Daniel 1 - Wuj Pa K'ubultzij

A Daniel xaq i rachi'il pa Babilonia

¹ Che urox junab' re rajawinik ma Joacim, ajawinel re i Judá, i ma Nabucodonosor ajawinel re i Babilonia, xupon pa Jerusalén xaq xusutij rij i tinimit ku' uwinaq chi je yij che i ch'oj.

² I Ajwal xuya che i ma Nabucodonosor chi kuchap b'i ma Joacim, chi xaq ktzaq ni pu'ab' k'iyal taq chapb'al re prachoch i Ajwal. Ma Nabucodonosor xeuk'am b'i ajprexil pa Sinar, xaq xuya ni'pa taq i chapb'al chi lik o u'ij chupam i rachoch utiox chi xaril je antalik;

³ xwi ta la ile, xaq xutaq ma Aspenaz, chi kaj-atzil i je ajtaqon chi je o pa nim laj rachoch i Ajawinel, chi chkixol i aj Israel chi je ralk'uwal i saqil laj ajawinel xaq kalk'uwal i winaq chi o ki'ij keuk'am na li

⁴ alab'om chi lik chom ketzunik, chi lik nti jun k'ax che kich'akul, lik utz kik'aslemal xaq o kino'oj, chi lik o kino'oj chu'anik ni'pa taq i ch'ob'onik, xaq ketiki che ronojel ni'pa i ketaq chu'anik pa nim laj ja re i ajawinel. Chke ike le kk'ut ni kich'awb'al xaq i rajlaxik uwach kitz'ib' aj Caldea.

⁵ Ma Nabucodonosor xaq xuya i taqanik chi alab'om le lik ketzuq ij ij ru' i wa xaq i uwa'al uva muqb'am chi kutij i ajawinel, xaq oxib' junab' na ketijox che i jalajuj taq k'utunik, are kk'is i kitijoxik kekanaj pu'ab', re keton chu'anik i chak.

A Daniel xaq i rachi'il je o pa nim laj ja re i ajawinel

⁶ Chkixol alab'om le o i a Daniel, a Ananías, a Misael xaq i a Azarías, chi je re i utzob'ajil ma Judá

⁷ i aj-atzil re i nim laj ja re i ajawinel chi kchakun chila xujalwachij kib'i: A Daniel xuya pub'i a Beltsasar; a Ananías xuya pub'i a Sadrac; a Misael xuya pub'i a Mesac; xaq i a Azarías xuya pub'i a Abed-nego.

⁸ Xwiri a Daniel xuch'ob' puk'ux chi kutij ti i wa xaq i uwa'al uva muqb'am chi kutij i ajawinel, xaq xutz'onoj utzil che i aj-atzil re i chak pa nim laj rachoch i ajawinel ru' i tziji, chi mutaq chutijawik i wa'im pacha kutij i ajawinel.

⁹ Rumal uchak i Ajwal, i aj-atzil re i chak pa nim laj rachoch i ajawinel xrilo chi lik utz laj achi a Daniel,

¹⁰ xwiri xub'ij che: —Kinxij wib' che i wajaw, chi ajawinel. Ire ub'im chwe pachike i kitijo xaq i kitu'u, we kixrilo chi xwi yix kixchomar ti chkiwach i jub'an chik alab'om chi junam i junab' ku', iwumal yix uri chi i ajawinel kutaq inkamsaxik.

¹¹ Are uri a Daniel xlapan ru' i ajtzuqul ke, chi yatal kan chuqul rumal i aj-atzil chi keutzuq ni a Daniel, a Ananías, a Misael xaq a Azarías, i xub'ij che:

¹² —Kintz'onoj utzil chawe chi ka'an jun ilb'al re chke awajchaki: Chataqa ub'ixkil yet chi che lajuj ij chya' ni chqe chi xwi ichaj kqatijo, xaq to' ya kqatu'u.

¹³ Are kik'aw i ij le, chajunamsaj i qatzunb'al ku' i jub'an chik alab'om chi xkitzuq kib' ru' iwa chi pacha kutij i ajawinel, te'uri cha'ana chqe yoj chrij wach kawil chqe.

¹⁴ I kaj-atzil utz xuta xaq xuya uwach ku', i che lajuj ij xu'an i ilb'al re chke.

¹⁵ Are xik'aw i lajuj ij, i kitzunb'al ike mas chom xaq lik mas o kicho'ab' chkiwach i jub'an chik alab'om chi xkitij kiwa pacha kutij i ajawinel.

¹⁶ Keje uri ile, i aj-ilol ke xresaj b'i kiwa xaq i uwa'al uva muqb'am chkiwach chi kkitij te'eq pacha kutij i ajawinel, i puk'exel ile ichaj kuya chke.

¹⁷ Chke i kajib' alab'omi, i Ajwal xuya kib'iwil xaq kinojb'al re kkitab'ej ub'e k'iyal taq uwach wuj xaq ni'pa taq i etamanik. A Daniel lik kuta ub'e xaq kril ub'e ronojel ni'pa usuk' i b'iroxik chi k-aljin pa wachij xaq i achik'.

¹⁸ Are xtz'aqat i ij chi ajawinel uch'ikom re k'utb'al ke alab'om chwach ire, i aj-atzil chi kchakun pa nim laj rachoch i ajawinel le xeuk'am b'i chwach.

¹⁹ I ajawinel xlapan ku' ike, i chkixol ni'pa taq alab'om le, lik mijun xuriqo chi kemajaw pacha a Daniel, a Ananías, a Misael xaq i Azarías, je are ike le xekanaj kanoq re je rajchak i ajawinel.

²⁰ Che ronojel i b'iroxik chi rajwaxik b'iwil che xaq no'oj, puwi ile i ajawinel xutz'onoj chke, xeuriq lajujmul chi lik mas o kino'oj chkiwach konojel i o kino'oj xaq i je ajnanel chi je o chupam rajawinik.

²¹ I a Daniel xkanaj chila k'a che i nab'e junab' re i rajawinik i ajawinel ma Ciro.