Ester 8 - Wuj Pa K'ubultzij

Taqanik tob'al ke aj Israel

¹ Che i ij le, ma Asuero chi ajawinel xusipaj i ja che ati ajawinel Ester, chi rachoch kan ma Amán, chi ajch'oj chkij aj Israel; xaq che i ij le ma Mardoqueo xupon chwach i ajawinel, man ati Ester ub'im chik che, chi ma Mardoqueo le uxib'al pa tzij.

² Are uri i ajawinel xresaj ub'aq re uwi u'ab' chi uk'amom kan che ma Amán, xuya che ma Mardoqueo. Xaq ati Ester xuya kan ma Mardoqueo pa aj-ok'al utzam che ub'itaq re ma Amán.

³ Chrijil chik ile ati Ester xlapan chik ru' i ajawinel, xexuki chwach ru' jun nim laj o'ej xaq xel uwa'al uwach, xub'ij che chi chsachsax ni uwach i itzel laj atb'al tzij chi xuya kan ma Amán chi xaq mekamsax aj Israel.

⁴ I ajawinel xuyak an uch'amiy an-o'oj chwach ati Ester. Are uri ati Ester le, xtak'i anoq,

⁵ xub'ij che i ajawinel: —We yet nim laj winaq kumaj awach xaq we kakojo chi ni'pa kinb'ij le lik utz, xaq we lik saq laj tzij k'ax kinana'o i we nim rutzil ak'ux chwe, chtz'ib'ax ni uri jun taqanik chi kusachsaj uwach ronojel i atb'al tzij chi xuya kan ma Amán chi kuchupsaj kiwach konojel aj Israel chi je jeqel pa taq tinimit ipa kat-ajawin wi yet.

⁶ ¿Wach uch'ijik kin-an yin uri, we kekamsax konojel inwinaq, xaq we kchupsax kiwach i walk'uwal?

⁷ Are uri ma Asuero chi ajawinel, xub'ij che ati ajawinel Ester, xaq che ma Mardoqueo chi aj Israel: Yin xinya i rachoch ma Amán che ati Ester, i ma Amán le, xintaq utzayb'axik che i jitz'b'al man rumal xuch'ob' kikamsaxik aj Israel.

⁸ Wo'or kinya pi'ab' chi chitz'ib'aj chupam jun wuj ronojel ni'pa kumaj iwach xaq ni'pa rajwaxik chi k-anik tob'al ke aj Israel, ronojel ile ki'an pinb'i yin. ¡Te'uri chinak'a b'i uk'exwach i b'aq re uwi u'ab' i ajawinel che i wuj le chi kitz'ib'aj! (Mijun kuchup uwach jun wuj we juch'um uwach rumal i ajawinel xaq we nak'tal uk'exwach i b'aq re uwi u'ab' i ajawinel che.)

⁹ Are uri i ajawinel lik xutaq la kisik'ixik i rajtz'ib' man kkitz'ib'aj i wuj. Che i ij oxib' juwinaq re urox ik' chi Siván ub'i, ronojel ni'pa xutaq utz'ib'axik ma Mardoqueo, xtaqi b'i chke aj Israel, chke aj-ok'al utzam i jalajuj taq tinimit, xaq pa taq komon, xaq chke jub'an chik aj-atol tzij, chke i wuqub' waqwinaq tinimit (127), chi kjeqan li chila pa tinimit India k'a kupon pa tinimit Etiopía, ni'pa i wuj le tz'ib'tal b'i pkich'ab'al i winaq re i jalajuj taq tinimit le. Xwiri i wuj chi xtaq b'i chke aj Israel lik tz'ib'tal pkich'ab'al ike.

¹⁰ I ajawinel ma Asuero xujuch' b'i uwach ronojel i wuj le, xaq xunak' b'i uk'exwach i b'aq re uwi u'ab' che, te'uri xkiya b'i chke jub'an achiyab' ajjachol wuj chi je ajrij taq kaway re i ajawinel, chi lik kkich'ij b'e.

¹¹ Chupam i wuj le i ajawinel ma Asuero, xuya i taqanik chke aj Israel, chi pa jalajuj taq tinimit ipa je jeqel wi, chkimolo kib' chuto'ik kik'aslemal xaq chkikamsaxik, chuchupik kiwach i ajch'oj chkij, xaq chkik'ama kan ronojel ub'itaq ke i winaq re i jalajuj taq tinimit, komon, chi kki'an ch'oj chkij xaq chkikamsaj ni konojel ixoqib' junam ku' ak'alab'.

¹² Lik xa che jun ij k-ani ni ronojel ni'pa i taqanik le, pa jalajuj taq tinimit ipa krajawin wi i ajawinel ma Asuero, i ij chi ch'iktalik, are i ij oxlajuj re i kab'lajuj ik', i ik' le Adar ub'i.

¹³ Jun uk'exwach i wuj le chi o i taqanik chupam, utz uri kpaxsax uwach, chi are jun atb'al tzij, xaq lik kya' ni retamaxik pa jalajuj taq tinimit, man keje ile aj Israel kkiyijb'a kib' che i ij le chu'anik i utz taj chke i ajch'oj chkij, anb'al uk'exel chke.

¹⁴ Rumal i taqanik re i ajawinel, i ajjachol wuj juntir xe'an la rij taq kaway xaq xkimaj la b'i kib'e chujachik i wuj le pa jalajuj taq tinimit, are u'anik uri chi i taqanik le x-etamax k'a pa tinimit Susa.

¹⁵ Te'uri xel li ma Mardoqueo pa nim laj rachoch i ajawinel, ukojom jun jurjik k'ul saq xaq xar chi kkikoj i ajawinelab', xaq ukojom jun nim laj koron an-o'oj xaq uk'aqom jun chom laj k'ul lino chuqul, xaq i utzunb'al are i kaqxar. Are uri konojel i winaq re i tinimit Susa, xesik'in rumal i kikotemal,

¹⁶ keje uri ile: Chi konojel aj Israel lik xekikotik, man lik chom xaq lik utz xkilo man xya' ki'ij.

¹⁷ Pa jalajuj taq tinimit xaq pa taq komon ipa kya' retamaxik i taqanik re i ajawinel, konojel aj Israel lik xekikotik xaq lik utz xkilo, rumali chi xki'an nima'ij xaq xkiyijb'a jalajuj taq ti'b'alil re kkitijo. Xwi ta la ile, lik je k'i i winaq pa tinimit chi je aj Israel taj xkiya kiwach ku', man lik kkixij kib' chke.