Ester 5 - Wuj Pa K'ubultzij

Ruponik ati Ester chwach i ajawinel

¹ Oxib' ij rik'awik ile, ati Ester xukoj u'u' chi kkikoj ixoqib' ajawinelab', te'uri xok b'i pa nim laj ja k'a chwaja re i ajawinel, xtak'i chila chwach uchija ipa kul wi i ajawinel chupam ukub'ib'al chi o u'ij.

² I ajawinel are xril ati Ester chila chwaja che i rachoch, lik xkikot ru' xaq xuyak an uch'amiy an-o'oj chi rok'am pu'ab'. Are uri xtejeb' pan ati Ester xaq xuyin utzam uch'amiy i ajawinel,

³ i ajawinel xutz'onoj che: —¿Wach xak'ulmaj ati ajawinel Ester? ¿Wach kurayij ak'ux? ¡Tupu katz'onoj nik'aj che inrajawinik, kinya ni chawe! Are uri ati Ester xub'ij:

⁴ —We kumaj awach Nim laj Winaq, kintz'onoj jun utzil chawe chi chatupon wo'or che jun wa'im chi inyijb'am kojb'al a'ij xaq kak'am b'i ma Amán awu'. Are uri i ajawinel xuya i taqaniki:

⁵ —Chib'isoj utzukuxik ma Amán, chyataj ni urayijb'al ati ajawinel Ester. Keje uri ile chi i ajawinel xaq ma Amán xe'e pa wa'im chi uyijb'am ati ajawinel.

⁶ Are ketijin chwa'im, i ajawinel xub'ij che ati Ester: —¡Chatz'onoj chwe wach taq kawaj, man yin kinya ni chawe, tupu katz'onoj nik'aj che inrajawinik!

⁷ Ati Ester xub'ij che: —Xwi kwaj utz'onoxik iri chawe:

⁸ Nim laj winaq, we k'ax kinana'o, we kaya chwe wach kwaj xaq we kaya chwe wach kintz'onoj, chatk'un uri chweq, junam ru' ma Amán che jun chik wa'im chi inch'ob'om u'anik kojb'al a'ij. Man keje ile kin-an uri ronojel ni'pa i katz'onoj chwe.

Uyijb'axik i k'ijib'al ipa kjitz'ax wi ma Mardoqueo rumal ma Amán

⁹ Ma Amán lik kkikotik are xel chila che wa'im, xwiri are xril ma Mardoqueo chi kul chwach uchija re i nim laj rachoch i ajawinel, lik xmi' roywal man ma Mardoqueo le ktak'i taj xaq mitene kuyin jub'i' rib' are xik'aw ire.

¹⁰ Xwiri che i or le, xuk'ut taj we ktitat upam che ma Mardoqueo; xwiri are xupon chi rachoch xutaq kisik'ixik i ramiy xaq ati Zeres chi rixoqil,

¹¹ xulap chke chi lik k'i ub'eyomal, k'i rak'al je olik, xaq xulapo wach taq rilik x-an rumal i ajawinel chkixol i rajpatanib' xaq ni'pa ketow i ajawinel, chi xaq xya' jun uk'ijib'al che chi lik atz u'ij chkiwach konojel ike le.

¹² Xaq xub'ij chik: —Xwi ta la ile, lik xwi yin xinusik'ij ati ajawinel Ester che i wa'im kojb'al u'ij i ajawinel; xaq xub'ij chik chwe chi kin-e chik chweq che jun wa'im chi kuyijb'a chik che i ajawinel.

¹³ Xwiri, we k'a kwil uwach ma Mardoqueo, aj Israel, chi kul chila xol uchija re i nim laj rachoch i ajawinel, ronojel ile lik nti o kwaj che.

¹⁴ Are uri ati Zeres chi rixoqil xaq konojel i ramiy, xkib'ij che: —Chataqa uyijb'axik jun jitz'b'al re chi kaya kajlajuj xik'ab' unajtil rij, te'uri chweq we' tan, chab'ija che i ajawinel chi chkitzayb'a an ma Mardoqueo che. Keje ile are kat-e pa wa'im ru' i ajawinel lik nti katk'achir che —xecha. I ch'ob'onik le lik utz xuta ma Amán, rumali chi xutaq uyijb'axik i jitz'b'al.