ÉXODO 26 - Wuj Pa K'ubultzij

I ja re riqb'al ib' ru' i Dios

¹ Ka'an i ja re i riqb'al ib' wu', ru' lajuj chom laj kortin re lino, katz'aj ru' i tz'ajb'al akoj, kaqxar xaq i kaq, kat'is keb' uk'exwach i querubín chwach i kortin.

² Ronojel i kortin le rajwaxik chi xaqjun raqan xaq xaqjun uwach ka'an che, wuqub' xik'ab' ru' nik'aj kaya che i raqan, jun xik'ab' uwach.

³ Chat'isa jo'ob' kortin kutiq rib' uwach ka'an che xaq keje ka'an che i jo'ob' chik.

⁴ Cha'ana tel chi taq uchi' i nab'e lemaj kortin, xaq chat'isa uchi' i tel le ru' i chij kaqxar xaq keje cha'ana che i julemaj chik.

⁵ Cha'ana lajuj kawinaq (50) tel chuchi' i nab'e lemaj kortin, xaq keje cha'ana che i julemaj chik, man keje ile, i tel re i nab'e lemaj kortin kutzub'ala rib' ru' i tel re i ukab' lemaj.

⁶ Xaq cha'ana lajuj kawinaq (50) ko'kaq ch'ich' an-o'oj chapb'al re i julemaj kortin ru' i julemaj chik man keje ile k-on jun ja re riqb'al ib' wu'.

⁷ Xaq cha'ana julajuj kortin ru' rismal chab'at re jun mujb'al chi kuch'uq uwi i ja re riqb'al ib' wu'.

⁸ Ronojel i kortin le rajwaxik chi xaqjun raqan xaq xaqjun uwach wuqub' xik'ab' ru' jun mejelik ch'uk kaya che raqan, jun xik'ab' ru' juripaj ab'aj kaya che uwach.

⁹ Chat'isa jo'ob' kortin kutiq rib' uwach ka'an che xaq keje ka'an che i waqib' chik, i uwaq kortin kkanajik re uchija re i ja re riqb'al ib' wu'.

¹⁰ Cha'ana lajuj kawinaq (50) tel chuchi' i nab'e lemaj kortin xaq keje cha'ana che i julemaj chik.

¹¹ Xaq cha'ana lajuj kawinaq (50) ko'kaq ch'ich' anch'ich', chapb'al re i julemaj kortin ru' i julemaj chik, man keje ile k-on xaqjun.

¹² I kortin re i mujb'al lik naj raqan, rumali kb'or an nik'aj chuqul ja re i riqb'al ib' wu'.

¹³ Keje ile kch'uqtaj uwi i ja re i riqb'al ib' wu' rumal i kortin naj raqan chi kk'is taj are i keb' ripaj ab'aj ru' nik'aj che pa taq utzal.

¹⁴ Cha'ana re i mujb'al le jun ch'uqb'al uwi xaq katz'aj ru' tz'ajb'al kaq, xaq ka'an jun chik ch'uqb'al ru' utz'umalil chikop chi lik ko re kok li pa rajwal.

¹⁵ Cha'ana jub'an pimiq taq tz'alam re aqan, re i ja chi re riqb'al ib' wu', i pimiq taq tz'alam le lik che i che' suj kelsax wi xaq lik suk'ul ukojik cha'ana.

¹⁶ I pimiq taq tz'alam le is kakab' xik'ab' ru' nik'aj kya' che raqan xaq oxib' ripaj ab'aj uwach.

¹⁷ Kajisij b'i nik'aj che upimol uchi' i pimiq taq tz'alam pa taq uxukut, man keje ile kuchap rib' uchi' ru' i jun chik tz'alam. Keje ile k-ani che ronojel i pimiq taq tz'alam re i ja re riqb'al ib' wu'.

¹⁸ Juwinaq (20) pimiq taq tz'alam kakoj puwiqab' i ja re riqb'al ib' wu'.

