Esdras 8 - Wuj Pa K'ubultzij

Kib'i i winaq chi xetzalij loq

¹ Iri are kib'i i aj-atzil ke i alk'uwal, chrij pacha kitz'ib'am chkijujunal, chi xe'el li pa Babilonia junam ru' ma Esdras are o ma Artajerjes pa ajawinel

^2-3 Ma Gersón, chi jun chke umuq uxikin ma Finees; ma Daniel, chi jun chke umuq uxikin ma Itamar; ma Hatús, chi uk'ojol ma Secanías, chi jun chke umuq uxikin ma David; ma Zacarías, chi jun chke umuq uxikin ma Paros, achnimam kumal lajuj wuqwinaq (150) achiyab' chi tz'ib'am kib'i.

⁴ Ma Elioenai, chi uk'ojol ma Zacarías, chi jun chke umuq uxikin ma Pahat-moab, achnimam kumal lajujwinaq (200) achiyab';

⁵ ma Secanías, chi uk'ojol ma Jahaziel, chi jun chke umuq uxikin ma Zatu, achnimam kumal jo'lajujwinaq (300) achiyab';

⁶ ma Ebed, chi uk'ojol ma Jonatán, chi je umuq uxikin ma Adín, achnimam kumal lajuj kawinaq (50) achiyab';

⁷ ma Jesaías, chi uk'ojol ma Atalías, chi jun chke umuq uxikin ma Elam, achnimam kumal lajuj oxwinaq (70) achiyab';

⁸ ma Zebadías, chi uk'ojol ma Micael, chi jun chke umuq uxikin ma Sefatías, achnimam kumal kajwinaq (80) achiyab';

⁹ ma Obadías, chi uk'ojol ma Jehiel, chi jun chke umuq uxikin ma Joab, achnimam kumal wajxaqlajuj lajujwinaq (218) achiyab';

¹⁰ ma Selomit, chi uk'ojol ma Josifías, chi jun chke umuq uxikin ma Bani, achnimam kumal wajxaqwinaq (160) achiyab';

¹¹ ma Zacarías, chi uk'ojol ma Bebai, chi jun chke umuq uxikin ma Bebai, achnimam kumal wajxaqib' juwinaq (28) achiyab';

¹² ma Johanán, chi uk'ojol ma Hacatán, chi jun chke umuq uxikin ma Azgad, achnimam kumal lajuj jo'winaq (110) achiyab';

¹³ ma Elifelet, ma Jeiel xaq ma Semaías, chi je k'isb'al taq umuq uxikin ma Adonicam, je achnimam kumal oxwinaq (60) achiyab', ike le pen xetzalij b'i pa Jerusalén.

¹⁴ Ma Utai xaq ma Zabud, chi je umuq uxikin ma Bigvai, je achnimam kumal lajuj oxwinaq (70) achiyab'.

I je ajpatanib' prachoch i Dios

¹⁵ Yin in ma Esdras, xinmol kichi' konojel ike chutzal ik'awb'al ya chi kupon k'a che i raqana Ahava, chila xojk'iji wi oxib' ij. Are xwik'awsaj kib'i konojel i winaq xaq i ajsujul sipon, mijun aj Leví xinriq chkixol.

¹⁶ Rumali xeintaq b'i ma Eliezer, ma Ariel, ma Semaías, ma Elnatán, ma Jarib, ma Elnatán, ma Natán, ma Zacarías, ma Mesulam chi lik nimaq kopis, xaq xeintaq b'i i tijonelab' ma Joiarib xaq ma Elnatán

¹⁷ ru' i taqanik chi kkisolij ma Iddo, chi aj-atzil re i k'ijib'al Casifia, xinb'ij chke ronojel ni'pa kkib'ij che ma Iddo xaq chke i rachi'il chi kki'an kipatan prachoch i Dios chila Casifia, man kkik'am li winaq chqe chi kojkito prachoch i qa-Dios.

¹⁸ Mantiox che i Dios man xkik'am li ma Serebías chqe, chi are jun achi chi lik reta'am wach ku'ano, chi umuq uxikin ma Mahli aj Leví, junam ku' i rak'al xaq i ratz ucha', je wajxaqlajuj konojel.

¹⁹ Xwi ta la ile, xaq xkik'am li ma Hasabías xaq ma Jesaías, chi umuq uxikin ma Merari, junam ku' i rak'al xaq i ratz ucha' je juwinaq konojel.

²⁰ I ajpatanib' prachoch i Dios chi je kojom rumal ma David xaq i je aj-ok'al utzam ke aj Leví je julajujwinaq (220) konojel ike le lik xtz'ib'ax kib'i.

