Ester 4 - Wuj Pa K'ubultzij

Kib'isonik aj Israel rumal i atb'al tzij

¹ I ma Mardoqueo are xretamaj ronojel ni'pa ktijin uk'ulmaxik, xuraqch'ij u'u' k'utb'al re chi o pa b'is, xukoj u'u as, xukoj chaj puwi ujolom, xaq ru' jun nim laj b'is puk'ux, xujeq sik'inik pa taq b'e.

² Keje x-on ile k'a xupon pa okb'al che i nim laj rachoch i ajawinel, xwiri xok tu b'ik, man mijun kya' che kok b'i ru' u'u' keje ile.

³ Xaq keje ile xki'an pa jalajuj taq tinimit ipa xupon wi i taqanik re i ajawinel, rumali xpe jun nim laj k'achirik chkixol aj Israel, konojel xkisaqij kib'is man xkimayij utijawik kiwa, xe'o'ik xaq xesik'inik, je k'i chke xekotz'i puwi i chaj xaq xkikoj ki'u' as.

Kito'ik i winaq rumal ati Ester

⁴ I rajke'elab' ati Ester xaq i achiyab' chi elsam kikowil chi kechajiwik, xkib'ij che wach ktijin uk'ulmaxik. Are uri ati Ester chi ajawinel, xpe jun nim laj ub'is xaq xutaq b'i u'u' ma Mardoqueo man kresaj i as chi ukojom, xwiri ire xraj taj.

⁵ Are uri ati Ester, chi ati ajawinel, xusik'ij ma Hatac, chi aj-atzil chke i chajinel re i ajawinel, xutaq b'i chrilik ma Mardoqueo chutz'onoxik che wach taq ktijin uk'ulmaxik xaq b'uchak ktijin chu'anik ronojel ile.

⁶ Are uri ma Hatac x-e pa lapanik ru' ma Mardoqueo chi o chila che i k'ijib'al nim re i tinimit, chi o chwach i uchija re i nim laj rachoch i ajawinel;

⁷ i ma Mardoqueo xulap che wach taq ktijin uk'ulmaxik xaq xub'ij che chi ma Amán usujum uya'ik k'iyal saq-o'oj chila ipa o wi ub'eyomal i ajawinel, puk'exel uchupik kiwach konojel aj Israel.

⁸ Xaq xujach jun uk'exwach wuj che re i taqanik chi xya' retamaxik pa tinimit Susa ipa xya' wi retamaxik chi kchup ni uwach i tinimit, man kuya che ati Ester, man keje ile kretamaj ni ronojel ni'pa ktijin uk'ulmaxik. Xaq ma Mardoqueo le xutz'onoj utzil che ati Ester chi kelapan ru' i ajawinel xaq chutz'onoj utzil che chi keuto uwinaq.

⁹ Are uri ma Hatac xtzalij chik chila ipa o wi ati Ester, xulap che wach xb'ix che rumal ma Mardoqueo.

¹⁰ Are uri ati Ester xutaq chub'i ma Hatac chub'ixkil iri che ma Mardoqueo:

¹¹ “Konojel ni'pa kki'an kipatan chrij i ajawinel xaq konojel i winaq chi je o pa jalajuj taq tinimit ipa ku'at wi tzij ire, keta'am chi o jun atb'al tzij chi kusaqij i kamik che jun achi xaq che jun ixoq chi to' kok b'i pa ja chila pa nim laj rachoch i ajawinel chi kerila taq i sik'tal ti rumal ire, i winaq kkuytaj ni umak, kelsax ti uk'aslemal we i ajawinel kuyak an uch'amiy an-o'oj sik'b'al re i winaq le. Xwiri yin, jun ik' iri chi in sik'tal ti rumal i ajawinel.”

¹² I ma Mardoqueo are xuta wach xb'ix che rumal ati Ester,

¹³ are uri ire xutaq chub'i ub'ixkil che: Mach'ob' taq yet, we rumal at o chila pa nim laj rachoch i ajawinel, moq xwi yet katk'asi kan chke konojel aj Israel.

¹⁴ We to' kaya kan keje ile wo'or, we nti kab'ij, i tol ke aj Israel kk'un ni uri che jun chik tinimit, xwiri yet xaq i ralk'uwal aqajaw kekam na. Qeta'am teneri moqxa yet o pa'ab' chi kojato wo'or che i k'ax chi oj o wi ri man yet at ati ajawinel.

¹⁵ Are uri ati Ester xutaq chub'i ub'ixkil i tziji che ma Mardoqueo:

¹⁶ “Jat xaq chamolo kichi' konojel aj Israel chi je o Susa, mkitij kiwa xaq mkitu' kiya' che oxib' ij xaq che oxib' a'ab' chutz'onoxik che i Dios pinwi yin. Yin xaq i wajke'elab' xaq keje ni ile kqa'ano, chrijil chik ile, kin-e ni chrilik i ajawinel, tupu are ti kub'ij i atb'al tzij ile. We kinkamsaxik, chinkamsax ni uri.”

¹⁷ Keje uri ile chi ma Mardoqueo x-e pa tinimit xaq xu'an ronojel ni'pa xb'ix che rumal ati Ester.