Esdras 4 - Wuj Pa K'ubultzij

U'atixik i kichak i aj Israel kumal i ajch'oj chkij

¹ I ajch'oj chkij utzob'ajil ma Judá xaq ma Benjamín are xketamaj chi ni'pa je elsam te b'i pa cho'ab' chwach kulew xeupon chik, i xe'ok chuyakik i rachoch i Ajwal chi ki-Dios aj Israel,

² are uri xe'e ru' ma Zorobabel, ru' ma Jesúa xaq ku' i aj-atzil ke alk'uwal; xkib'ij chke: —Chiya ni chqe chi kixqato chuyakik i rachoch i Dios, man yoj xaq qatzukum i Dios chi kikoj u'ij yix, xaq qasujum qaporom sipon che are xujeq ajawinik ma Esar-hadón, chi ajawinel pa tinimit Asiria, chi xaq are ire xojuk'am li waral.

³ Xwiri ma Zorobabel, ma Jesúa xaq i aj-atzil ke alk'uwal aj Israel, xkib'ij chke: —Kmajaw taj chi kojito chuyakik i rachoch i Ajwal Dios. Yoj rajwaxik qatukel kojyakaw ni rachoch i Ajwal, chi ki-Dios aj Israel, man keje ile xub'ij ma Ciro chqe, chi ajawinel re i tinimit Persia.

⁴ Are uri i winaq chi aj Israel xki'an kichak chuqajsaxik kik'ux i winaq aj Judá man keje ile kkimayij uyakik i rachoch i Ajwal.

⁵ Xwi ta la ile, xaq xkiya mer chke i jujun ajpatanib' re i tinimit, are uri ike le xe'ok chu'atixik wach kich'ob'om te'eq u'anik junam, keje ile xki'an che ronojel i junab' re rajawinik ma Ciro pa tinimit Persia, k'a che rajawinik ma Darío.

⁶ Are xujeq rajawinik ma Asuero, i winaq chi je ajch'oj chkij aj Israel, xkikoj kimak aj Judá xaq aj Jerusalén che, chi lik chwach wuj kitz'ib'am wi b'ik.

⁷ Are xuriq ij chi xok ma Artajerjes pa ajawinik puwi i tinimit Persia, are uri ma Bislam, ma Mitrídates, ma Tabeel xaq i jub'an chik rachi'il, xkitz'ib'aj b'i jun wuj che ma Artajerjes. I wuj le chi xkitz'ib'aj b'ik, tz'ib'tal pa ch'ab'al aj Aram xaq atsam b'i puch'ab'al i ajawinel le.

⁸ Ma Rehum chi atz laj aj-ok'al utzam i kaj-atzil i achiyab' chi je yij che i ch'oj xaq ma Simsai chi ajtz'ib', xkitz'ib'aj b'i jun wuj che ma Artajerjes kojb'al kimak aj Jerusalén.

^9-11 I winaq chi xetaqaw b'i i wuj, je are iri: Ma Rehum, chi atz laj aj-ok'al utzam i kaj-atzil i achiyab' chi je yij che i ch'oj, ma Simsai chi ajtz'ib', xaq i rachi'il chi je aj-atol tzij, nimaq taq aj-atzil ke i achiyab' je yij che i ch'oj xaq jub'an chik chi nimaq kipatan pa tinimit Persia, Erec, Babilonia, xaq Susa, chi xaq Elam kb'ix che. I jub'an chik winaq re i nimaq taq tinimit chi xe'elsax b'i pkitinimit rumal i nim laj winaq ma Asnapar, chi lik nim u'ij, xeya' chila pa taq tinimit re Samaria xaq chila che ulew chi o pusuk' i qajb'al ij che i raqana Éufrates. I wuj keje iri kub'ij: Ma Artajerjes, chi at ajawinel, yoj chi oj awajchak chi oj o che ulew chi o pusuk' i qajb'al ij che i raqana Éufrates.

¹² Kqaya retamaxik chawe, Nim laj Winaq, chi aj Judío, chi xeataq li yet qu' yoj, xeupon pa Jerusalén xaq xe'ok chuyakik itzel laj tinimit le. Ketijin chik chuyakik i tapial nim uwach chrij chwach i tinimit, xaq chuyijb'axik ukub'ib'al ja.

¹³ Xaq kqaya retamaxik chawe, Nim laj Winaq, we ketiki chuyakik xaq chusutixik rij i tinimit le ru' tapial nim uwach, i winaq le kkaj ti chik uri utojik i alkawal chawe, rumali chi i mer chi kajwax chawe lik nim ktzalij chrij.

¹⁴ Yoj chi oj awajchak, kqaya taj chi we kqajsax taq a'ij ru' ile, rumali chi kqataq b'i utzijol chawe, Nim laj Winaq,

¹⁵ man ktzukux chupam wuj ke i ajawinelab' chi je ik'awnaq nab'e chawach yet, keje ile kawetamaj ni i tinimit le, lik itzel laj tinimit chke i ajawinelab' xaq chke i jub'an chik tinimit, man ike le kimolom chik kib' juyak chu'anik ch'oj chrij i ajawinel, rumali chi xchupsax kiwach.

¹⁶ Rumali chi kqaya retamaxik chawe, Nim laj Winaq, we xetiki chuyijb'axik i tinimit le xaq usutixik rij ru' tapial chi nim uwach, lik ksach uri i ajawinik pkiwi i winaq chi je o chwach ulew chi o pusuk' i qajb'al ij che i raqana Éufrates.

¹⁷ Are uri i ajawinel ma Artajerjes keje ula'ik uwach iri xutaq b'i che ma Rehum, chi atz laj aj-ok'al utzam i kaj-atzil i achiyab' chi je yij che i ch'oj, che ma Simsai chi ajtz'ib' xaq chke i rachi'il chi je jeqel pa Samaria, xaq che ulew chi o pusuk' i qajb'al ij che i raqana Éufrates: Chik'ama jun rutzil iwach.

¹⁸ Rumal i wuj chi xitaq li chwe chi xaq x-ajlax chinxikin chi i atsam li pinch'ab'al;

¹⁹ yin xintaq uk'amik upam, are uri xriqtajik chi i tinimit le ujer ki'anom ch'oj chkij i ajawinelab', lik kiyijb'am kib' xaq lik arewi kewalij chu'anik ch'oj.

²⁰ Xaq je ik'awnaq i ajawinelab' pa Jerusalén chi lik ko kiwach, man xki'at tzij pkiwi i jub'an chik tinimit chi o pusuk' i qajb'al ij che i raqana Éufrates, chi kkitoj i jalajuj taq alkawal chke.

²¹ Rumali, chib'ij chke i achiyab' chi chkimayij ni chak k'a kinb'ij ni yin chke, junpa tan chik kkijeq chik uyijb'axik i tinimit.

²² Lik chi'an la ile pacha xixintaq che, man keje ile nti jun k'ax ku'an che wajawinik. Keje ile kub'ij i wuj.

²³ Are x-ajlax uwach uwuj i ajawinel ma Artajerjes chwach ma Rehum, ma Simsai chi ajtz'ib', xaq chkiwach i rachi'il; konojel ike xe'e la pa Jerusalén ru' jun taqanik, xaq xeki'ana k'ax chke, xeki'atij aj Israel chu'anik i chak le.

²⁴ Keje uri ile chi xch'aqi uyakik i rachoch i Dios chila pa Jerusalén k'a che ukab' junab' rajawinik ma Darío chi ajawinel pa Persia.