¹⁹ Xaq kakoj kawinaq (40) kub'ib'al re saq-o'oj chuxe' i tz'alam, kakab' kub'ib'al k-e chuxe' i jujun, man keje ile i uchi' i tz'alam kkub'i puwi ukub'ib'al.

²⁰ Xaq juwinaq pimiq taq tz'alam kakoj pusuk' b'i moxab' che i ja re riqb'al ib' wu',

²¹ xaq kakoj kawinaq (40) ab'aj saq-o'oj chi yijb'am pukub'ib'al i tz'alam; kakab' k-e chuxe' i jujun tz'alam.

²² Kakoj waqib' pimiq taq tz'alam chrij li ja re riqb'al ib' wu', chi pusuk' b'i uqajb'al ij.

²³ Xaq kakoj chik keb' pimiq taq tz'alam pa taq uch'uk chila chrij i ja re riqb'al ib' wu',

²⁴ i keb' pimiq taq tz'alam le rajwaxik chi lik kale upimol ka'an che, kayut' uwi ru' jun ch'ich' xaq keje ile ka'an che jun chik uch'uk.

²⁵ Rajwaxik wajxaqib' pimiq taq tz'alam xaq waqlajuj ab'aj saq-o'oj re ukub'ib'al i pimiq taq tz'alam, keb' kub'ib'al k-e chuxe' jun tz'alam.

²⁶ Xaq katzukuj jo'ob' che' suj, re b'alul chapb'al re i tz'alam che juperaj che i ja re i riqb'al ib' wu'.

²⁷ Jo'ob' b'alul re i juperaj chik xaq jo'ob' chik re chrij i riqb'al ib' wu', pusuk' i uqajb'al ij.

²⁸ I b'alul re pa nik'aj, kik'aw punik'ajal i tz'alam kok b'i chuchi' jewa kupon k'a chuchi' jela.

²⁹ Te'uri kakoj an-o'oj chrij i pimiq taq tz'alam, ka'an jub'an ral taq sotsaq an-o'oj man kik'aw i b'alul chupam, xaq kakoj an-o'oj chrij.

³⁰ I ja re i riqb'al ib' wu' lik ka'an ni che chrij pacha xk'ut chawe chila tzam jyub'.

³¹ Xaq cha'ana jun kortin xar, kaq, kaqxar xaq i chom laj lino; i kortin le kt'is querubín chwach, chi lik chom k-ani che.

³² Kayijb'a kajib' aqan xwiri are i che' suj, re i ja re i molb'al ib', xaq kakoj b'i an-o'oj chrij, kakoj ko'kaq ch'ich' an-o'oj che xaq kakoj jujun ukub'ib'al saq-o'oj chuxe' i kajib' aqan le.

³³ Katzayb'a i kortin che i chapb'al re chi an-o'oj. Chrij i kortin le kaya wi i kaxa re utrat i Dios; xaq i kortin kuriq uchak chiwe yix man ku'at uxol i Lo'laj K'ijib'al re i Dios ru' i Lik Lo'laj K'ijib'al re i Dios.

³⁴ Kakoj i ch'uqb'al uwi i kaxa re utrat i Ajwal chila che i lik Lo'laj K'ijib'al re i Dios.

³⁵ Chaya li mexa chwach i kortin chila puwiqab'im i ja re riqb'al ib' wu', xaq i tzuk'b'al kaya li chwach i mexa chila pumoxim i ja re molb'al ib'.

³⁶ Cha'ana jun kortin re i okb'al che i ja re riqb'al ib' wu', ru' i chij xar, ru' chij kaqxar, ru' chij kaq xaq ru' i chij chi chom laj lino, i kortin le kt'is rumal jun winaq chi lik are uchak ile.

³⁷ Kayijb'a jo'ob' aqan re i ja re i molb'al ib' chi are i che' suj, kakoj an-o'oj chrij xaq i chapb'al re i kortin lik an-o'oj; xaq i jo'ob' aqan le kakoj jo'ob' ukub'ib'al chuxe' chi anch'ich'. Keje ile xub'ij i Dios che ma Moisés.