Esdras 1 - Wuj Pa K'ubultzij

Utaqanik i ajawinel ma Ciro

¹ Che i nab'e junab' rajawinik ma Ciro chi ajawinel ke aj Persia, are uri k-antaj na pacha utzij i Ajwal chi ub'im ma Jeremías chi profeta, i Ajwal xu'an che ma Ciro chi kupaxsaj uwach i utaqanik chke konojel uwinaq, pa tzij xaq chwach taq wuj, are utaqanik iri:

² “Ma Ciro, chi ajawinel ke aj Persia, kusaqij iri: I Ajwal, chi Dios aj chikaj, xuya ronojel i ajawinik pin-ab' puwi ronojel uwach i jyub' ta'aj, xaq xuya chinqul uyakik jun rachoch chila Jerusalén, chi o pa Judá.

³ Rumali chi xapachin chiwe yix, chi ix utinimit i Ajwal, chixuto ni uri Iwajwal Dios; xaq chixtzalij chik pa Jerusalén chi o pa Judá chuyakik i rachoch i Ajwal, chi ki-Dios aj Israel, chi are Dios chi jeqel pa Jerusalén.

⁴ Xaq pachin kraj enam pa Jerusalén, chto' ni kumal i lok'anij chi je o chrij chwach ru' i saq-o'oj, an-o'oj, jalajuj taq b'iroxik xaq chikop; xwi ta la ile, xaq jalajuj taq sipon anb'al re i rachoch i Dios chila pa Jerusalén.”

Kitzalijik li aj Israel pa Jerusalén

⁵ I aj-atzil ke i alk'uwal aj Judá, aj Benjamín, ajsujul sipon xaq i aj Leví chi kikowim kik'ux che i Dios, xkiyijb'a kib' che i enam pa Jerusalén chuyakik chik i rachoch i Ajwal.

⁶ Konojel ni'pa aj chila xekito ru' uya'ik i saq-o'oj chke, xaq an-o'oj, jalajuj taq b'iroxik, chikop xaq jalajuj taq b'iroxik chi paqal rajil; xwi ta la ile, xaq o i sipon chi pkik'ux i winaq xel wi uya'ik.

⁷ I ajawinel chi ma Ciro xujach ronojel ni'pa i chapanb'al re i rachoch i Ajwal chi uk'amom b'i ma Nabucodonosor, chi xeuya chila prachoch i jalajuj taq udios.

⁸ Ma Ciro xujach che ma Mitrídates chi ajk'olon mer, i ma Mitrídates le are xutzin chrajlaxik i mer le, xujach che ma Sesbasar chi are Aj-ok'al utzam i tinimit Judá.

⁹ Ronojel ni'pa i b'iroxik chi xmoltajik are iri: Lajuj juwinaq (30) nimaq taq laq an-o'oj, lajujwinaq kamo' (1,000) nimaq taq laq saq-o'oj, b'elejeb' juwinaq (29) kuchil,

¹⁰ lajuj juwinaq (30) laq an-o'oj, lajuj jumo' (410) laq saq-o'oj chi qas ti chom, xaq lajujwinaq kamo' (1,000) jalajuj taq b'iroxik.

¹¹ I an-o'oj xaq saq-o'oj chi xmoltajik ronojel lajujwinaq oxlajujmo' (5,400) Ronojel ile xuk'am b'i ma Sesbasar pa Jerusalén are xtzalij li pa Babilonia junam ku' aj Israel chi k'iyal junab' xkich'ij chila pa Babilonia man je elsam b'i pa cho'ab' pa kulew.