Esdras 5 - Wuj Pa K'ubultzij

Ujeqik tan chik uyakik i rachoch i Dios

¹ I profeta chi ma Hageo xaq ma Zacarías, chi uk'ojol ma Iddo, xkib'ij chke aj Judío xaq chke aj Jerusalén wach xya' retamaxik chke rumal i Ajwal chi ki-Dios aj Israel.

² Are uri ma Zorobabel, chi uk'ojol ma Salatiel, xaq ma Jesúa, chi uk'ojol ma Josadac, xe'ok chik chuyakik i rachoch i Dios pa Jerusalén xaq i je profeta je o ku' chkito'ik.

^3-4 Xwiri ma Tatnai chi aj-ok'al utzam i tinimit chi o pusuk' i qajb'al ij che i raqana Éufrates, xaq ma Setar-boznai junam ku' i rachi'il, xe'e chub'ixkil chke: “¿Pachin xuya i taqanik chiwe chi kiyak tan chik i rachoch i Diosi xaq kich'uq rij ru' che'? ¿Wach kib'i i winaq chi ketijin tan chik chuyakik i rachoch i Dios?”

⁵ Xwiri i Dios lik keuto i aj-ok'al utzam i chak chi je aj Judío, rumali ike xkimayij ti u'anik i chak k'a xkitaq nu b'i jun wuj che ma Darío xaq k'a xkoy-ej na wach xb'ix li chke.

⁶ Iri are jun uk'exwach i wuj chi taqtal b'i che i ajawinel ma Darío rumal ma Tatnai, chi aj-ok'al utzam i tinimit chi o pusuk' i qajb'al ij che i raqana Éufrates, xaq ma Setar-boznai junam ku' rachi'il chi aj-ok'al utzam i tinimit chi o pusuk' i qajb'al ij chila che i raqana Éufrates,

^7-8 i wuj keje iri kub'ij: Ru' rutzil qak'ux kqab'ij chawe, Nim laj Winaq, ma Darío, chi kqaj lik utz awach, kqaya retamaxik chawe chi oj uponnaq chusolixik i tinimit Judá, xaq i rachoch i nim laj Dios, chi ktijin tan chik uyakik ru' nimaq taq ab'aj chi antal chom che, xaq ktijin uch'uqik rij ru' tz'alam, man lik anoj rib' i chak k-anik xaq i chak lik ktijin b'i relik.

⁹ Xqatz'onoj chke i rijab' re i jutzob'aj re i Dios chi pachin xetaqaw chuyakik tan chik i rachoch i Dios xaq chuch'uqik rij ru' che'

¹⁰ xaq wach kib'i i winaq chi keok'aw utzam chke, man keje ile kqatz'ib'aj kib'i xaq kqak'am li chawe yet, Nim laj Winaq.

¹¹ Ike xkib'ij chqe chi kkikoj u'ij i Dios aj chikaj xaq aj uwach ulew, xaq ketijin tan chik chuyakik jun rachoch i Dios chi ujer xyaki te'eq rumal jun nim laj ajawinel aj Israel.

¹² Xaq xkib'ij chi katit kimam xkimi'saj roywal i Dios aj chikaj, rumali chi Ire xeujach pu'ab' ma Nabucodonosor chi ajawinel ke aj Babilonia, chi aj Caldea, xaq are ire xwulijsaw i rachoch i Dios le, xaq xeuk'am b'i i winaq pa Babilonia.

¹³ Chrijil chik ile, i ma Ciro, che i nab'e junab' rajawinik pa Babilonia, xutaq tan chik uyakik i rachoch i Dios.

¹⁴ Xaq xkib'ij chqe: Chi i ajawinel ma Ciro xresaj li ronojel ni'pa chapanb'al an-o'oj xaq saq-o'oj prachoch utiox ma Nabucodonosor chi xrel-aj li prachoch i Dios chila Jerusalén, xujach pu'ab' ma Sesbasar, chi uya'om kan pa aj-ok'al utzam i tinimit.

¹⁵ I ma Ciro xutaq ma Sesbasar chi kuk'am i jalajuj taq chapanb'al le xaq chutzalijsaj b'i prachoch i Dios chila Jerusalén xaq chila chkiyaka wi chik i rachoch i Dios.

¹⁶ Keje uri ile chi are xupon ma Sesbasar, xukoj ukub'ib'al i rachoch i Dios pa Jerusalén; che i ij le xjeqan uyakik xwiri k'amaja kutzinik.

¹⁷ Wo'or ut, we kumaj awach, Nim laj Winaq, kqatz'onoj chawe chi chtzukux ni chupam i wuj ke i ajawinelab' aj Babilonia, chik'ama upam we qatzij chi are i ajawinel ma Ciro xtaqaw uyakik chik i rachoch i Dios le pa Jerusalén, xaq kab'ij ni chqe wach ach'ob'onik yet, Nim laj Winaq, chrij i chak le.