ÉXODO 38 - Wuj Pa K'ubultzij

U'anik i porb'al sipon anch'ich'

¹ Ma Bezaleel xu'an i porb'al sipon, che' suj xukoj che, jun xik'ab' ru' keb' ripaj ab'aj xuya che raqan xaq keje ile xuya che uwach, jun mejelik ch'uk xuya che unajtil rij.

² Xaq xuyijb'a kajib' rok'a' puwi pa taq uch'uk; lik xrok'aj b'i rib' ru' i porb'al sipon xu'an che, xaq xukoj anch'ich' chrij ronojel i porb'al sipon le.

³ Xu'an ni'pa i chapb'al re i sujb'al sipon, yab'al chaj, jub'an pala, nimaq taq laq jub'an chapb'al ti'ij, xaq yab'al a'al; ronojel ni'pa ile lik is anch'ich'.

⁴ Xu'an jun k'ark'ar anch'ich', xukoj rekem qaj uchi' i porb'al sipon chi ke'eloq pa nik'aj qajoq che i porb'al sipon.

⁵ Xaq xu'an kajib' sotsaq ch'ich' re i kajib' uch'uk i k'ark'ar ch'ich', man krik'awsaj i b'alul chupam.

⁶ Xu'an i b'alul le lik ru' i che' suj, xukoj anch'ich' chrij.

⁷ I b'alul le xkik'awsaj chupam i sotsaq ch'ich', lik xkiwoyb'a kan jujun b'alul k'ulala che i porb'al sipon, man k'amb'al b'i re xaipa. I porb'al sipon le xu'an towtik upam che xaq tz'alam xukoj che.

U'anik i yab'al re anch'ich'

⁸ Xwi ta la ile, xaq xutz'onoj i taqb'al kib' ixoqib' chke chi anch'ich', je are ixoqib' chi kechakun chila pa okb'al re i ja re riqb'al ib' ru' i Dios; i anch'ich' le chi xutz'onoj chke ixoqib' xu'an jun ch'ajb'al ab'aj che xaq xu'an i raqan ru'.

U'anik uwaja re i ja re riqb'al ib' ru' i Dios

⁹ Ma Bezaleel xu'an uwaja re i molb'al ib', puwiqab'im xuya jo'ob' juwinaq (25) xik'ab' che i raqan, xaq xukoj chom laj kortin lino che.

¹⁰ Xukoj juwinaq (20) aqan che xaq juwinaq (20) ukub'ib'al chi lik anch'ich', ni'pa i ko'kaq ch'ich', i sotsaq xaq lik saq-o'oj.

¹¹ Xaq keje pumoxim, jo'ob' juwinaq (25) xik'ab' xuya che i raqan uwaja, rachi'ilam juwinaq (20) aqan xaq juwinaq (20) ukub'ib'al chi lik anch'ich'; i ko'kaq ch'ich' re i aqan le xaq i sotsaq lik saq-o'oj.

¹² I unimal uwach uwaja puqajb'al ij, kab'lajuj xik'ab' ru' nik'aj raqan xaq xukoj chom laj kortin che; lajuj aqan xukoj che xaq lajuj ukub'ib'al, i ko'kaq ch'ich' re i aqan le xaq i sotsaq lik saq-o'oj.

¹³ Xaq i unimal uwach uwaja prelb'al ij, kab'lajuj xik'ab' ru' nik'aj raqan i kortin.

¹⁴ I kortin re puxukut, oxib' xik'ab' ru' nik'aj xuya che i raqan xaq oxib' aqan, rachi'ilam oxib' ukub'ib'al.

¹⁵ I juperaj chik ke'eloq chi chekeb' peraj re i okb'al re i lo'laj molb'al ib' o jun kortin chi oxib' xik'ab' ru' nik'aj xuya che raqan, rachi'ilam oxib' aqan xaq oxib' ukub'ib'al.

¹⁶ Ronojel i kortin chi kusutij rij uwaja lik chom laj lino xukoj che.

¹⁷ I ukub'ib'al i aqan lik anch'ich', xaq ni'pa i ko'kaq ch'ich' xaq i sotsaq xaq i retz'b'alil uchi' lik saq-o'oj, xaq i paqb'al re i et xkikoj b'i saq-o'oj chrij, ronojel i aqan re i uwaja lik saq-o'oj, xaq sotsaq ch'ich' xkikoj che.

