Daniel 12 - Wuj Pa K'ubultzij

Pa k'isb'al ij

¹ Che taq i ij le kwinaqir ni a Miguel, chi are i nim laj ángel ajchajinel re atinimit. Are jun ij chi lik k'ax, are ij chi nti jun ik'awnaq pacha ile, che ni'pa kjeqanik li tinimit. Are kuriq i ij le, konojel atinimit ketotaj na, chi tz'ib'tal kib'i chupam i wuj.

² K'i chke i kewarik chi je muqtal pulew, kk'un ni saq chkiwach: Jujun chke re k'aslemal chi nti uk'isik, i jub'an chik re k'ixb'alil xaq re xib'in ib' ronojel ij saq.

³ I winaq chi o kino'oj chi xekik'am b'i i winaq che i suk'ul laj b'e, lik kewalch'in na pacha i chom laj kaj; ¡Xaq kewalch'in na pacha i ch'umil chikaj, lik ronojel ij saq kewalch'in na!

⁴ Xwiri yet, ma Daniel, chak'olo i tzij le ani'al xaq chatz'apij i wuj k'a kuriqa ni k'isb'al ij. Je k'i ni winaq kepe jewa xaq ke'e jela, re kkitzukuj uk'iyarsab'al kinojb'al.

⁵ Are uri yin, ma Daniel, xwilo chi je o keb' chik achiyab' je tak'al b'ik, jujun k'ulala che uchi' i raqana.

⁶ Jun chke i ike xutz'onoj che i achi chi ukojom u'u' re lino, chi o puwi i ya re i raqana: ¿Junpa kek'is i b'isb'al laj taq b'iroxiki?

⁷ I achi chi ukojom u'u' re lino xuyak u'ab' chikaj i xusaqij pub'i i Dios k'aslik, xub'ij: Che i oxib' junab' ru' nik'aj, are kk'is uyej puwi ucho'ab' utinimit i Dios, are uri kk'is ni ronojel i b'iroxiki.

⁸ Yin xinta wach i kub'ij, xwiri xinta ti ub'e. Rumali xintz'onoj che: Ajwal, ¿Wach kk'ulmaxik are keik'aw ronojel iri?

⁹ Ire xula' uwach chwe: Mamayij ab'e ma Daniel man i tziji lik o ni uchak kuwax uwach k'a kuriq ni k'isb'al ij.

¹⁰ Lik je k'i keik'aw ni che uyej chi b'italik, man lik rajwaxik chi keu'on ni ch'am xaq kesuk'i'ik anb'al chom chke. I je utz ti laj taq winaq kkimayij ti u'anik i kimak, xaq kkita ti ub'e wach kk'ulmaxik, xwiri i winaq chi o kino'oj lik kkita ni ub'e ronojel.

¹¹ Lajuj kajwinaq oxmo' (1,290) ij kik'aw na, che i ij le are kmayix uporoxik i sipon ij ij, are uri kjeqan uya'ik i ch'am ti laj taq b'iroxik prachoch i Ajwal chi lik xa kuqajsaj u'ij.

¹² Lik utz re i jun chi kroy-ej ru' ukub'ib'al uk'ux, k'a kik'aw ni jo'lajuj waqwinaq oxmo' (1,335) ij.

¹³ Xwiri yet, ma Daniel, chatb'in che i k'isb'al taq a'ij xaq chatuxlanoq, man che i k'isb'al taq ij katwalij na, lik k'amb'al ni asipon.