Ester 7 - Wuj Pa K'ubultzij

Ma Amán x-at tzij puwi chi kkamik

¹ I ajawinel xaq ma Amán xe'e pa wa'im chi xuyijb'a ati ajawinel Ester.

² Che ukab' ij re i wa'im, are ketijin chutu'ik i uwa'al uva muqb'am, are uri i ajawinel xub'ij che ati Ester: —¡Chatz'onoj chwe wach taq kawaj, man yin kinya ni chawe, tupu katz'onoj nik'aj che inrajawinik!

³ Are uri ati Ester xub'ij che i ajawinel: —We yet, Nim laj Winaq, k'ax kinana'o xaq we kumaj awach, xwi kwaj kintz'onoj chawe chi minkamsaxik xaq mekamsax inwinaq;

⁴ man yin xaq konojel inwinaq oj k'ayim che i kamik, man keje ile qonojel kchupsax ni qawach. Wetene to' oj k'ayim re kki'an taq winaq chqe chi oj o pa k'ax pu'ab' i rajaw qachak, yin nti neri kinb'ij; man i ajch'oj chqij nti neri jun k'ax ku'an che ni'pa i kawaj u'anik yet nim laj winaq.

⁵ Are uri i ajawinel ma Asuero xutz'onoj: ¿Pachinoq, xaq ipa o wi i winaq le chi kraj u'anik i tzel laj ch'ob'onik le?

⁶ Are uri i ati ajawinel Ester xub'ij: —I ajch'oj chqij chi kraj kojukamsaj, are ma Amán. I ma Amán are xuta ile, lik xtak'i kan chila rumal uxib'rikil chwach i ajawinel xaq chwach ati ajawinel Ester.

⁷ Te'uri i ajawinel, ma Asuero, ru' jun nim laj roywal xwalij b'i che uk'ijib'al ipa ketijin wi chwa'im, x-e chila ipa o wi tikb'al kotz'ij re i nim laj rachoch. Xwiri ma Amán are xunab'ej chi i ajawinel xutaq ukamsaxik ire, are uri xkanaj chila ipa ketijin wi te'eq che i wa'im chub'ixkil che ati ajawinel chi kch'aw chrij man keje ile kkamsax taj.

^8-9 Chrijil chik ile, i ajawinel xtzalij chik chila ipa xkitij wi kiwa, are uri xrilo chi ma Amán xukul chuxukut i tz'alam ipa kotz'ol wi ati ajawinel, are uri xsik'in chub'ixkil i tziji: —¿Xatab'a kawaj uqajsaxik u'ij ati ajawinel chi wachoch, xaq lik chinwach? I ajawinel are xuk'is ub'ixkil i tzij le, jujun chke i ajpatanib' chi kkichajij i ajawinel, xkich'uq upalaj ma Amán ru' jun k'ul. Are uri ma Harbona chi are jun chke achiyab' le, xub'ij: —I ma Amán uyijb'am jun jitz'b'al chila chi rachoch chi o kajlajuj xik'ab' che unajtil rij, chi xutaq uyijb'axik kamsab'al re ma Mardoqueo, chi are jun achi chi xuya utzijol chawe wach kak'ulmaj te'eq, Nim laj Winaq. Are uri i ajawinel xuya i taqaniki: —¡Chik'ama b'i ma Amán xaq chila chitzayb'a anoq!

¹⁰ Keje uri ile chi ma Amán xtzayb'ax che i jitz'b'al chi xutaq uyijb'axik, kamsab'al te'eq re ma Mardoqueo. Chrijil chik ile, i ajawinel xik'aw i nim laj roywal.