Ezequiel 25 - Wuj Pa K'ubultzij

Tzijonik chkij aj Amón

¹ I Ajwal xlapan wu' xaq xub'ij chwe:

² Yet, winaq, jat chik ku' aj Amón, chatlapan pinb'i chkij ike.

³ Chab'ij chke chi chkikojo retalil i tzij chi Ajwal kub'ij chke: Yix xixsik'in rumal i kikotemal are xiwilo chi i wachoch xqajsax u'ij, i tinimit Israel wulijnaq xaq i winaq aj Judá xe'elsax b'i pa cho'ab' chwach kulew.

⁴ B'ay, rumali kinjach pi'ab' yix i cho'ab' re i tinimit chi o chila ipa kel wa li ij, keje ile ike kkimaj ni iwulew chiwe, xaq kkiyak kachoch wu'waq xaq kejeqi ni chila. Ike le kkitij ni uwach i tikon yix xaq kkitu' ni i leche.

⁵ Kin-an ni che i jyub' Rabá chi kik'ijib'al taq kamey, i tinimit Amón che jun ta'aj re kiwayb'al chij. Are uri kiwetamaj ni yix chi Yin in Ajwal.

⁶ Yin in Ajwal, kinb'ij: Yix ix aj Amón ipok'pam pi'ab' xaq xixsak'lin rumal i kikotemal, xaq lik ixutum i tinimit Israel.

⁷ Rumali kinyak in-ab' chiwij re yab'al utojb'alil imak xaq kixinjach chke i nimaq taq tinimit, keje ile kkimaj chiwe ni'pa taq o iwu'. Lik kixwesaj na li pa taq tinimit, kinsachsaj iwach pa nimaq taq tinimit, lik kinsachsaj iwach iwonojel. Keje ile kiwetamaj na chi Yin in Ajwal.

Tzijonik chkij aj Moab

⁸ Yin in Ajwal, kinb'ij: I tinimit Moab, xaq i tinimit Seir, kkib'ij chi i tinimit Judá xaqjun pacha i jub'an chik nimaq taq tinimit.

⁹ Rumali kinjaq jun ch'ut b'e putzal i tinimit Moab, kinjeq b'i usachik uwach che jun uchi' i tinimit k'a che i jun chik uchi' ipa kk'is wi, i tinimit: Bet-jesimot, Baal-meón xaq i Quiriataim chi je are i chomiq taq ab'aj re wiqb'al ib' re i tinimit le.

¹⁰ Kin-an na chi i tinimit chi je o chila ipa kel wa li ij, kkik'am ni kulew, xwi ta la ile xaq kkik'am ni kulew aj Amón, man keje ile, chkixol i nimaq taq tinimit kk'un ti chik chkik'ux i tinimit Amón.

¹¹ Kinya ni utojb'alil pkiwi aj Moab, te'uri kketamaj na chi Yin in Ajwal.

Tzijonik chkij aj Edom

¹² Yin in Ajwal, kinb'ij: I tinimit Edom, xu'an uk'exel i k'ax che i tinimit Judá, rumal ile lik nim umak xutz'ab'ij chrij.

¹³ Rumali Yin in Ajwal, kinb'ij: Kinyak ni in-ab' chrij i tinimit Edom re kinya utojb'alil umak, kinsach ni kiwach uwinaq xaq uchikop. Lik kinsach kiwach. Kjeqan b'i ru' i tinimit Temán k'a keuk'isa che i tinimit Dedán, konojel i winaq kekamsax ni ru' ch'ich' chi k'ulala o uware.

¹⁴ Kin-an ni uk'exel i k'ax che i tinimit Edom, xwiri are intinimit Israel k-anaw che; ire ku'an ni che i tinimit Edom chrij pacha i unimal i woywal. Keje ile kketamaj na wach utojik kki'an chwe. Yin in Ajwal, xinb'ij.

Tzijonik chkij aj Filistea

¹⁵ Yin in Ajwal, kinb'ij: I aj Filistea xkitzalij uwach i k'ax chi antal chke, lik xkitzalij uwach ru' nim laj oywal pkik'ux; lik arewi k-e ij saq chkij lik je ajch'oj ku' aj Israel, lik kiya'om kib' chu'anik i sachanik.

¹⁶ Rumali, Yin in Ajwal, kinb'ij: Kinyak ni in-ab' pkiwi aj Filistea yab'al utojb'alil kimak, lik kinsach kiwach aj Creta xaq kinsach ni kiwach ni'pa je o kan chunaqaj i mar.

¹⁷ Ru' nim laj woywal kintzalij ni uwach chke wach ki'anom chwe; kinya ni utojb'alil chke ru' nim laj woywal. Are kin-an iri, kketamaj ni uri chi Yin in Ajwal.