Daniel 11 - Wuj Pa K'ubultzij

¹ Yin xinto xaq xinya ukowil uk'ux, are o ma Darío che i nab'e junab' re rajawinik che i tinimit Media,

² I wo'or kinya retamaxik i saq laj tzij chawe: K'a kerajawin ni pa tinimit Persia oxib' ajawinelab', chrijil ile kk'iji ni che i atb'al tzij jun ukaj ajawinel chi lik mas b'eyom chkiwach i oxib'. I rumal ub'eyomal le kuriq ni nim laj cho'ab', lik kuyijb'a ni ch'oj chrij i ajawinik re i tinimit Grecia.

I ajawinelab' aj pa moxab' xaq i aj pa wiqab'

³ Xwiri k-on panoq krajawin ni jun ajawinel chi lik ajch'oj, chi lik knimar nu b'i ucho'ab' pkiwi k'iyal taq tinimit, i ku'an na pacha kraj ire.

⁴ Xwiri, are o chik che uk'ijib'al, i utinimit chi o te'eq ucho'ab' pkiwi i jub'an chik tinimit, lik ksach ni uwach xaq kjach ni pa kajib' tasaj. I ucho'ab' i ajawineli lik k-ax ti chke umuq uxikin, xaq mitene i nim laj tinimit nti chik ucho'ab' pacha te'eq nab'e, man lik kjachik, i jub'an chik kki'at ni tzij puk'exel.

⁵ I ajawinel re pa wiqab' lik o ni ucho'ab', xwiri jun chke uwi ujolom i rajtaqon lik k-on ni mas nim ucho'ab' chwach ire, xaq lik kunimarsaj b'i ucho'ab' pkiwi k'iyal taq tinimit.

⁶ Are ik'awnaq chik keb' oxib' junab', chekeb' kki'an ni jun trat: I ajawinel re pa wiqab' kuya ni umi'al chi kk'uli ru' i ajawinel re pa moxab', man keje ile kki'an i chomb'al ib' chkiwach i keb' nimaq taq tinimit. Xwiri i kich'ob'onik kel ti utz, man ire, rak'al, rachijil, xaq i rajtaqon lik kekamsax na.

⁷ Xwiri, jun chke i ralk'uwal ku'an ni ch'oj chkij achiyab' chi je yij che i ch'oj aj pa moxab' xaq kk'iji ni che i k'ijib'al re tob'al ib' chi re te'eq i ajawinel, xaq i k'iyal taq utzob'ajil ketiki ni chuch'akik i ch'oj.

⁸ Xwi ta la ile, xaq keuk'am nu b'i u-dios pa Egipto, utiox chi xaril je antalik re ch'ich' mi'sam pa a', junam ku' jub'an chik b'iroxik chi paqal rajil re i an-o'oj xaq i saq-o'oj. Te'uri are ik'awnaq chik keb' oxib' junab' nti chik ch'oj chkixol i keb' nimaq tinimit,

⁹ i ajawinel re i moxab' kutij ni u'ijol i ch'oj pa wiqab', xwiri lik rajwaxik chi kujek' rib' xaq k-anmajik.

¹⁰ Xwiri i rak'al i ajawinel re i moxab' kkiyijb'a kib' re i ch'oj xaq kkimol kichi' i winaq re kkiyijb'a jun nim laj tzob'aj achiyab' chi je yij che i ch'oj. Jun chke ike junam ku' i rajch'oj ke'e pa ch'oj chkij i je o pa wiqab', lik ronojel kusach ni kiwach pacha ku'an jun raqana are lik knimarik chi lik kel pub'e; te'uri ku'an tan chik ch'oj, k'a kupon ni che i tob'al ib' re i ajawinel re pa wiqab'.

¹¹ Are i ch'oj chi xeu'ana i jutzob'aj ajch'oj re i atol tzij pa moxab' lik kupetsaj ni roywal i ajawinel re i k'ijib'al wiqab', ire le kel na li pa ch'oj chkij i nim laj tzob'ajil chi ajch'oj chrij, lik keuch'ak ni konojel.

¹² I ch'akanik chi xtiki che i uk'iyal taq ajch'oj chrij chi xekamik lik ku'an ni nim che u'ij ire, xwiri i ucho'ab' lik knajtin taj.

¹³ I ajawinel re pa moxab' kuyijb'a chik jutzob'aj achiyab' chi je yij che i ch'oj, mas nim chwach i nab'e, are kik'aw keb' oxib' junab' ku'an tan chik ch'oj chkij aj pa wiqab' ru' uk'iyal taq tzob'aj chi lik je yij che i ch'oj, lik o kich'ojb'al.

¹⁴ Are k-antaj iri, lik je k'i na kewalij chrij i ajawinel pa wiqab'. Chkixol ike je o ni jujun itzel laj taq achiyab' aj Israel, keje pacha x-iltaj pa wachij, xwiri kech'akan taj.

