Ezequiel 19 - Wuj Pa K'ubultzij

O'ej kumal i ajawinelab' re Israel

¹ Yet, at winaq, chab'ixaj i b'ixi re b'is chke i ajawinelab' re i tinimit Israel:

² I achuch are te jun ati koj chi jeqel chkixol i koj. Xu'an uk'ijib'al chkixol ike, i chila xeuk'iysaj wi rak'al.

³ Jun chke i rak'al lik utz rilik xu'ano, lik xchomar puk'iyb'al, xnaw chuchapik i ral taq chikop re uti', xaq lik ke'uraqch'ij i winaq.

⁴ Xwiri, pa nimaq taq tinimit lik xel utzijol ire le, rumali xkichap chupam jun chapb'al, lik utz uximik xki'an ru' xokxaq taq ch'ich', te'uri xkicharej b'i k'a pa tinimit Egipto.

⁵ I ati koj are xrilo chi lik nti chik kuk'am wi ucho'ab', are uri xuk'am jun chik chke i rak'al, i lik utz tan chik rilik xu'ano, rumali xchomarik.

⁶ Are xk'iyik, kel b'ik, i kok loq, o chkixol i koj; xaq xnaw chumutik uti' pa taq es, xaq keutij i winaq.

⁷ Xeuwulijsaj i nimaq taq ja ke i ajawinelab', xu'an k'ax chke i tinimit, ru' uch'awb'al are ksik'inik, lik xeusiksa konojel i winaq chwach i jyub' ta'aj.

⁸ Are uri xewalij konojel i tinimit chrij chwach chi je o chuchi' taq ulew re tinimit, xkikoj jun chapb'al re, rumali xtzaq chupam.

⁹ Are uri xkixim ru' xokxaq ch'ich', xkimin chupam jun k'olb'al, te'uri xkik'am b'i ru' i ajawinel re i tinimit Babilonia, chila xkimin wi prexil, man keje ile mijun chik ktaw uch'awb'al are ksik'in chwi taq jyub' re Israel.

¹⁰ I achuch keje ktzunik pacha jun tikanb'al uva tiktal chuchi' i raqana, lik kuya uwach xaq lik chom rax uxaq, mantiox che i ya man lik olik.

¹¹ I u'ab' i che' le, lik xekowirik, chi lik xki'an kich'amiy i ajawinelab' che. Lik xk'iyik chi xupon k'a pa sutz', lik k-aljin rumal unajtil rij xaq rumal i u'ab' chi lik rax uxaq.

¹² Xwiri lik xkimich' ru' koywal, i xkik'aq pulew. I tew chi xpe prelb'al ij xuchaqijsaj, rumali xepuq uwach i uva le; xaq xechaqij i ko laj taq u'ab', i xkik'aq pa a'.

¹³ Wo'or tiktal chila pa tz'inilik jyub' chaqij, are jun ulew chaqij chi lik nti ya chwach.

¹⁴ Che taq u'ab' kel li jun a' chi kutij b'i utux xaq i uwach. Lik nti chik u'ab' ko, chi kki'an kich'amiy i ajawinelab' che. Iri are jun b'ix re b'is, rumali kb'ixax na re b'ix re b'is.