa K'ubultzij

Utojb'alil puwi i tinimit Egipto

¹ I Ajwal xlapan wu' i xub'ij chwe:

² Yet winaq, chatch'aw pinb'i Yin xaq chab'ij: Iri are kub'ij i Ajwal: Chixsik'in rumal i ij

³ chi ya knaqajab' loq; ¡Ktijin li unaqajab'ik i ij re i Ajwal! ¡Are jun ij chi lik eqmuj, are jun ij chi lik xib'in ib' chke i nimaq taq tinimit!

⁴ Kpe ni ch'oj chrij i tinimit Egipto. Are kekamsax ni je k'i chila xaq kkel-aj kib'eyomal chke, xaq kkisach uwach i tinimit Egipto k'a chuxeb'al loq, i tinimit Etiopía ksiksat na.

⁵ Xaq ketzaq ni pa ch'oj i achiyab' chi je yij che i ch'oj re i tinimit Etiopía, re i tinimit Libia, tinimit Lidia, xaq konojel aj Arabia, re Lud xaq jub'an chik tinimit ke i jub'an chik, chi kiya'om kiwach ru'.

⁶ Iri are kub'ij i Ajwal: Ni'pa kkiya kiwach ru' i tinimit Egipto kekam ni pa ch'oj, kjeqan li che i tinimit Migdol k'a che i tinimit Sevene. I nim laj ukojik u'ij i tinimit Egipto kkanaj na chi lik nti chik u'ij. Yin in Ajwal, kinya intzij.

⁷ ¡Egipto are i tinimit chi lik nti chik o chwach, chkiwach i jub'an chik tinimit, xaq utinimit lik mas wulijnaq.

⁸ Yin are kin-an na chi i tinimit kumaj a' i ksach kiwach konojel ni'pa kkito, are uri kketamaj na chi Yin in Ajwal.

⁹ Are kuriq i ij chi kinya utojb'alil umak i tinimit Egipto, kintaq b'i je ajb'il tzij chi ke'e chwi mar man keje ile kkikojsaj il i winaq chi nti kkich'ob' che chila pa Etiopía, chi lik konojel kkixij ni kib'. I ij le ya kk'unik.

¹⁰ Yin in Ajwal, kinb'ij: Kin-an na chi are ma Nabucodonosor, ajawinel re i tinimit Babilonia, are ire kk'isaw uwach ub'eyomal i tinimit Egipto.

¹¹ Ire k-e ni ku' i achiyab' chi je yij che i ch'oj, chi lik je are mas je itzel laj taq winaq, chusachsaxik uwach i tinimit. Kki'an ni ch'oj chkij i tinimit Egipto ru' kich'ich' chi k'ulala o uware, xaq lik kkinojsaj ni kan i tinimit chke i kamnaq.

¹² Kin-an ni che raqana Nilo kchaqijik xaq kinya ni tinimit pki'ab' itzel laj taq winaq; kumal i je aj naj le kinwulijsaj ni i tinimit xaq ronojel ni'pa o chwach. Yin in Ajwal, xinb'ij.

¹³ Yin in Ajwal, kinb'ij: Kinsach ni kiwach i tiox chi xaril je antalik xaq usachik kiwach konojel i tiox chi ne te saqil re i tinimit Menfis. I tinimit Egipto lik nti chik jun chi kok'aw utzam chke, xaq lik kinnojsaj ni che i xib'in ib'.

¹⁴ Kin-an na chi ksach uwach i jyub' wiqab' re i tinimit Egipto, kinnak' a' che i tinimit Zoán xaq kin-at tzij puwi i tinimit Tebas.

¹⁵ Kinya ni woywal puwi i tinimit Sin, chi are ucho'ab' i tinimit Egipto xaq kinsachsaj ni uwach ub'eyomal i tinimit Tebas.

¹⁶ Kinnak' ni a' che i tinimit Egipto, i tinimit Sin kub'ak'ek'ej ni rib' rumal uk'axk'ol; kjaqtaj ni jul che i tapial re i tinimit Tebas, i tinimit Menfis lik kki'an ni ch'oj chrij pa'ij.

¹⁷ Alab'om re i tinimit Avén xaq re i Pibeset kekam ni pa ch'oj, i jub'an chik winaq kekik'am nu b'i prexil.

¹⁸ Yin are kinsach uwach ucho'ab' i tinimit Egipto xaq kinsach ni uwach ucho'ab' chi lik kukoj u'ij ru', i ij ku'an ni equm chila pa Tafnes, jutzob'aj sutz' kuch'uq ni uwi Egipto, xaq i winaq chi je o pkitinimit kek'am nu b'i prexil.

¹⁹ Yin kin-at ni tzij xaq kinya utojb'alil puwi i tinimit Egipto, are uri kketamaj na chi Yin in Ajwal.

²⁰ Che wuqub' ij che nab'e ik' re julajuj junab', i Ajwal xlapan wu' xaq xub'ij chwe:

²¹ Yin inpatz'om uteleb' i ma faraón, chi ajawinel re i tinimit Egipto, i mijun ukunam che xaq ub'atz'om taq k'ul chrij yab'al tan chik ucho'ab' chi lik ktiki tan chik chumo'exik uch'ich' chi k'ulala o uware.

²² Rumali Yin in Ajwal, kinb'ij: Yin kinsaqij chi in ajch'oj chrij ma faraón chi ajawinel re i tinimit Egipto. Kinpatz' ni chekeb' uteleb', i uteleb' chi nti k'ax che xaq i uteleb' chi patz'tajnaq chik, kin-an ni che chi kro'taj uch'ich' pu'ab'.

²³ Keinkichersaj nu b'i aj Egipto chkixol jub'an chik nimaq taq tinimit, xaq keinkichersaj nu b'i che jalajuj nimaq taq tinimit.

²⁴ Lik kinya ni ucho'ab' uteleb' i ajawinel re Babilonia, xaq kinya ni inch'ich' pu'ab' chi k'ulala o uware. Kinpatz' ni uteleb' ma faraón, ire kjilaw na are kuna'o chi soktajnaq chik chkiwach i je ajch'oj chrij.

²⁵ Kinya ni ucho'ab' uteleb' i ajawinel re Babilonia, xwiri kwesaj ni ucho'ab' uteleb' ma faraón. Are kinya inch'ich' pu'ab' i ajawinel re Babilonia, ire kuyak chrij i tinimit Egipto, are uri kketamaj na chi Yin in Ajwal.

²⁶ Keinkichersaj nu b'i aj Egipto chkixol jub'an chik tinimit xaq nimaq taq tinimit, are uri kketamaj na chi Yin in Ajwal.