Daniel 2 - Wuj Pa K'ubultzij

I rachik' i ajawinel ma Nabucodonosor

¹ Che i ukab' junab' re rajawinik, i ma Nabucodonosor, xrachik'aj k'iyal taq achik', rumal ile lik xok il xaq xk'achirik i lik kwar ti chik.

² Are uri xutaq kisik'ixik aj-ij, ajnanel, aj-itz xaq i je ajch'ob'onel, re kkib'ij usuk' i rachik' che. Ike xe'ek i xkik'ut kib' chwach i ajawinel,

³ chi xub'ij chke: —O jun achik' xin-ano i lik kinb'ison rumal, kintijin chuch'ob'ik wach usuk' ke'eloq.

⁴ I je ajch'ob'onel, xkib'ij che i ajawinel pkich'ab'al aj Aram: —¡Lik katk'asi ni yet, Nim laj Winaq, ronojel ij saq! Chalapa chke awajchaki wach awachik'am, i yoj kqab'ij ni usuk' chawe wach ke'eloq.

⁵ —Iri are kinch'ob' u'anik —xub'ij i ajawinel —We kib'ij ti yix chwe wach i xwachik'aj xaq wach usuk', k-ani ni ch'aqa taq chiwe xaq iwachoch kewulijsax na i ku'an na pacha t'ub'ulaq taq tz'il.

⁶ Xwiri we kib'ij chwe wach i xwachik'aj xaq wach kraj ub'ixkil i wachik', kya' ni sipon chiwe wumal yin, utzil xaq ukojik i'ij. Keje uri ile, chib'ij chwe wach i xwachik'aj, xaq chib'ij usuk' chwe wach kraj ub'ixkil.

⁷ I je ajch'ob'onel xkila' chik uwach kamul: —Chab'ij chqe, Nim laj Winaq, wach xawachik'aj, i yoj kqab'ij ni usuk' chawe wach kraj ub'ixkil.

⁸ —Lik weta'am —xula' uwach i ajawinel —chi yix kiwaj chi to' kib'ay iwib', man itom chik wach inch'ob'om u'anik.

⁹ Rumali, we kib'ij ti chwe wach xwachik'aj, iwonojel yix kixik'aw ni uri chupam utojb'alil, man ijunamsam itzij chub'ixkil usuk' i wachik' chwe, xwiri xa t'oronik xaq lik saq laj tzij ti kib'ij, yix iwoy-em moqxa kjaltaj taq inch'ob'onik yin. Chib'ij uri chwe wach i xwachik'aj, man keje ile kwetamaj ni yin chi yix lik iweta'am wach ke'el usuk'.

¹⁰ —Lik mijun o chwach i jyub' ta'aj —xkila' uwach i o kinojb'al —chi kuriq ub'ixkil wach kawaj kawetamaj yet, Nim laj Winaq. Xaq keje ile, mijun chke taq ajawinelab' tupu lik nim u'ij xaq nim ktiki che, utz'onom ti b'iroxik xaqjunam pacha iri chke taq aj-ij, aj-itz xaq chke jub'an chi o kinojb'al.

¹¹ Ile chi katz'onoj yet, Nim laj Winaq, lik k'ax man lik mijun ktiki chub'ixkil usuk' chawe, lik xwi ketiki che je are i dios. ¡Xwiri ike le je jeqel ti chkixol i winaq!

¹² Are xuta i ajawinel ile lik xpe roywal, rumali xutaq kikamsaxik konojel i o kino'oj pa Babilonia.

¹³ Are xya' retamaxik i taqanik le, xkitzukuj a Daniel xaq i rachi'il re kekamsaxik.

I a Daniel kub'ij usuk' i rachik' i ajawinel

¹⁴ Are uri a Daniel lik utz lapanik xu'ano, lik o usuk' utzij, xaq lik chom ktayik, keje ile lik xuxij ti rib' che ma Arioc, chi kaj-atzil ajchajinel prachoch i ajawinel, chi lik ya keukamsaj te'eq i winaq chi o kino'oj.

¹⁵ I xutz'onoj che: —¿B'uchak i ajawinel uya'om i taqaniki chi lik k'ax? I ma Arioc xub'ij usuk' che wach rumal.

¹⁶ Are uri a Daniel x-e chrilik i ajawinel xaq xutz'onoj utzil che, chi kya' ni keb' oxib' ij che, te'uri kub'ij che wach i rachik' xaq wach i usuk' ke'eloq.

¹⁷ Te'uri x-e chi rachoch xaq xub'ij ronojel chke i rachi'il chi je are iri: A Ananías a Misael xaq i a Azarías,

¹⁸ re kkitz'onoj kitob'al che i Dios aj chikaj puwi usuk' i achik' chi lik okb'al il, man keje ile kekamsax ti junam ku' jub'an chi o kino'oj pa Babilonia.

