Esdras 6 - Wuj Pa K'ubultzij

¹ Are uri i ajawinel ma Darío xutaq utzukuxik chupam i k'olb'al wuj ipa kk'ol wi i wuj chi lik nimaq uchak chila Babilonia

² xaq pa nim laj ja re i ajawinel re i tinimit Acmeta, chi are i nim laj tinimit re ulew Media, chila xriqtaj wi jun wuj chi tz'ib'tal iri chupam:

³ Che i nab'e junab' rajawinik, ma Ciro xutaq ub'ixkil iri: “Chrij i chak re i rachoch i Dios chila Jerusalén. Choksax ni ukub'ib'al xaq chyak chik i rachoch i Dios man keje ile ksujux ni porom sipon chila. Kya' ni waqlajuj xik'ab' che raqan xaq waqlajuj xik'ab' che uwach

⁴ xwi ta la ile, xaq choksax oxib' cholaj nimaq taq ab'aj xaq jun cholaj che' k'ak'. Ru' i mer chi o pu'ab' i ajawinel ktoj ronojel ile.

⁵ Ronojel ni'pa i chapanb'al chi an-o'oj xaq saq-o'oj re i rachoch i Dios, chi xrel-aj li ma Nabucodonosor chila Jerusalén, chi xuk'am li pa Babilonia, chejach ni chik chila pa Jerusalén xaq chya' ni chik prachoch i Dios chila ipa xk'am wi. Keje ile kub'ij i wuj.”

⁶ Are uri i ajawinel ma Darío xuya i taqaniki che ma Tatnai, chi aj-ok'al utzam i tinimit chi o pusuk' i qajb'al ij che i raqana Éufrates, xaq che ma Setar-boznai junam ku' rachi'il chi aj chila che i tinimit le. Chixel chila pa Jerusalén

⁷ xaq chiya che i aj-ok'al utzam ke aj Judío xaq ni'pa i rachi'il chi kkiyak chik i rachoch i Dios chila puk'ijib'al.

⁸ Iri are intaqanik tob'al ke aj-ok'al utzam ke aj Judío, man kkiyak tan chik i rachoch i Dios: Ru' i alkawal chi kumol i ajawinel chke i winaq chi je o pusuk' i qajb'al ij che i raqana Éufrates, su' ktoj ni ronojel ni'pa rajwaxik chi ktojik che i ij chi ch'iktalik, man keje ile kch'aqi ti chak.

⁹ Lik ij ij xaq lik kramtaj ti ujachik chke i je ajsujul sipon chila Jerusalén, chrij pacha kkib'ij ike ronojel ni'pa kajwax chke, nti k-ono we ral taq me', mama'ib' chij, i ral taq chij, man keporox chwach i Dios aj chikaj; xaq utz we trigo, atz'am, uwa'al uva muqb'am xaq i aceite,

¹⁰ man keje ile kkisujuj porom sipon chwach i Dios aj chikaj chi lik kumaj uwach i Ajwal, xaq kkitz'onoj che i Dios puwi uk'aslemal i ajawinel xaq pkiwi i rak'al.

¹¹ Xaq kinb'ij chi we o jun winaq kuqel i taqaniki kelsax ni uri jun et che i rachoch, ktik pulew k-ani jutzutz che utzam chikaj, te'uri kk'aq li puwi xaq kwulijsax ni ronojel rachoch che.

¹² ¡Xaq i Dios chi x-uluw i tinimit Jerusalén ipa kk'iji wi ub'i, chuchupu ni uwach xab'i chi ajawinelil xaq xab'i chi tinimital chi kumin taq rib' chu'atixik xaq chu'anik ch'oj chrij i rachoch i Ajwal chi o pa Jerusalén! Yin in ma Darío xinyaw i taqaniki. Ch-antaj na chrij pacha xinb'ij.

Ujeqik tan chik xaq uk'isik i jalajuj taq chak

¹³ Are uri ma Tatnai chi aj-ok'al utzam i tinimit chi o pusuk' i qajb'al ij che i raqana Éufrates, xaq ma Setar-boznai junam ku' i rachi'il xki'ano chrij pacha i taqanik chi xuya ma Darío chi ajawinel.

¹⁴ Keje uri ile chi aj-atzil ke aj Judío xkijeq chik i chak chrij pacha xkib'ij i profeta, chi ma Hageo xaq ma Zacarías, chi uk'ojol ma Iddo. I rachoch i Dios xutzinik chrij pacha utaqom ub'ixkil i Dios ke aj Israel, xaq chrij pacha utaqom ub'ixkil ma Ciro, ma Darío xaq ma Artajerjes chi je ajawinelab' re i tinimit Persia.

¹⁵ I rachoch i Dios xutzin che oxib' ij re i ik' Adar, che uwaq junab' rajawinik ma Darío pa tinimit Persia.

¹⁶ I aj Israel, i je ajsujul sipon, i aj Leví xaq i jub'an chik, chi xe'el li chila Babilonia, lik ru' jun nim laj kikotemal xkijach i ja pu'ab' i Dios kojb'al re u'ij.

¹⁷ Che i nima'ij le xkiporoj jo'winaq (100) ral taq me' re kisipon, lajujwinaq (200) mama'ib' chij, jumo' (400) ral taq chij xaq kab'lajuj chab'at, jujun ke i jutaq tzob'aj aj Israel, ile are jub'an sipon rumal i kimak konojel aj Israel.

¹⁸ Te'uri i je ajsujul sipon chrij pacha u'oril xya' kichak, xaq aj Leví xeya' pkik'ijib'al kojb'al re u'ij i Dios chila Jerusalén, chrij pacha tz'ib'tal chupam uwuj ma Moisés.

¹⁹ Xaq konojel ni'pa xetzalij chaloq chi je elsam te b'i pa cho'ab' chwach kulew, i xki'an i nima'ij re Pascua che i ij kajlajuj re i nab'e ik'.

²⁰ I je ajsujul sipon xaq i aj Leví kijos-im chik kib', rumali chi ke'eloq konojel lik je ch'am chik chwach i Dios. Are uri xkisujuj kiporom sipon re i nima'ij Pascua kumal konojel i winaq chi xe'el li pa Babilonia, kumal i kachi'il chi je ajsujul sipon xaq kumal ike.

²¹ Konojel aj Israel chi xetzalij chaloq man je elsam te b'i pa cho'ab' chwach kulew xkitij kiwa che i nima'ij Pascua, junam ku' konojel ni'pa xkijek' kib' chu'anik i ch'am taj, chi kki'an jub'an chik i nimaq taq tinimit chi kkikoj ti u'ij i Dios, lik xki'an junam che kib' chukojik u'ij i Ajwal, chi ki-Dios aj Israel.

²² Lik ru' jun nim laj kikotemal xkich'ij wuqub' ij chu'anik i nima'ij re i wa re trigo chi nti kunb'al ru', man i Ajwal xuya jun nim laj kikotemal chke xaq xu'an che i ajawinel re i tinimit Persia chi xeuto chu'anik i rachoch i Dios, chi ki-Dios aj Israel.