ÉXODO 20 - Wuj Pa K'ubultzij

Lajuj utzij upixab' i Dios

¹ I Dios xch'awik i xub'ij ronojel i tziji:

² Yin in Awajwal Dios, chi xatwesaj li pa Egipto, chila ipa at o wi te'eq pa k'ax pu'ab' i rajaw achak.

³ “Matzukuj taq jub'an chik dios man lik xwi Yin in a-Dios.”

⁴ “Ma'an taq jun atiox re kakoj u'ij, xaq ma'an taq uk'exwach ni'pa i o chikaj, ni'pa i o chwach ulew, xaq ni'pa i o pa mar chuxe' ulew.

⁵ Maxuk awib' chkiwach, xaq makoj ki'ij, man Yin in Awajwal Dios, Dios chi lik xwi Yin kmajawik koksax in-ij. I qajawxelab' xaq i chuchxelab' chi tzel kinkilo xaq ktitat kipam chwe, lik kinya ni utojb'alil kimak pkiwi kak'al, pkiwi ki kimam, pkiwi kixikin xaq pkiwi kimuq kixikin.

⁶ Xwiri kink'ut ni rutzil ink'ux chke konojel taq lemajil chi k'ax kinkina'o, chi xaq kekojon che intzij inpixab'.”

⁷ “To' mawetz'b'ej ub'i Awajwal Dios, man Ire kuya ni utojb'alil che i jun chi to' kretz'b'ej ub'i.”

⁸ “Chk'un chak'ux i ij sábado chi elsam re kojb'al u'ij i Ajwal.

⁹ Waqib' ij katchakun na xaq ka'an ni ronojel ni'pa i rajwaxik chawe.

¹⁰ Xwiri che uwuq ij, lik are ni i ij sábado, re kojb'al u'ij Awajwal Dios; mijun chak ka'an che i ij le, xaq keje ak'ojol, ami'al, xaq i je ataqon, achi, ixoq, achikop xaq i ajposar chi je o pawachoch.

¹¹ Man waqib' ij xu'an i Ajwal chuyijb'axik i kaj, ulew, mar xaq ronojel ni'pa o chwach; are uri che uwuq ij xuxlanik, rumali xuya u'ij i ij sábado le xaq xu'ul i ij le re kojb'al u'ij Ire.”

¹² “Chatkojon chke aqajaw achuch, man keje ile i Awajwal Dios kuya ni chawe chi naj katk'asi chwach i jyub' ta'aj chi kuya Ire chawe.”

¹³ “Matkamsanik.”

¹⁴ “Mamin awib' ru' jun winaq chi at k'ulinaq ti ru'.”

¹⁵ “Matel-anik.”

¹⁶ “Manuk' tzij chrij alok'anij.”

¹⁷ “Marayij uwach rachoch alok'anij xaq marayij uwach i rixoqil, je utaqon, achi, ixoq, ub'oyex, u'axna, lik mijun ub'itaq re alok'anij marayij taq uwach che.”

I aj Israel kkixij kib' chu'anik i utz taj chwach i Dios

¹⁸ Konojel aj Israel lik je ajsaqinel tzij re i ureplajik xetaq kaj, rumal uraqlajik pacha taq ray, rumal uch'awb'al i trompeta xaq i jyub' chi ch'uqtajnaq rumal i sib', i je aj Israel lik keb'arb'at rumal kixib'rikil xaq naj xek'iji wi.

¹⁹ Rumali i je aj Israel xkib'ij che ma Moisés: —Chab'ij yet chqe wach kqa'ano man yoj kojkojon ni chawe. Xwiri mch'aw i Dios qu' man we kch'aw chik i Dios qu' moqxa kojkamik —xecha.

²⁰ I ma Moisés xub'ij chke i winaq: —Mixij iwib', i Dios xa xk'un chuk'amik ipam man keje ile kiya u'ij xaq kixmakun taj —xcha.

²¹ Are uri i je aj Israel naj xek'iji wi tz'aqat xtejeb' pan ma Moisés chupam i tz'intz'ik equm ipa o wi i Dios.

I atb'al tzij re i sujb'al sipon

²² I Ajwal xub'ij che ma Moisés, chab'ij iri chke aj Israel: “Yix itom chik chi Yin xinch'aw li chiwe chikaj.

²³ Mi'an taq tiox che i saq-o'oj xaq che i an-o'oj, xaq mikoj taq ki'ij pacha ki'an chwe Yin.

²⁴ Chit'ub'a uchi' jut'ub'aj ulew re sujb'al sipon chinwach, man puwi i sujb'al sipon le kisujuj wi ichij, ichikop xaq isipon chi kporoxik re chomb'al ib'. Yin kink'un ni che i k'ijib'al ipa kinb'ij wi chiwe, man chila kikuxtaj kinataj wi inb'i, xaq chila kinya wi utzil chomal piwi.

²⁵ We ki'an jun sujb'al sipon tusum ab'aj, i ab'aj le lik kipaxij ti pa taq nik'aj, man i paxb'al re xa kuqajsaj u'ij i ab'aj le.

²⁶ Mikoj cholchol che i sujb'al sipon le man are kixel b'ik moqxa ketzun b'i winaq pi'u'.”