¹⁹ Che i a'ab' le i achik' xya' retamaxik usuk' puwach a Daniel, rumali a Daniel xukoj u'ij i Ajwal aj chikaj

²⁰ ru' i tziji: “Lik nim u'ij ub'i i Ajwal ronojel ij saq, man lik re Ire ni'pa i no'oj xaq i cho'ab'.

²¹ Ire kujalwachij i ij xaq i junab'; keresaj xaq keukoj ajawinelab', xaq kuya kino'oj i o kinojb'al xaq kuya b'iwil chke i je b'iw.

²² Ire kuya retamaxik i nimaq taq b'iroxik chi uwam uwach; reta'am wach o pa equm, man utzunb'al i saq ru' Ire o wi.

²³ Chawe yet, Dios ke inqajaw inchuch, kintioxij chawe i katinb'ixaj, man a'anom chwe chi o inno'oj xaq o incho'ab'; wo'or aya'om retamaxik chwe wach qatz'onom chawe: Aya'om retamaxik chqe wach i kb'ison i ajawinel che.”

²⁴ Chrijil chik iri, i a Daniel x-e ru' ma Arioc che i lapanik, chi utaqom i ajawinel chkikamsaxik konojel i o kino'oj pa Babilonia, i xub'ij che: —Lik meakamsaj i o kino'oj. Chinak'ama b'i chwach i ajawinel, i yin kinb'ij ni usuk' ronojel i rachik' che.

²⁵ Te'uri i ma Arioc xuk'am b'i a Daniel chwach i ajawinel ma Nabucodonosor, i xub'ij che i ajawinel: —Chkixol i aj Judá chi je elsam li pkitinimit inriqom jun achi chi kub'ij usuk' chawe yet, Nim laj Winaq, wach kraj ub'ixkil i awachik'.

²⁶ Are uri i ajawinel xub'ij che a Daniel, chi kiya'om pub'i a Beltsasar: —¿Kattiki yet chub'ixkil chwe wach i xwachik'aj, i wach kraj ub'ixkil i wachik' le?

²⁷ A Daniel xula' uwach: —Lik nti jun o uno'oj, mitene ajnanel, mitene aj-ij xaq mitene jun chi reta'am wach ki'anom i ch'umil re kub'ij taq usuk' chawe wach kawaj retamaxik yet, Nim laj Winaq.

²⁸ Xwiri o jun Dios chikaj chi kuya retamaxik ronojel i etamam ti uwach, Ire uya'om retamaxik chawe, Nim laj Winaq, wach kak'ulmaj k-on panoq. Kinb'ij ni usuk' awachik' chawe, Nim laj Winaq, xaq kinb'ij ni chawe wach ile chi awilom pa wach are katwarik:

²⁹ Yet, Nim laj Winaq, at o te'eq chwi ach'at; xatok chuch'ob'ik wach kk'ulmaxik k-on panoq, i Dios xuk'ut chawe yet ronojel i etamam ti uwach xuya retamaxik chawe.

³⁰ Xaq keje chwe yin yatal uk'utik i etamam ti uwachi, xwiri rumal ti we o taq mas inno'oj chkiwach konojel i winaq, re kinb'ij ni usuk' chawe yet, Nim laj Winaq, wach kraj ub'ixkil awachik', man keje ile yet, Nim laj Winaq lik kach'ob' ni ub'e wach taq i ach'ob'om pajolom.

³¹ Chupam awachik', yet, Nim laj Winaq, xawilo chi chawach kwalij jun k'exwach lik nim xaq lik kwalch'inik chi lik xib'in ib' ktzunik.

³² I ujolom i k'exwach le lik re an-o'oj saqil; i uwach uk'ux xaq i uteleb' lik saq-o'oj; i upam xaq uwi taq ra' lik anch'ich';

³³ chekeb' ra' re ch'ich'; i jub'i' chke i raqan xaq re ch'ich', i jub'i' chik chke i raqan le re xo'ol.

³⁴ Tz'aqat yet, Nim laj Winaq, kattijin chutaqexik, puwi jun nim laj jyub' xtzaq li jun ab'aj, chi lik mijun xtakpuw loq, i xoltzaq che i raqan i k'exwach xaq lik xu'an ch'aqa taq che.

³⁵ Xaqte'et, i ch'ich', xo'ol, anch'ich', saq-o'oj xaq i an-o'oj lik konojel xeu'on k'ajil, pacha k-iltaj pa sa'ij are kch'ay uwach i trigo, i tew xuk'am b'ik, lik k-aljin ti chik. Xwiri i ab'aj chi xtzaq chwach i k'exwach xu'an pacha jun nim laj jyub' chi xunojsaj ronojel uwach ulew.

