Esdras 3 - Wuj Pa K'ubultzij

Uyijb'axik chik ukojik u'ij i Dios pacha ax k-an wi te'eq

¹ Are xuriqa i wuqub' ik', i aj Israel je o chik pkitinimit, are uri konojel i winaq xkimol kib' chila pa Jerusalén.

² Are uri ma Jesúa, chi uk'ojol ma Josadac, xaq i je rachi'il chi ajsujul sipon junam ru' ma Zorobabel, chi uk'ojol ma Salatiel, xaq i rachalal, xkijeq uyijb'axik i sujb'al usipon i Dios aj Israel, man puwi kkisujuj wi i porom sipon, chrij pacha kub'ij u'atb'al tzij ma Moisés chi rajpatan i Dios.

³ Lik utz u'anik xki'an che i sujb'al sipon, man kkixij kib' chke i winaq chi je o chila; ike lik ij ij pa taq usaqirb'al xaq pa taq uqajb'al ij kkisujuj porom sipon yab'al u'ij i Ajwal.

⁴ Xwi ta la ile, xaq xki'an i nima'ij ke i mujb'al re es, chrij pacha i atb'al tzij chi tz'ib'talik, chi ij ij ksujux i porom sipon pacha ax kki'an wi, chrij pacha uk'iyal chi ksujux ij ij.

⁵ Keje pacha i porom sipon ij ij, re i muqul ik', ni'pa rajwaxik che i nima'ij chi lik jachtal pu'ab' i Ajwal, xaq chke i jujun chi xkiya kisipon chi pkik'ux xel wi uya'ik che i Ajwal.

⁶ Che i nab'e ij re i wuqub' ik', xkijeq usujuxik i porom sipon che i Ajwal, tupu k'amaja kkijeq uyakik i rachoch i Dios.

⁷ Te'uri xkiya i mer chke ajyakol ja xaq chke i ajanelab'; xwi ta la ile, xaq xkiya ti'b'alil, ya re tu'ik re xaq aceite chke i winaq aj Tiro xaq aj Sidón, man keje ile kkesaj b'i che' chakalte' pa k'achelaj Líbano, kkik'am b'i puwi i mar k'a che i tinimit Jope, chrij pacha xub'ij i ma Ciro chke chi ajawinel ke aj Persia.

Ujeqik uyakik chik i rachoch i Dios

⁸ Ma Zorobabel chi uk'ojol ma Salatiel, ma Jesúa chi uk'ojol ma Josadac, junam ku' i kachi'il chi je ajsujul sipon xaq je aj Leví, xaq konojel ni'pa i winaq chi xetzalij chik Jerusalén, xkijeq uyakik i rachoch i Dios che ukab' ik' re ukab' junab' ketzalij chik pa Jerusalén, xkiya i chak le pki'ab' aj Leví chi o chik juwinaq junab' chke.

⁹ Ma Jesúa junam ku' uk'ojol, ku' i ratz ucha', xki'an jun tzob'aj che kib' ru' ma Cadmiel junam ku' i rak'al chi je umuq uxikin ma Judá xaq ku' uk'ojol, i ratz ucha' xaq je umuq uxikin ma Henadad chi je aj Leví; ike le are je aj-ok'al utzam chke ni'pa kechakun prachoch i Dios.

¹⁰ I ajyakol ja are xkikoj ukub'ib'al i rachoch i Dios, i je ajsujul sipon xetak'i anoq, kikojom ki'u' pacha usuk' xaq kok'am ki-trompeta chkijujunal. I je aj Leví, chi je umuq uxikin ma Asaf, kok'am b'i chilchil kojb'al u'ij i Ajwal, chrij pacha utaqom kan u'anik etz ma David ajawinel ke aj Israel.

¹¹ Jujun keb'ixanik, i jub'an chik kkila' uwach ru' i tziji: “Chitioxij che i Ajwal, man ire lik utz uk'ux, man i k'axnab'al uk'ux chke aj Israel lik k-e ij saq chrij”. Konojel i winaq kesik'in rumal kikikotemal xaq kkikoj u'ij i Ajwal, man xjeqan chik uyakik i rachoch i Ajwal.

¹² K'i chke i ajsujul sipon, aj Leví xaq i aj-atzil ke alk'uwal chi je nimaq taq winaq chik, chi kilom i nab'e rachoch i Dios, lik kesik'in che o'ej, man kkilo chi xjeqan uyakik jun chik rachoch i Dios. Xaq jub'an chik lik kesik'in rumal kikikotemal.

¹³ Mijun kuta ub'e, we rumal o'ej kesik'inik xaq we rumal kikotemal, man lik ko kesik'inik chi lik ktataj k'a naj.