¹⁸ I kortin re okb'al che uwaja lik chij lana xkikoj che, xkitz'aj ru' kaq, kaqxar xaq i kaqkoj xaq ru' i chom laj lino xaq lik chom ut'isik xki'an che. Jo'ob' xik'ab' ru' juripaj ab'aj i raqan xaq jun xik'ab' ru' oxib' ripaj ab'aj unajtil rij, pacha i kortin re i uwaja,

¹⁹ kajib' aqan xkikoj che xaq kajib' ukub'ib'al lik anch'ich'. I ko'kaq ch'ich', sotsaq ch'ich', lik saq-o'oj xaq i uwi i aqan le xkikoj saq-o'oj chrij.

²⁰ Ronojel i estaka chi re chapb'al k'ul re i ja re riqb'al ib' ru' i Dios xaq i chapb'al k'ul chi sutinnaq chrij i uwaja lik anch'ich'.

Ch'ich' chi xechapb'exik re i ja re riqb'al ib' ru' i Dios

²¹ Are i taqanik iri xuya i ma Moisés xaq i ma Itamar chi rak'al i ma Aarón chi ajsujul sipon, xub'ij chke i aj Leví chi kkajlaj ni'pa i ch'ich' chi xoksax che i ja re riqb'al ib' ru' i Dios.

²² I ma Bezaleel chi uk'ojol ma Uri, ri umam mam Hur chi are jun chke ulemajil ma Judá, xu'an ronojel ni'pa xub'ij i Dios che ma Moisés.

²³ I ma Aholiab chi uk'ojol ma Ahisamac xuto ma Bezaleel; i ma Aholiab le are jun chke ulemajil ma Dan chi ajch'ayol, ajjitz'ol k'ul xaq ajt'is, ru' i chij kaqxar, kaq, xaq i kaqkoj xaq kt'isan ru' i chom laj lino.

²⁴ I uk'iyal i an-o'oj chi xya'ik re i sipon chi xkikoj che i lo'laj k'ijib'al re i Dios, xmoltaj juwinaq (20) tintal. Chrij pacha i pajb'al re i lo'laj k'ijib'al re i Dios.

²⁵ I saq-o'oj chi xmoltaj che taq i ij are xtz'ib'ax kib'i i winaq pa komon lajuj oxwinaq (70) tintal ronojel, chrij pacha i pajb'al re i lo'laj k'ijib'al re i Dios.

²⁶ Konojel ni'pa o chik juwinaq junab' (20) chke je lajuj wuqlajujwinaq wajxaqmo' jo'lajujchiy oxt'ub' (603,550) xaq konojel xkiya jo'ob' saq-o'oj chrij pacha i pajb'al re i lo'laj k'ijib'al re i Dios.

²⁷ Waqib' oxwinaq (66) tintal saq-o'oj man xyayursaxik re xoksax pukub'ib'al i lo'laj k'ijib'al re i Dios, chi xaq ipa xkub'i wi aqan re i kortin. I jujun ukub'ib'al le xoksax waqib' oxwinaq (66) ral taq k'ox saq-o'oj che.

²⁸ Ru' i saq-o'oj le chi xmoltaj ku' i winaq pa komon i ma Bezaleel xu'an i ko'kaq ch'ich' re i aqan, xkikoj chrij i paqb'al et xaq are xkikoj che i sotsaq ch'ich'.

²⁹ Lajuj kawinaq (50) tintal anch'ich' xmoltajik chi xkiya'o re kisipon;

³⁰ ronojel ile xoksax pukub'ib'al i okb'al b'ik che i ja re riqb'al ib' ru' i Dios, xaq are xki'anb'ej i sujb'al sipon re i porb'al, junam ru' k'ark'ar ch'ich' xaq ni'pa i kajwax che;

³¹ xaq xkikoj che i ukub'ib'al xaq che i estaka chi ch'uqb'al uwi i ja re riqb'al ib' ru' i Dios, xaq xkikoj che ukub'ib'al i uchija re i uwaja.