Ester 2 - Wuj Pa K'ubultzij

U'ulik ati Ester re kkanaj pa ajawinel

¹ X-on panoq are ik'awnaq chik roywal i ajawinel ma Asuero, xk'un chuk'ux wach x-on ati Vasti xaq wach taq i taqanik chi xwalij chrij.

² Are uri i ajpatanib' re u'atb'al tzij chi o wi xkib'ij che: —Rajwaxik chi ketzukux apoj altom, chi nti achiyab' kiminom kib' ku' xaq lik je chomiq re i ajawinel.

³ I ajawinel cheutzukuj ni achiyab' pa jalajuj taq tinimit chi kuya chkiqul kik'amik b'i altom pa nim laj rachoch ire, chi o chila pa tinimit Susa. Are keupon chila Susa i altom le ke'il ni rumal ma Hegai chi elsam ukowil che, ire le kul uk'ux i ajawinel che xaq chajinel ke ixoqib'. I ma Hegai le xaq xya' chuqul chi kerilo xaq keuyijb'a anb'al chomiq chke.

⁴ I ali chi lik mas qus kril i ajawinel, are ire uri kch'ik rij re kkanaj pa ati ajawinel puk'exel ati Vasti. I ch'ob'onik le lik utz xuta i ajawinel, rumali chi lik keje ile xki'an che.

⁵ Chila pa tinimit Susa, jeqel jun achi aj Israel chi ma Mardoqueo ub'i, chi uk'ojol ma Jair, chi umuq uxikin ma Simei xaq re ma Cis, chi re utzob'ajil ma Benjamín.

⁶ Ire le are jun chke k'iyal winaq chi xe'elsax b'i pa Jerusalén rumal i ajawinel ma Nabucodonosor xek'am b'i pa Babilonia junam ru' ma Jeconías chi ajawinel pa Judá.

⁷ Ma Mardoqueo o jun ranab' pa tzij, chi je kamnaq chik uqajaw uchuch, are xekam uqajaw uchuch i ali le, ire xu'an umi'al che. I ali le al Hadasa ub'i xaq kb'ix Ester che, i ali le lik chom xaq lik b'irir laj ali.

⁸ Are xkiya retamaxik i atb'al tzij re i ajawinel chi lik k'i altom xtaq kitzukuxik chi kmol kichi' pa nim laj rachoch i ajawinel chila pa tinimit Susa, chi xaq kechajix rumal ma Hegai, chi chajinel ke ixoqib', chkixol ike le o al Ester.

⁹ I ali le lik xumaj uwach ma Hegai, rumali chi lik utz rilik xu'ano, keje uri ile chi ma Hegai xutaq uya'ik kunb'al che anb'al chom che uch'akul xaq lik xuya i utz laj taq ti'b'alil che; xaq xukoj wuqub' ajke'elab' chi je o chila pa nim laj rachoch i ajawinel, junam ku' i keilawik le xeuya chupam jun utz laj k'ijib'al chupam i nim laj rachoch i ajawinel chi ke ixoqib'.

¹⁰ Al Ester le, lik nti xub'ij chrij pachike taq alk'uwal petnaq wi, man b'ital che rumal ma Mardoqueo chi kub'ij taj.

¹¹ I ma Mardoqueo le, ij ij kmalkat chwa taq ja re i nim laj rachoch i ajawinel ke ixoqib', ilb'al re we utz uwach al Ester xaq we utz rilik kki'an che.

¹² Konojel i altom le, kab'lajuj ik' xeyijb'axik man keje ile chom ketzunik, che i nab'e waqib' ik', kkib'ak kich'akul chupam aceite re i mirra, xaq i waqib' ik' chik kkib'ak kich'akul chupam i kunb'al muy chi kkikoj ixoqib'. Are xeutzin chu'anik chom che kib', i altom le jujunal ke'e chwach i ajawinel ma Asuero are kuriq i ij chi ch'iktalik,

¹³ xaq kya' chke chi kkik'am b'i i wiqb'al kib' chila pa nim laj ja ke i ixoqib' k'a pa nim laj ja re i ajawinel, lik ronojel ni'pa i kkitz'onoj.

