ÉXODO 25 - Wuj Pa K'ubultzij

Sipon re anb'al i ja re riqb'al ib' ru' i Dios

¹ I Ajwal xu'ijla ma Moisés xub'ij che:

² Chab'ij chke aj Israel chi chkimolo jun insipon; xwiri, xwi ike chi ronojel kik'ux kkaj kkiya i sipon le.

³ I sipon chi rajwaxik kkimolo are iri: Ab'aj chi lik saq-o'oj, ab'aj chi lik an-o'oj, ab'aj chi kaq-o'oj,

⁴ k'ul xar, k'ul kaq, k'ul kaqkoj, k'ul lino xaq i rismal chab'at,

⁵ utz'umal chij tz'ajtal kaq che, tz'um chi lik wajim xaq i che' chi suj ub'i;

⁶ aceite re tzuk'b'al, kunb'al muy chi k-e ru' aceite re mub'al jolomaj, xaq i kunb'al muy chi k-on muy che ruxlab' i pom,

⁷ ab'aj chi ónice, xaq i jub'an chik ab'aj re wiqb'al re efod chi yut'b'al ki'u' xaq ch'uqb'al uwach uk'ux i atz laj ajsujul sipon.

⁸ Te'uri ki'an jun lo'laj k'ijib'al man kink'iji ni Yin chkixol,

⁹ i ja re riqb'al ib' wu' le chila kink'iji wi Yin xaq ronojel ni'pa rajwaxik chupam, lik k-an ni che chrij pacha kink'ut Yin chawe.

Kaxa re utrat i Dios

¹⁰ Ka'an jun kaxa che' suj kakoj che, jun mejelik ch'uk kaya che i raqan, oxib' ripaj ab'aj uwach xaq oxib' ripaj ab'aj unajtil rij.

¹¹ Chakojo an-o'oj chrij, chupam xaq che uchi'.

¹² Xaq kayijb'a kajib' ch'ich' sotsaq chi lik an-o'oj, kawoyb'a che kajib' uch'uk, kakab' pa taq utzal.

¹³ Chayijb'a keb' b'alul re i che' suj, chakojo an-o'oj chrij,

¹⁴ kawik'awsaj i che' le chupam i sotsaq ch'ich' chi awoyb'am pa taq utzal i kaxa, man k'amb'al b'i re i kaxa xaipa.

¹⁵ I che' le chi xamin chupam i sotsaq ch'ich' re i kaxa, lik mawesaj chik, chaya kan chila.

¹⁶ Chupam i kaxa le kak'ol wi intzij inpixab' chi kinya ni chawe.

¹⁷ Cha'ana jun ch'uqb'al an-o'oj, uwi i kaxa; jun mejelik ch'uk ru' jun ripaj ab'aj kaya che i raqan xaq oxib' ripaj ab'aj ru' nik'aj kaya che uwach.

¹⁸ Cha'ana keb' querubín chi lik an-o'oj, ru' ch'ayb'al kayijb'a wi, i kaya puwi i ch'uqb'al uwi i kaxa.

¹⁹ Kakoj jujun querubín chi taq uchi' i ch'uqb'al uwi i kaxa.

²⁰ I querubín le kiripom kixik' puwi i ch'uqb'al uwi i kaxa, xaq kkitzub'ala kib', xwiri puwi i ch'uqb'al le ketaqen wi.

²¹ Chakojo i ch'uqb'al uwi i kaxa, xaq chupam i kaxa le, kaya wi intzij inpixab' chi kinya ni chawe.

²² Kqariq ni qib' awu' chila chkixol i keb' querubín chi je o puwi i kaxa re utrat i Ajwal, chila puwi i ch'uqb'al uwi le, kinb'ij ni chawe ronojel ni'pa i tzij chi kab'ij ni chke aj Israel.

Mexa yab'al wa re trigo re i kuyb'al mak

²³ Cha'ana jun mexa, che' suj kakoj che, nik'aj xik'ab' raqan kaya che, keb' ripaj ab'aj uwach xaq oxib' ripaj ab'aj unajtil rij.

²⁴ Kakoj an-o'oj chrij ronojel xaq chakojo retz'b'alil uchi' chi xaq an-o'oj.

²⁵ Xaq kakoj jun uchi', juripaj ab'aj uwach kaya che, kakub'a b'i puwi ronojel uchi' xaq ka'an retz'b'alil ronojel uchi' ru' i an-o'oj.

²⁶ Cha'ana kajib' sotsaq ch'ich' an-o'oj, chawoyb'a pa taq kajib' uch'uk ipa o wi raqan.

²⁷ I sotsaq ch'ich' le kawoyb'a qaj chuxe' i retz'b'alil uchi' chi an-o'oj, man chila kik'awsax wi i b'alul chi k'amb'al b'i re i mexa xaipa.

²⁸ Are i che' suj b'irb'aq katzukuj ka'an b'alul che xaq kakoj an-o'oj chrij.

²⁹ Xaq ni'pa i laq, lochb'al, xar xaq i tu'b'al ya, ronojel ile lik rajwaxik chi lik an-o'oj.

³⁰ Lik arewi kaya i lo'laj wa re trigo puwi i mexa, are i wa re trigo chi ksujux chinwach Yin; xcha i Dios.

I tzuk'b'al an-o'oj

³¹ Xwi ta la ile, xaq ka'an jun tzuk'b'al lik an-o'oj, ru' ch'ayb'al kayijb'a: Ukub'ib'al, raqan, pacha ral taq xar, ukotz'ijal xaq i wonwaq re i raqan is ru' ch'ayb'al kayijb'a wi.

³² Kakoj waqib' u'ab' i tzuk'b'al le: Oxib' putzal jewa xaq oxib' chik putzal jela.

³³ Kakoj oxib' pacha ral taq xar che u'ab', ka'an jun won che xaq jun ukotz'ijal; xaq kakoj oxib' pacha ral taq xar che jun chik u'ab', jun won xaq jun ukotz'ijal; keje ile ka'an che waqib' u'ab' i tzuk'b'al.

³⁴ Xwiri che raqan i tzuk'b'al le kakoj kajib' pacha ral taq xar, rachi'ilam i wonwaq xaq i ukotz'ijal.

³⁵ Ka'an jun won che raqan i tzuk'b'al chuxe' i keb' u'ab', ka'an jun chik won chuxe' i keb' chik u'ab' xaq ka'an jun chik won chuxe' i k'isb'al keb' u'ab'; xaq keje ile ka'an che i waqib' u'ab'.

³⁶ I wonwaq xaq i u'ab' xaqjun kawesaj wi ru' raqan i tzuk'b'al, ronojel ile rajwaxik lik chom laj an-o'oj kakoj che, ru' ch'ayb'al kayijb'a wi.

³⁷ Xaq cha'ana wuqub' u'ab' i tzuk'b'al, man k-on saq che chrij chwach.

³⁸ Xaq cha'ana uxiter, xaq ral taq ulaq chi lik are i chom laj an-o'oj.

³⁹ Waqib' oxwinaq (66) ral taq k'ox an-o'oj kuk'am b'i ronojel i tzuk'b'al le, xaq ru' ile kel wi ni'pa i rajwaxik che i tzuk'b'al.

⁴⁰ Ta pe', lik chrij pacha xink'ut chawe chila tzam jyub', keje ile ka'an che. Xcha.