Ester 6 - Wuj Pa K'ubultzij

Uch'akanik ma Mardoqueo

¹ Xaq lik che a'ab' le, i ajawinel ma Asuero lik kok ta li uwaram, rumali xutaq uk'amik i nim laj wuj chi tz'ib'tal chupam ronojel ni'pa k-ani pa tinimit, man kajlax chuxikin.

² Chupam i wuj le xriqtaj wi chi ma Mardoqueo xretamaj xaq xuya utzijol chi ma Bigtán xaq ma Teres, aj-atzil chke i kechajiw i okb'al che i rachoch i ajawinel, kkaj ukamsaxik i ajawinel ma Asuero.

³ Are uri i ajawinel xutz'onoj: —¿Wach xya' che ma Mardoqueo xaq wach u'ij xya'ik rumal ile? I ajpatanib' xkib'ij che: —Lik ntaj, nim laj winaq.

⁴ Che i or le xok b'i ma Amán che i k'ijib'al chwach i rachoch i ajawinel, man kub'ij che chi chtzayb'ax ma Mardoqueo che jun jitz'b'al chi utaqom uyijb'axik. I ajawinel xutz'onoj: —¿Pachin o chwaja?

⁵ —Are ma Amán —xkib'ij i rajpatanib' che. —Chib'ij che chi chok loq —xub'ij i ajawinel.

⁶ Are xok b'i ma Amán; i ajawinel xutz'onoj che: —¿Wach kqa'ano yab'al u'ij jun achi chi lik k'ax kna' rumal i ajawinel? Ma Amán xub'ij puk'ux: “¿Pachin taq wa jun chik koksax u'ij rumal i ajawinel, we yin taj?”

⁷ Rumali chi xub'ij iri: —I achi le

⁸ rajwaxik chi kk'am li u'u' i ajawinel che chi naj raqan, xaq i kaway chi k-an chrij, xaq choksax nu b'i jun koron chi kkikoj i ajawinelab'.

⁹ Chrijil chik ile chya' ni i k'ul xaq i kaway che jun achi chi lik atz u'ij chkixol rajpatanib' i ajawinel, man are ire kukoj i k'ul le che achi chi koksax ni u'ij rumal i ajawinel, xaq kuk'am nu b'i rij kaway kub'insaj che i k'ijib'al nim re i tinimit, xaq knab'ej nu b'i chwach i ksik'in chub'ixkil i tziji: “¡Keje ukojik u'ij i achi iri k-anik, chi yatal u'ij rumal i ajawinel!”

¹⁰ Are uri i ajawinel xub'ij che ma Amán: —Chab'isoji', chak'ama i k'ul xaq i kaway re i ajawinel, cha'ana chrij pacha i xab'ij, cha'ana ile che ma Mardoqueo, chi kul chila xol uchija re i nim laj rachoch i ajawinel. Lik cha'ana ronojel ni'pa i xab'ij le.

¹¹ Are uri ma Amán xeuk'ama i k'ul chi naj raqan xaq i kaway chi re i ajawinel, xukoj che ma Mardoqueo, xu'ansaj chrij i kaway, te'uri xumalkatsaj che i k'ijib'al nim re i tinimit, ksik'in chub'ixkil i tziji: “¡Keje ukojik u'ij i achi iri k-anik chi yatal u'ij rumal i ajawinel!”

¹² Are xutzin i malkatik che i k'ijib'al nim re i tinimit, are uri ma Mardoqueo x-e chik pa kulem xol uchija re i nim laj rachoch i ajawinel. I ma Amán lik kb'isonik x-e pa'anem chi rachoch xaq xuch'uq b'i upalaj ru' jun k'ul.

¹³ Xulap che i rixoqil chi ati Zeres xaq chke i ramiy ronojel ni'pa xuk'ulmaj, are uri ike xkib'ij che: —We xjeqan uqajsaxik a'ij chwach ma Mardoqueo, chi aj Israel, lik kattiki ti uri chuch'akik, lik arewi kattzaq ni pu'ab'.

¹⁴ K'amaja ne keutzin che lapanik, are xeupon pan achiyab' chi elsam kikowil chi uwinaq i ajawinel, xkik'am b'i ma Amán pa wa'im chi uyijb'am ati ajawinel Ester.