¹⁵ I ajawinel re pa moxab' kk'un chuyakik jun elb'al b'ik chrij chwach jun nim laj tinimit chi sutim rij ru' uwach xan nim uwach, lik kuch'ak na xaq kuk'am na. Mitene i jutzob'aj achiyab' chi lik je yij che i ch'oj chi lik o kicho'ab' re pa wiqab', ketiki ti chu'atixik i je ajch'oj chkij.

¹⁶ I ajawinel chi xch'akan chumajik ulew ku'an ni pacha kraj ire chke i xeuch'ako, man lik mijun ktiki chupek'ik, i kkanaj ni chwach i Chom laj Ulew, xaq lik kusach ni uwach ni'pa i kuriq chwach ulew le.

¹⁷ Xwi ta la ile, lik kuyijb'a chik rib' chuk'amik ulew chi o pa wiqab'; rumal ile, ku'an ni jun trat ru' i ajawinel le chi kuya ni umi'al che re rixoqil, man ru' ile kusachsaj ni uwach i rajawinik, xwiri uch'ob'onik le kel ti utz ru'.

¹⁸ Te'uri keu'ana chik ch'oj chkij i tinimit chi je o chuchi' i mar, i k'i chke ike ketzaq ni pu'ab'; xwiri jun aj-atzil ke i achiyab' chi je yij che i ch'oj kusach ni k'ixb'alil le, man kuya ni pa k'ixb'alil i ajawinel re pa moxab'.

¹⁹ Lik k'a chila i ajawinel kujek' rib' che i tob'al taq ib' re utinimit; xwiri o ni jun k'ax, kuk'ulmaj chi lik kutoj ni ru' uk'aslemal xaq lik arewi kkuxtax ti chik ire.

²⁰ I uk'ijib'al kk'iji ni jun chik ajawinel che, chi kutaq b'i jun ajtz'onol alkawal re kub'eyomarsaj i rajawinik; xwiri che keb' oxib' ij kkamsax na, tupu pa ch'oj taj kkamsax wi.

²¹ Chrijil ire le krajawin jun achi chi k'aqtal b'i u'ij, chi lik kmajaw ti che ku'an ajawinel, chi xa kruwaj uwach wach i utz taj chi kuch'ob' u'anik, lik xa pa t'oronik kkanaj ni pa ajawinel.

²² Lik kusachsaj ni uwach ronojel i cho'ab' chi ke'atiw ire, xaq kukamsaj ni aj-atzil re i trat.

²³ Xaq keut'or ni ni'pa i xki'an i trat re amiy ru' ire, tupu ne te k'i i winaq uk'amom b'ik xwiri keuch'ak na.

²⁴ Are lik mijun o taq kuch'ob' che, kok nu b'i che ulew chi lik mas b'eyom che i jyub' i ku'an na wach xki'an ti ratit umam ujer: Kujach ni chkiwach uwinaq chi je yij che i ch'oj ni'pa taq ub'itaq ke xaq i b'eyomal chi xkich'ak pa ch'oj. Ku'an ni jun ch'ob'onik re ch'oj chkij i nimaq taq tinimit chi sutim kij ru' tapial, tupu xa re keb' oxib' ij.

²⁵ Lik rumal ucho'ab' xaq ukowil uk'ux ku'an ni ch'oj chrij i ajawinel re pa wiqab' ru' ucho'ab' jun nim laj tzob'aj achiyab' chi je yij che i ch'oj. I ajawinel re pa wiqab' lik kula' ni uwach ru' ukowil uk'ux, xaq ke'ok ni pa ch'oj ru' uk'iyal winaq chi je yij che i ch'oj chi xaq ronojel ketiki che; xwiri xa kt'orik man ktiki ti che kicho'ab' i achiyab' chi je yij che i ch'oj chi je ajch'oj chrij ire.

²⁶ Chi xaq je are ike le chi xeusik'ij ru' che i wa'im chwi umexa, xkiyijb'a ni tzaqsab'al re, man i uwinaq chi je yij che i ch'oj ketzaq na, xaq je k'i ni uwinaq le chi je yij che i ch'oj kekam na.

²⁷ Are uri i keb' ajawinelab', to' kkich'ob' u'anik i utz taj chkiwach, xekub'i ni junam che i wa'im chwi mexa, i kkit'or kib' chkiwach, xwiri lik mijun chke chekeb' ktiki che wach i uch'ob'om, man k'amaja kuriq i ij.

²⁸ I ajawinel re pa moxab' ktzalij chali putinimit ru' ronojel taq ub'eyomal chi xrel-aj loq are xu'an i ch'oj, te'uri kuya ti chik uwach ru' i lo'laj trat; ku'an na pacha i uch'ob'om, te'uri ktzalij chik putinimit.

²⁹ Are kuriq i ij chi ch'iktalik, keutaq chub'i i je rajch'oj chkij i je aj pa wiqab'; xwiri che i ch'oji kch'akan taj keje taj pacha i nab'e mul.

