ÉXODO 27 - Wuj Pa K'ubultzij

Porb'al sipon anch'ich'

¹ Cha'ana jun porb'al sipon, che' suj kakoj che, jun xik'ab' ru' keb' ripaj ab'aj kaya che i raqan xaq keje ile kaya che uwach, unajtil rij oxib' mejelik ch'uk kaya che.

² Xaq kayijb'a kajib' rok'a' puwi pa taq uch'uk; lik krok'aj b'i rib' ru' i porb'al sipon ka'an che, xaq kakoj anch'ich' chrij ronojel i porb'al sipon le.

³ Cha'ana jub'an yab'al chaj, jub'an pala, jub'an nimaq taq laq, jub'an elsab'al ti'ij chi o oxib' utzam, xaq jub'an yab'al a'al; ronojel ni'pa ile lik rajwaxik chi is anch'ich'.

⁴ Cha'ana jun k'ark'ar ch'ich' re anch'ich', xaq cha'ana kajib' sotsaq ch'ich' anch'ich' re i kajib' uch'uk.

⁵ Te'uri i k'ark'ar ch'ich' anch'ich' le, kkanaj rekem qaj uchi' i porb'al sipon, chi ke'eloq pa nik'aj qajoq che i porb'al sipon.

⁶ Xaq katzukuj keb' b'irb'aq che' suj kakoj anch'ich' chrij, re i porb'al sipon.

⁷ I b'irb'aq che' le kawik'awsaj chupam i sotsaq anch'ich', lik kawoyb'a kan jujun b'irb'aq che' le k'ulala che i porb'al sipon man k'amb'al b'i re xaipa.

⁸ I porb'al sipon rajwaxik chi towtik upam ka'an che, xaq lik re che' chrij pacha xk'ut chawe chila tzam jyub'.

Uwaja re i ja re riqb'al ib'

⁹ Cha'ana jun uwaja che i ja re riqb'al ib' wu', puwiqab'im che i ja le kaya jo'ob' juwinaq (25) xik'ab' che i raqan xaq kasutij pa chom laj kortin.

¹⁰ Kakoj juwinaq (20) aqan che xaq juwinaq (20) ukub'ib'al chi lik anch'ich', ni'pa i ko'kaq ch'ich' xaq i retz'b'alil rajwaxik chi lik re saq-o'oj.

¹¹ Xaq keje pa moxim, jo'ob' juwinaq (25) xik'ab' kaya che i raqan uwaja, xaq kasutij pa chom laj kortin rachi'ilam juwinaq (20) aqan xaq juwinaq (20) ukub'ib'al chi lik anch'ich'; i ko'kaq ch'ich' re i aqan le xaq i retz'b'alil rajwaxik chi lik re saq-o'oj.

¹² I unimal uwach uwaja puqajb'al ij, kab'lajuj xik'ab' ru' nik'aj o che i raqan xaq kasutij pa chom laj kortin; lajuj aqan kakoj che xaq lajuj ukub'ib'al.

¹³ Xaq i unimal uwach uwaja prelb'al ij kab'lajuj xik'ab' ru' nik'aj o che i raqan.

¹⁴ I kortin re puxukut oxib' xik'ab' ru' nik'aj kaya che i raqan, xaq rachi'ilam oxib' aqan xaq oxib' ukub'ib'al.

¹⁵ I juperaj chik xaq oxib' xik'ab' ru' nik'aj kaya che raqan, xaq kakoj i kortin che, rachi'ilam oxib' aqan xaq oxib' ukub'ib'al.

¹⁶ I okb'al re uwaja kakoj jun kortin che, jo'ob' xik'ab' raqan, rajwaxik chi xar, kaq, kaqkoj xaq i chom laj lino koksax che; i kortin le kt'is rumal jun chi lik uchak ile man lik utz u'anik ku'an che. Kakoj kajib' aqan che, xaq kakoj kajib' che ukub'ib'al.

¹⁷ Ronojel i aqan chi kakoj chrij chwach i uwaja, rajwaxik chi lik saq-o'oj i retz'b'alil; xaq i ko'kaq ch'ich' rajwaxik chi lik saq-o'oj xaq i ukub'ib'al rajwaxik chi lik anch'ich'.

¹⁸ I uwaja jo'ob' juwinaq (25) xik'ab' raqan kaya che, kab'lajuj xik'ab' ru' nik'aj uwach k'ulala, jun xik'ab' ru' kajib' ripaj ab'aj unajtil rij. Ronojel i kortin chi kakoj che rajwaxik chi lik chom laj lino, xaq ronojel i ukub'ib'al rajwaxik chi lik anch'ich'.

¹⁹ Ronojel ni'pa i rajwaxik pa ja re riqb'al ib' wu' chi lik is jalajuj uchak, ronojel i estaka rajwaxik chi lik anch'ich'.

Aceite ke i tzuk'b'al

²⁰ Chab'ij chke aj Israel chi kkik'am li aceite oliva chawe chi re i wuqub' u'ab' i tzuk'b'al, man keje ile kk'is ti a' che i tzuk'b'al le.

²¹ Are ma Aarón xaq i je uk'ojol o chkiqul utzijik i tzuk'b'al le, man rajwaxik chi ronojel a'ab' kjuluw chwach i Ajwal chila chupam i ja re riqb'al ib' wu'; chwach pan i kortin ipa o wi i kaxa re utrat i Dios. Iri are jun atb'al tzij chi lik o chkiqul aj Israel kekojon che, ronojel ij saq pa taq kilemajil.