³⁶ Are achik' iri. Wo'or kinb'ij chawe, Nim laj Winaq, wach kraj ub'ixkil achik' le chawe.

³⁷ Nim laj Winaq, are yet lik mas at nim chkiwach konojel i ajawinelab', man i Dios aj chikaj uya'om chawe chi kat-ajawinik, uya'om i tikilem pa'ab', acho'ab', i a'ij,

³⁸ xaq i rajawinik pkiwi konojel i k'ijib'al chi je o winaq chwach, chikop, xaq i tz'ikin; Ire lik uya'om ronojel pa'ab' yet, Nim laj Winaq, chi at are i jolomaj an-o'oj.

³⁹ Chrij i awajawinik yet, o ni tan chik jun ajawinik chi nti qas u'ij chwach i awe yet, te'uri kk'un jun chi are urox ajawinik re anch'ich' chi o ni ucho'ab' puwi ronojel i ulew.

⁴⁰ Te'uri kk'un jun ukaj ajawinik, chi lik ko pacha i ch'ich'; keje pacha i ch'ich' chi lik ku'an mutmut che ronojel xaq lik kusach uwach, keje uri i jun ajawinik le k-on ni k'ax xaq lik kusach ni kiwach i jub'an chik ajawinik.

⁴¹ Yet, Nim laj Winaq, xaq xawilo chi jub'i' che i raqan xaq che i uwi taq raqan re xo'ol, xaq i jub'i' chik re ch'ich'; iri kraj ub'ixkil chi are ni jun ajawinik chi jachom uxol, tupu yatal ucho'ab' rumal i ch'ich', man yet, Nim laj Winaq, xaq xawilo chi i ch'ich' antal junam che ru' xo'ol.

⁴² I uwi taq raqan o ch'ich' che xaq o xo'ol che, ile kraj ub'ixkil chi ajawinik lik o ucho'ab' xaq lik nti ucho'ab'.

⁴³ Keje pacha xawil yet, Nim laj winaq, chi i ch'ich' o xo'ol ru', keje ni je aj-ok'al utzam ile ipa kerajawin wi, kki'an ni junam che kib' che i kich'ob'onik chi pacha taq re k'ulankil, xwiri ketiki ti chu'anik xa jun ch'akulaj che kib', xaq keje uri pacha i ch'ich' ru' i xo'ol chi kenak'i taj.

⁴⁴ Che i ki'ajawinik i ajawinelab' le, i Dios aj chikaj ku'an ni jun k'ijib'al re ajawinik chi lik kwulijsax taj xaq lik nti jun chik tinimit kuya taq rib' puwi, are ni Ire kusach ni kiwach konojel i jub'an chik ajawinik, xaq lik nti uk'isik ronojel ij saq.

⁴⁵ Ile are kraj ub'ixkil i ab'aj chi yet, Nim laj Winaq, xawilo chi xtzaq li chwi jyub', chi lik mijun xutakpuj loq; ab'aj chi lik xu'an k'ajk'aj che i ch'ich' pacha uk'aj ulew, i anch'ich', xo'ol, saq-o'oj xaq i an-o'oj. I nim laj Dios uk'utum chawe yet, Nim laj Winaq, wach i kk'ulmax na k-on panoq. I achik' lik saqil, i wach kraj ub'ixkil lik qatzij.

⁴⁶ Are uri i ajawinel ma Nabucodonosor xxuki chwach a Daniel, xuqajsaj upalaj k'a chwach ulew xaq xutaq usujuxik sipon che xaq pom.

⁴⁷ Te'uri xub'ij che a Daniel: —Lik qatzij i Dios yix lik mas nim chkiwach konojel ni'pa taq i jub'an chik dios; are ire Ajwal ke i ajawinelab' chi xaq kuya retamaxik ronojel ile chi etamam ti uwach, man yet at tikinaq chretamaxik iri chi etamam ti uwach.

⁴⁸ Te'uri i ajawinel xuya a Daniel che jun k'ijib'al nim u'ij xaq xutaq u'anik chomiq taq sipon re kuya che; xwi ta la ile, xaq xuch'ik rij chi aj-ok'al utzam puwi i ulew re i tinimit Babilonia xaq kaj-atzil konojel ni'pa o kino'oj che i nim laj tinimit le.

⁴⁹ Tz'onb'enik re a Daniel che i ajawinel chi kuya chke a Sadrac, a Mesac xaq i a Abed-nego jun kik'ijib'al chi lik o u'ij chi are i ke je o puwi i ulew re tinimit Babilonia. I a Daniel xkanaj chila pa ku'at wi tzij i ajawinel.