¹⁴ I altom le are kuriq i ij chi ch'iktalik, jujunal ke'e chwach i ajawinel kqaj i ij, are ksaqir chukab' ij ke'e che jun chik upam i nim laj ja ke ixoqib' chi o chuqul ma Saasgaz, chi elsam ukowil, xaq are ire keuchajij i qas ti mer je rixoqil i ajawinel; chrijil chik ile, i altom le keupon ti chik chwach i ajawinel, xwi i jun chi lik qus xril i ajawinel, are ile kutaq chik uk'amik.

¹⁵ I al Ester, chi umi'al ma Abihail, chi rikan ma Mardoqueo, are xuriq i ij chi kuk'utu rib' chwach i ajawinel, xwi xuk'am b'i rajwaxik chi xb'ix che rumal ma Hegai, chi elsam ukowil che xaq are ire le chajinel ke ixoqib'. I al Ester le xtiki chuch'akik chi k'ax xna' kumal i winaq chi keilawik.

¹⁶ I al Ester xk'am b'i pa nim laj rachoch i ajawinel ma Asuero, man kuk'utu rib' chwach che i lajuj ik', chi xaq Tebet ub'i, are o chik uwuq junab' che rajawinik.

¹⁷ I ma Asuero le lik x-e uk'ux che al Ester, chi mijuyak una'om ile ru' jun chik ixoq, rumali chi al Ester le, lik k'ax xna' rumal ma Asuero, xaq lik qus xril chkiwach jub'an chik altom chi rilom chik kiwach, are uri xukoj i koron che ujolom xaq xuya kan pa ati ajawinel puk'exel ati Vasti.

¹⁸ Te'uri xu'an jun nim laj nima'ij che ati Ester, che i nima'ij le xeusik'ij konojel ni'pa rajpatanib' xaq konojel ni'pa keton chu'atik tzij, xuqajsaj li alkawal pa taq tinimit xaq xujach k'iyal taq sipon, pacha kmajawik chi k-on jun utz laj ajawinel.

Ma Mardoqueo xunab'ej chi ktzukux ukamsaxik i ajawinel

¹⁹ Che taq i ij chi kek'am b'i altom che jun chik upam ja chila pa nim laj rachoch i ajawinel ke ixoqib', ma Mardoqueo kul xol uchija che i nim laj rachoch i ajawinel.

²⁰ Lik pacha upixb'axik x-ani rumal ma Mardoqueo, ati Ester usaqim taj ipa kpe wi xaq pachike taq alk'uwal kpe wi, ire ktijin chu'anik chrij pacha b'ital che rumal ma Mardoqueo, are o te'eq chuqul rilik.

²¹ Tz'aqat kul ma Mardoqueo xol uchija re i nim laj rachoch i ajawinel, xuta chi ma Bigtán xaq ma Teres, je keb' aj-atzil chke i kechajiw i okb'al che i nim laj rachoch i ajawinel, ketijin che i lapanik. Ike lik petnaq koywal xaq ketijin chuch'ob'ik wach ukamsaxik i ajawinel ma Asuero kki'ano.

²² Ma Mardoqueo are xuta ile chi kkich'ob' ukamsaxik i ajawinel, xulap che ati Ester, chi ati ajawinel; ire le xub'ij che ma Asuero chi ajawinel, wach taq xuta ma Mardoqueo.

²³ I tzij le xk'ami upam, are xketamaj chi ile lik qatzij, i keb' aj-atzil le x-at tzij pkiwi chi kejitz'axik. I anik le, lik chwach i ajawinel, xtz'ib'ax chupam i wuj, ipa tz'ib'tal wi ronojel ni'pa kk'ulmax pa tinimit.