Ezequiel 10 - Wuj Pa K'ubultzij

I u'ij uchomal i Ajwal kro'taj kan i rachoch

¹ Are xwilo, puja' i wu'wik chi o pkiwi i querubín, xwinaqir jun b'iroxik pacha taq jun kub'ib'al chi o u'ij kmajaw pacha jun chom laj zafiro.

² Xaq i Ajwal xub'ij che achi chi ukojom u'u' re lino: “Chamina b'i awib' chupam i sotsaq chkixe' i querubín, xaq chak'ama jun mo'aj a'al chi kjuluwik, chi o chkixol i querubín, chakichersaj b'i puwi i tinimit.” Te'uri xwilo are xok b'i achi.

³ Che i jo'taj tan le i querubín je o pa wiqab' re rachoch i Ajwal, i jun nim laj sutz' xunojsaj uwaja re rachoch i Ajwal chi o pa ja.

⁴ Are uri u'ij uchomal i Ajwal xel b'i chikaj pkiwi i querubín xaq x-e chila pa okb'al b'ik che rachoch i Ajwal, i sutz' xunojsaj i rachoch i Ajwal xaq uwaja re rachoch lik ktzijtzatik rumal u'ij uchomal i Ajwal.

⁵ I uch'awb'al i kixik' i querubín are kerupratik ktataj k'a chila che uwaja re rachoch i Ajwal chi o chisaq. Lik keje pacha are i Ajwal chi ronojel ktiki che ktijin che lapanik.

⁶ Are uri i Ajwal xutaq i achi chi ukojom u'u' re lino chi chuk'ama i a' chkixol i sotsaq, chkixol i querubín le. I achi x-ek, xk'iji chuk'ulel jun chke i sotsaq.

^7-8 Chuxe' kixik' i querubín le k-aljin jun pacha taq jun ab'aj re winaq. Jun chke ike xuji pan u'ab' ipa o wi i a' chi o pa nik'aj chke, xaq xuk'am jub'i' che, xuya pu'ab' i achi chi ukojom u'u' re lino, are uri xuk'amo i x-ek.

⁹ Chkitzal i querubín xwil kajib' sotsaq, chkijujunal o jun chkitzal. I sotsaq le lik kewalch'inik pacha taq ktzun ab'aj crisólito.

¹⁰ Che kajib' sotsaq xaqjun ke'anawik xaq k-aljinik chi pacha taq o jun chupam i jun chik.

¹¹ Are i querubín kkich'ij b'e che jun chke i kajib' usuk' b'e, lik rajwaxik ketzalij ta loq, xwiri rajwaxik chi kkich'ij b'e chrij i jun chi nab'e chkiwach.

¹² Kich'akul, chel kij, ki'ab' xaq i kixik' lik kereprat k'ulala, xaq keje i kajib' sotsaq.

¹³ Yin xinta chi sotsaq le xaq lik kb'ix “sotsaq” chke.

¹⁴ Chkijujunal i querubín o kajib' kipalaj: I nab'e upalaj pacha taq re jun toro; i ukab' upalaj pacha re jun winaq; i urox upalaj pacha re jun koj; xaq i ukaj upalaj pacha re jun kotxik.

¹⁵ I b'iroxiki je are i je wilom yin chi raqana Quebar. I querubín xewalijik,

¹⁶ ike are kkich'ij b'e, xaq kkich'ij b'e i sotsaq; xaq are kkikoj b'i kixik' re kewalij b'i chwach ulew, i sotsaq kekanaj ti kan chkij;

¹⁷ Are ketak'i'ik xaq ketak'i i sotsaq, are kewalijik xaq kewalij i sotsaq, man i sotsaq le o kik'aslemal chi lik k'aslik chke i b'iroxik chi o kixik'.

¹⁸ Are uri i u'ij uchomal i Ajwal xel b'i puwi i rachoch i xk'iji pkiwi i querubín.

¹⁹ Ike xkirip b'i kixik', xeyaktaj b'i chwach ulew. Yin xwilo wach walijik xki'ano, ru' i sotsaq chkitzal, xaq wach kitak'alem xol chija prelb'al li ij re i rachoch i Ajwal. I u'ij uchomal i Ajwal ke aj Israel o pkiwi ike.

²⁰ Je are ni ike chi je kajib' querubín chi yin xwilo je o chuxe' i Ajwal re i tinimit Israel, chi raqana Quebar. Are uri xinnab'ej chi je are i querubín.

²¹ Chkijujunal ike o kajib' kipalaj, xaq kajib' kixik', xaq chuxe' i kixik' k-aljinik chi o ki'ab' pacha re jun winaq.

²² I kipalaj xaqjun k-anawik pacha kipalaj i jub'an querubín chi yin xwil kiwach chila chi raqana Quebar. Chkijujunal kkich'ij b'e pusuk' ipa ktijin wi ki'enam.