²¹ Chrijil chik ile xintaq ub'ixkil chi kkimayij wa'im, rumal lapanik ru' i Dios chila naqaj che i raqana Ahava, man keje ile kqetamaj wach taq xojmaktaj wi chwach i qa-Dios xaq chutz'onoxik che chi utz qak'amik b'i yoj ku'ano qalk'uwal xaq ub'itaq qe.

²² Xink'ix chutz'onoxik che i ajawinel chi kuya b'i achiyab' je yij che i ch'oj ajrij taq kaway chqe man kojkichajij pa taq b'e chkiwach i ajch'oj chqij, man qab'im che i ajawinel chi i Dios keuchajij konojel ni'pa kkitzukuj Ire, xwiri xaq kpe roywal chke konojel ni'pa kko'taj kanoq.

²³ Rumali chi xqamayij wa'im chutz'onoxik che i Dios xaq k'iyal mul xqatz'onoj utzil che Ire rumal ni'pa kojtijin chuk'ulmaxik, are uri i Dios lik xojuta.

²⁴ Te'uri xein-ul kab'lajuj ajk'amol utzam ke ajsujul sipon chi are kib'i iri: Ma Serebías, ma Hasabías xaq lajuj kachi'il ike,

²⁵ xinpajo xaq xinjach i an-o'oj, saq-o'oj xaq ronojel i chapanb'al re i rachoch i qa-Dios chi xusipaj i ajawinel, i je rajpixb'anel, i je rajpatan xaq konojel aj Israel chi je o chila.

²⁶ Xinpajo xaq xinjach kab'lajuj oxwinaq jumo' (472) tintal saq-o'oj, jo'winaq (100) jalajuj taq chapanb'al saq-o'oj xaq kab'lajuj oxwinaq (72) tintal an-o'oj;

²⁷ xwi ta la ile, xaq juwinaq laq an-o'oj chi o wuqlajuj pexu che ralil xaq keb' chapanb'al chi kojom anch'ich' chrij chi lik chom u'anik antal che, lik pacha taq i an-o'oj ktzunik.

²⁸ Te'uri xinb'ij chke: “Yix ix jachtal pu'ab' i Ajwal, xaq keje i jalajuj taq chapanb'al saq-o'oj xaq i an-o'oj re i Ajwal, chi ki-Dios qaqajaw qachuch.

²⁹ Lik chichajij xaq chik'olo k'a kipaj ni chkiwach i aj-atzil ke ajsujul sipon, chkiwach aj Leví xaq chkiwach i aj-atzil ke alk'uwal aj Israel chila pa taq upam ja re i rachoch i Dios pa Jerusalén.”

³⁰ Are uri i ajsujul sipon xaq aj Leví xkik'am i saq-o'oj, an-o'oj xaq i jalajuj taq chapanb'al chi xpajik, xkik'am b'i prachoch i qa-Dios chila Jerusalén.

³¹ Che i ij kab'lajuj re i nab'e ik' xoj-el chila che i raqana Ahava, xoj-e pa Jerusalén. I qa-Dios xojuto pki'ab' i ajch'oj chqij xaq pki'ab' ili'omab' pa taq b'e.

³² Are xojupon pa Jerusalén xojuxlan oxib' ij chila.

³³ Che ukaj ij xpaj i saq-o'oj, an-o'oj xaq i jalajuj taq chapanb'al chila prachoch i Dios, ronojel xjach che ma Meremot chi ajsujul sipon, chi uk'ojol ma Urías. Achnimam kumal ma Eleazar chi uk'ojol ma Finees, xaq ma Jozabad chi uk'ojol ma Josué, xaq ma Noadías chi uk'ojol ma Binúi, chi je aj Leví.

³⁴ Che i ij le xpajik, x-ajlax ronojel xaq xtz'ib'ax ronojel ni'pa xmoltajik.

³⁵ Chrijil chik ile, konojel ni'pa xe'el li pa Babilonia, xkijach ni'pa kik'amom loq re porom sipon chwach i Dios ke aj Israel pkib'i aj Israel, xkijach i kab'lajuj ral taq torib', waqlajuj kajwinaq (96) mama'ib' chij, wuqlajuj oxwinaq (77) ral taq mama'ib' chij xaq kab'lajuj chab'at, ronojel ile sipon rumal i mak. Ronojel xporox chwach i Ajwal kojb'al u'ij.

³⁶ Te'uri xkijach i wuj re utaqanik i ajawinel chke je aj-ok'al utzam i tinimit xaq chke i aj-ok'al utzam i jalajuj taq tinimit chi je o pusuk' i qajb'al ij che i raqana Éufrates, ike le xkiya kiwach chkito'ik i winaq xaq i rachoch i Dios.