Ester 1 - Wuj Pa K'ubultzij

U'anik jun nima'ij rumal ma Asuero chi ajawinel

¹ I anoji x-ani che taq i ij are krajawin ma Asuero pkiwi wuqub' waqwinaq (127) tinimit, chi kjeqan b'i che i nim laj tinimit India, kupon k'a che i nim laj tinimit Etiopía,

² i k'ijib'al ipa ku'at wi tzij are i tinimit Susa.

³ Che urox junab' rajawinik ma Asuero, chi ajawinel, xu'an jun nima'ij chke konojel ajpatanib', chke i ketow aj-atol tzij, chke aj-atzil chke achiyab' chi je yij che i ch'oj aj Persia, aj Media, chke aj-ok'al utzam jalajuj taq tinimit xaq aj-atzil chupam i tinimit,

⁴ k'utb'al re chke chi lik nim rajawinik xaq nim laj ucho'ab' u'atb'al tzij. I nima'ij le nik'aj junab' xuch'ijo,

⁵ chrijil chik ile, i ajawinel le xutaq uyijb'axik jun chik nima'ij chwaja ipa o wi i tikb'al kotz'ij chwach i nim laj rachoch i ajawinel, chi wuqub' ij xuch'ijo. Konojel ni'pa je jeqel chila pa tinimit Susa, kjeqan ku' i nimaq ki'ij xaq ni'pa i nimaq ti ki'ij, xesik'ix che i nima'ij le.

⁶ I uwaja le lik wiqtal ru' kortin saq xaq xar chi paqal rajil, ximtal upam ru' jalajuj taq yut'b'al lino chi púrpura ktzunik, chi ik'awsam chuxol i sotsaq ch'ich' saq-o'oj xaq tzayb'am che raqan ja chi re mármol. Xaq o kub'ib'al chi lik utz uxlanem chupam chi antal che an-o'oj xaq saq-o'oj, i uwach ulew kikojom ab'aj chi lik paqal rajil are i nácar xaq i mármol saq xaq eq.

⁷ Ronojel ni'pa i tu'ik re xtu' chupam taq yab'al an-o'oj chi jalajuj taq u'anik, xya' k'iyal uwa'al uva muqb'am man i ajawinel lik utz uk'ux che i nima'ij le.

⁸ Xwiri, i ajawinel le xutaq ub'ixkil chke i aj-atzil ke ajchakib' pa nim laj rachoch ire, chi kki'an ti pen chke i winaq chutu'ik uwa'al uva muqb'am, xwi chkitu'u ni'pa kkaj utu'ik.

⁹ Xaq keje xu'an ati Vasti, chi ati ajawinel, xu'an jun nima'ij chke konojel kixoqil achiyab' chi xeupon chila pa nim laj rachoch i ajawinel ma Asuero.

¹⁰ Che uwuq ij re i nima'ij, i ajawinel lik kkikotik rumal utu'ik i uwa'al uva muqb'am, xutaq b'i ma Mehumán, ma Bizta, ma Harbona, ma Bigta, ma Abagta, ma Zetar xaq ma Carcas, wuqub' achiyab' chi xelsax kikowil chke,

¹¹ man kkik'am b'i ati Vasti chi ukojom i koron chi lik chom, chila ipa ktijin wi i ajawinel chu'anik i nima'ij, man keje ile konojel i winaq chi nimaq kipatan, xaq i winaq re i tinimit, kkil ni uchomal, man saq laj tzij, chi lik chom laj ixoq.

¹² Xwiri ati ajawinel le, xuqel i taqanik chi xuya i ajawinel chke achiyab' chi elsam kikowil chke. Rumali chi i ajawinel lik xpe jun nim laj roywal.

¹³ Xutz'onoj uno'oj chke ni'pa o keta'am che i atb'al tzij, man lik keje ile k-anik chi ni'pa kuk'ulmaj i ajawinel kb'ix chke ni'pa lik o keta'am che i atb'al tzij xaq wach taq i kmajawik chi k-an che.

¹⁴ Chkixol ni'pa ike le, are i mas k'ax kena' rumal i ajawinel, je are iri: Ma Carsena, ma Setar, ma Admata, ma Tarsis, ma Meres, ma Marsena xaq ma Memucán, wuqub' achiyab' chi lik o kipatan aj Persia xaq aj Media, ike le je o chkixol ni'pa kepixb'aw i ajawinel xaq lik nimaq kipatan ru' i atol tzij.

¹⁵ I ajawinel xutz'onoj chke: —Chrij pacha kub'ij i atb'al tzij, ¿Wach k-ani che ati Vasti, chi ati ajawinel, man xuqel i taqanik chi xinya b'i chke intaqon?

¹⁶ Lik chkiwach konojel ni'pa kepixb'aw ajawinel, ma Memucán xub'ij che i ajawinel: —Ati Vasti, chi ati ajawinel, xwi ti xuqajsaj a'ij yet nim laj winaq, xaq xuqajsaj ki'ij konojel i aj-atol tzij xaq konojel i tinimit ipa ku'at wi tzij i ajawinel ma Asuero.

¹⁷ I u'anom ati ajawinel le, kketamaj ni konojel ixoqib', xaq rumal ile, wo'or ixoqib' kekojon ti chik chke i kachijil, man kkib'ij na: “I ajawinel ma Asuero, xutaq uk'amik ati Vasti chi ati ajawinel, xwiri ire xraj ti enam.”

¹⁸ I kixoqil konojel ni'pa o kipatan pa Persia xaq pa Media, are kketamaj wach xu'an ati ajawinel, ike kelapan chrij ile wo'or ku' i kachijil, xaq kki'an ni ch'oj puwi.

¹⁹ Rumali we kumaj awach yet, nim laj winaq, chaya ni retamaxik i taqanik xaq chtz'ib'ax ni chwach i wuj ipa tz'ib'tal wi ki'atb'al tzij aj Persia xaq aj Media, man keje ile, kelsax taj: “Ati Vasti chi ajawinel, lik mijuyak kupon chik chwach i ajawinel.” Xaq upatan chi ajawinel, chya' ni che jun chik ixoq chi lik kmajaw che.

²⁰ I taqanik chi xuya i ajawinel, rajwaxik chi kya' ni retamaxik tupu rajawinik lik nim, man keje ile konojel ixoqib' kekojon ni chke i kachijil, nti k-ono we o upatan xaq we ntaj.

²¹ I uch'ob'onik ma Memucán lik xumaj uwach i ajawinel xaq konojel ni'pa kepixb'awik, keje uri ile, chi ajawinel xu'an keje ile.

²² Xutaq b'i wuj pa jalajuj taq tinimit chi ku'at tzij pkiwi, tz'ib'tal pkich'ab'al chrij pacha kech'aw i jalajuj taq tinimit le. Tz'ib'tal b'i taqanik chupam chi ronojel k-antaj na chrij pacha i taqanik chi kkiya i achiyab' chi taq kachoch.