³⁰ I uwinaq chi je yij che i ch'oj k-ani ch'oj chkij kumal i je aj puqajb'al ij chi je k'amtal li pa taq barco, rumal i kixib'rikil xkijeq anmajik. Are uri i ajawinel re pa moxab' lik kresaj roywal che i lo'laj trat, xeuk'am i jub'an chi xkixutuj kan i trat, re kechakun ru' ire.

³¹ I uwinaq chi je yij che i ch'oj kkiqajsaj ni u'ij i rachoch i Ajwal xaq ronojel ukowil chi yawnaq ucho'ab', kkimayij ni uporoxik i sipon ij ij i puk'exel ile kkisujuj ni b'iroxik chi lik ch'am taj.

³² I ajawinel lik kukoj u'ij chkilo'ik i jub'an chi kkiqel i trat, xwiri i tinimit chi k'ax kuna u-Dios kek'iji na lik je jikilik xaq kkikoch'ij ni kib' chupam i ketijin chuk'ulmaxik.

³³ I o kino'oj pa tinimit kkik'ut ni chke uk'iyal winaq, xwiri juntir kekamsax ni ike, knak' a' chke xaq kel-ax ni ronojel chke ni'pa o ku', i k-an ni mokom chi je o pki'ab' i kajaw chke chila pa jun tinimit naj. Iri kuch'ij ni keb' oxib' ij.

³⁴ Are kuriq i ij re i uyej, kya' ni jub'i' tob'al ke, tupu lik je k'i na ke'ax ku' ike, xwiri xa rumal o kkaj.

³⁵ Xaq o ni jujun chke i kek'utun pa tinimit ketzukux na, man keje ile kk'am ni kipam, xaq k-an ni ch'am chke xaq kesuk'b'ax na, k'a kuriq ni ij pa k'isb'al re chi ch'ikom chik.

³⁶ I ajawinel re pa moxab' lik ku'an na wach kraj u'anik ire. Lik nim ni kojb'al u'ij ku'ano chi lik kuna ire mas nim u'ij chkiwach jub'an chik dios, i lik kub'ij ni k'ax laj taq tzij chrij i saqil laj Dios; xaq lik ronojel is utz ke'el ru', k'a kuriq ni ij chi i Dios kutaq na li tojpen puwi; man i Dios ni'pa i kuch'ob' u'anik, lik ku'an na.

³⁷ I ajawineli lik kukoj ti pajil i ki-dios i katit kimam, xaq mitene kkikoj ki'ij i ki-dios ixoqib' chi kkikoj taq ki'ij ike, xaq mitene jun chik dios, man ire kub'ij chi lik ik'awnaq u'ij chkiwach ike.

³⁸ Xwiri are i ku'ano, kukoj ni u'ij i dios ke i cho'ab'; kukoj ni u'ij i diosi chi i ratit umam ujer xkikoj ti u'ij, xaq kusuj an-o'oj, saq-o'oj, chomiq taq ab'aj xaq i b'iroxik chi lik paqal rajil.

³⁹ Re kutob'ej i kowil xaq i cho'ab', keuchapb'ej i winaq chi kkikoj u'ij i dios aj naj; i konojel ni'pa kkikoj u'ij i ajawinel le, ire lik kuya ni ki'ij, lik keuya ni che i k'ijib'al chi lik o u'ij xaq kuya ni kulew pacha taq tioxb'al re chke.

⁴⁰ Are kuriq i k'isb'al ij, i ajawinel re pa wiqab' ku'an ni ch'oj chrij i ajawinel re pa moxab'; xwiri ire kel nu b'i chuk'ulaxik chi pacha taq jun tew jab', ktzaq ni puwi i wiqab', chi lik knoj ni i tinimit che i ch'ich' re i ch'oj, ajch'oj rij taq kaway xaq uk'iyal taq barco.

⁴¹ Xaq lik kok nu b'i che i jyub' chi are i Ulew re i Chomalil xaq lik keukamsaj ni k'iyal winaq; xwiri ketotaj ni i winaq aj Edom, aj Moab, xaq i uk'iyal jyub' re i Amón.

⁴² I uwinaq chi je yij che i ch'oj ke'e ni che jub'an chik tinimit, chi lik mitene i tinimit Egipto ktotajik.

⁴³ Kuk'am nu b'i uk'iyal taq b'eyomal chi are i an-o'oj xaq i saq-o'oj i ronojel ni'pa taq i b'iroxik chomiq re Egipto; te'uri kuriq ni ki'ij i tinimit Libia xaq i Etiopía.

⁴⁴ Xwiri kuta ni utzijol chi kpe prelb'al ij xaq pa moxab', chi kkanajik uxim rib' rumal; are uri ru' nim laj roywal kel nu b'ik ru' jun ch'ob'onik chi ku'an jun nim laj kamsanik,

⁴⁵ te'uri kuyijb'a ni saqil laj umujb'al chi lik re jun ajawinel, chuxol i mar ru' i lo'laj jyub' chi lik Chom. Xwiri lik chila na keuriqa wi or re ukamik, i lik nti jun ktowik.