Ester 9 - Wuj Pa K'ubultzij

Kich'akanik aj Israel

¹ Che i ij oxlajuj re kab'lajuj ik', ile are i ik' chi Adar ub'i, are i ij chi ch'iktalik, man k-ani ronojel i taqanik chi xuya i ajawinel, xaq are i ij le chi i je ajch'oj chkij aj Israel kich'ob'om kich'akik. Xwiri xuk'ulmaj ti ile, man are aj Israel xech'akanik.

² I aj Israel chi je jeqel pa jalajuj taq tinimit chi o pu'ab' ma Asuero, xkimol kib' chu'anik ch'oj chkij i ajch'oj chi kich'ob'om te'eq kikamsaxik. Xwiri lik mijun xumin taq rib' ku' man ronojel i tinimit lik oknaq jun nim laj xib'rikil chke.

³ Konojel i aj-atol tzij re i jalajuj taq tinimit, aj-ok'al utzam i jalajuj taq tinimit chi lik nimaq xaq pa taq komon xaq jub'an chik chi lik nimaq kipatan, xekito aj Israel rumal kixib'rikil che ma Mardoqueo.

⁴ I ma Mardoqueo le, lik nim chik u'ij chila pa nim laj rachoch i ajawinel, xaq enaq chik utzijol chwach ronojel i ulew ipa je o wi, xaq lik ij ij ktijin unimarik upatan.

⁵ Aj Israel xekikamsaj i ajch'oj chkij ru' ch'ich' chi o uware k'ulala xaq xki'an chke pacha xkaj ike.

⁶ Lik xwi ne chila pa tinimit Susa, xekikamsaj jo'winaq jumo' (500) achiyab';

⁷ xaq xekikamsaj ma Parsandata, ma Dalfón, ma Aspata,

⁸ ma Porata, ma Adalía, ma Aridata,

⁹ ma Parmasta, ma Arisai, ma Aridai xaq ma Vaizata,

¹⁰ ike le je are uk'ojol ma Amán chi ajch'oj chkij aj Israel; xwiri xkik'am ti ub'itaq ke chke.

¹¹ Xaq lik che i ij le, i ajawinel are xretamaj chi lik je k'i chik winaq je kamnaq chila pa tinimit Susa,

¹² xub'ij che ati ajawinel Ester: —I aj Israel xekikamsaj quinientos achiyab' xaq lajuj uk'ojol ma Amán chila pa tinimit Susa. ¿Weta'am taj we keje ile ki'anom chke jub'an chik tinimit chi o pin-ab'? ¡Chatz'onoj chik chwe wach mas kawaj man yin kinya ni chawe!

¹³ I ati Ester xub'ij che: —We yet, Nim laj Winaq, kumaj awach, chaya chik uri chke i winaq aj Israel chi je o pa tinimit Susa, chi chweq chki'ana chik ch'oj ku' i ajch'oj chkij chrij pacha i taqanik chi aya'om wo'or. Xaq chetzayb'ax ni kich'akul i lajuj uk'ojol ma Amán.

¹⁴ Are uri i ajawinel xuya chik i taqanik chrij pacha xub'ij ati Ester che. I taqanik le xya' chik utzijol chila pa tinimit Susa xaq xetzayb'ax i lajuj uk'ojol ma Amán chi je kamnaq chik.

¹⁵ Are uri aj Israel chi je o pa tinimit Susa, xkimol chik kib' che i ij kajlajuj re i ik' chi Adar ub'i, chila Susa xekikamsaj chik jo'lajujwinaq (300) achiyab'; xwiri xkik'am ti ub'itaq ke chke.

¹⁶ Xaq i jub'an chik aj Israel chi je jeqel chila pa tinimit ipa ku'at wi tzij i ajawinel, che i oxlajuj ij xkimol kib' chuto'ik kik'aslemal xaq chkikamsaxik i ajch'oj chkij; are uri xekikamsaj lajujwinaq wuqmo' b'elejchiy (75,000) winaq, xwiri xkik'am ti ub'itaq ke chke.

¹⁷ Che i oxlajuj ij xki'an ronojel ile, xwiri; che i kajlajuj ij xe'uxlanik, xaq xkiyijb'a jun nim laj wa'im ru' jun nim laj kikotemal.

¹⁸ I aj Israel chi je o chila pa tinimit Susa, xaq xkimol kib' che i ij oxlajuj xaq che kajlajuj ij, rumali chi k'ate xe'uxlan che i ij jo'lajuj, xaq ike le xkiyijb'a jalajuj taq ti'b'alil ru' jun nim laj kikotemal.

¹⁹ Xwiri i aj Israel chi je jeqel pa taq komon chi sutim ti rij ru' i tapial nim uwach, lik ru' kikotemal xki'an i nima'ij che i ij kajlajuj re i ik' chi Adar ub'i, xaq xkisipaj jalajuj taq sipon chkiwach.

I nima'ij chi Purim ub'i

²⁰ I ma Mardoqueo xutz'ib'aj ronojel ni'pa xk'ulmaxik, xaq xutaq b'i wuj ku' aj Israel chi je o pa jalajuj taq tinimit chi o pu'ab' i ajawinel ma Asuero; chke ni'pa je o naj xaq chke ni'pa je o naqaj.

²¹ Xub'ij chke chi junab' junab' kki'an ni i nima'ij che i kajlajuj xaq che jo'lajuj ij re i ik' chi Adar ub'i,

²² kuxtab'al re i ij are aj Israel xkichupsaj kiwach i ajch'oj chkij xaq kuxtab'al re i ik' are xpe jun nim laj kikotemal pkik'ux aj Israel puk'exel i b'is xaq i k'ax chi je o te'eq chupam. Che taq i ij le ru' jun nim laj kikotemal kki'an ni jalajuj taq ti'b'alil, kkisipaj ni jalajuj taq sipon chkiwach xaq chke ni'pa je nib'a'.

²³ Lik arewi aj Israel kki'an i nima'ij le chrij pacha i taqanik chi xutz'ib'aj ma Mardoqueo chke, xaq chrij pacha i nima'ij chi xki'an che taq i ij are xkichupsaj kiwach i ajch'oj chkij.

²⁴ Man ma Amán, chi uk'ojol ma Hamedata, chi aj Agag, chi ajch'oj chkij konojel aj Israel, lik usaqim te'eq chi kuchupsaj kiwach aj Israel xaq xu'an ne sakinik ch'ikb'al re i ij are ku'an ni ronojel i kamsanik le chi uch'ob'om chkij aj Israel.

²⁵ Xwiri are xupon ati Ester chwach i ajawinel chub'ixkil che chi chsachsax ni uwach i itzel laj atb'al tzij chi xu'an kan ma Amán xaq mekamsax aj Israel, are uri i ajawinel xutaq utz'ib'axik chi ni'pa i utz taj chi uch'ob'om ma Amán chkij aj Israel, chtzaq ni chrij ire junam ku' i ralk'uwal xaq chetzayb'ax ni che jitz'b'al chi xutaq uyijb'axik.

²⁶ Keje uri ile chi i ij le xkiya pub'i purim, chi ke'eloq are uk'iyal pur pkich'ab'al ike. Rumali chi chrij pacha i taqanik chi xutz'ib'aj ma Mardoqueo, ni'pa xeilawik xaq ni'pa xkik'ulmaj pkik'aslemal ronojel ile,

²⁷ aj Israel xkib'ij chkiwach chi junab' junab' konojel ike, kimuq kixikin xaq ni'pa xkiya kiwach ku' ike, lik kki'an ni i nima'ij chekeb' ij chi ch'iktalik chrij pacha i taqanik chi xya' chke;

²⁸ konojel kkisachsaj ti chkik'ux ni'pa xuk'ulmaj che i keb' ij le, xaq lik arewi kki'an ni i nima'ij le pa taq alk'uwalil, pa taq tzob'ajil xaq pa taq tinimit, man keje ile aj Israel junam ku' kimuq kixikin ksach ti chkik'ux ronojel ni'pa xkik'ulmaj.

²⁹ Ati ajawinel Ester, chi umi'al ma Abihail, xaq ma Mardoqueo, chi aj Israel, xkitz'ib'aj chik jun wuj chi kub'ij chi i nima'ij re Purim kki'an ni che jun ij ch'iktalik chrij pacha i nab'e mul chi xki'ano,

³⁰ i wuj le xkitz'ib'aj ru' jun rutzil kik'ux, te'uri xkitaq b'i chke i winaq chi je o pa wuqub' waqwinaq (127) tinimit chi o pu'ab' ma Asuero,

³¹ chupam i wuj le tz'ib'talik chi kki'an ni i nima'ij re Purim che taq i ij chi ch'iktalik, chrij pacha i taqanik chi xuya ma Mardoqueo xaq ati ajawinel Ester chke ike xaq chke kimuq kixikin. Xaq xkiya i taqanik chi che taq i ij le, kkitij ti kiwa xaq lik ke'o' na rumal ni'pa xkik'ulmaj.

³² Are uri ati Ester lik xub'ij chik i taqanik chi kki'an na, ronojel ni'pa cholom chupam i wuj are kuriqa i nima'ij chi Purim ub'i. Ronojel ile xtz'ib'ax chupam jun wuj.