Cantares 8 - Wuj Pa K'ubultzij

¹ ¡Wetene at inxib'al chi xatk'itsax rumal utz'um innan! Keje ile are katink'ulaj pa b'e, katintz'ub'aj te'eqi xaq mijun te'eqi kinuyo'ya.

² Katink'am te b'i ri chi rachoch innan, katinkoj te b'i ri ru' ire xaq lik yet te'eqi at intijonel. Yin lik kinya te'eqi i jel laj uwa'al uva muqb'am chawe re katu'u xaq i uwa'al i turas.

³ ¡Ire chuya u'ab' moxim chuxe' injolom xaq ru' u'ab' wiqab'im chinutz'ulej!

Achi kb'ixanik

⁴ Chiya i tzij chwe, ixoqib' aj Jerusalén, mik'astaj i ral k'axnab'al ink'ux. ¡Chiya che kwarik k'a kk'un ni saq chwach utukel!

Uwaq b'ix Konojel keb'ixanik

⁵ ¿Pachin taq ile chi k'unik re pa tz'inilik jyub' chaqij, chi u'ayb'am rib' che uteleb' i k'axnab'al uk'ux? Chuxe' uche'lal jun mansan xatink'astaj: Chila ipa xuya wi uk'axk'ol che achuch, chila ipa xatralaj wi achuch.

Achi kb'ixanik Ixoq kb'ixanik

⁶ Lik chinak'ama b'i pak'ux, ¡Lik cha'ana ink'exwach che ateleb'! I k'axnab'al k'uxij lik ksach ti uwach pacha i kamik; i uyakik ak'ux che i jun lik keje pacha i jul ke i kamnaq. ¡I u'a'ul i k'axnab'al k'uxij lik pacha jun chom laj a' kjuluwik chi lik are i Dios utzijom!

⁷ Ronojel i ya re i mar ktiki ti chuchupik i k'axnab'al k'uxij, mitene i k'iyal taq raqana ktiki ti chuchupsaxik uwach. We o jun kusujuj taq ronojel ub'eyomal puk'exel i k'axnab'al k'uxij lik xa yo'yanik uri kuch'ak ru' ile.

Konojel keb'ixanik

⁸ I ral qanab' lik k'amaja kel li utz'um ¿Wach kqa'an che we kek'un chutz'onik?

⁹ Wetene jun tapial kqa'an te'eqi jun ral tak'tik ja saq-o'oj puwi, wetene jun uchija kqach'uq teneri ru' tz'alam chakalte'.

Ixoq kb'ixanik

¹⁰ Yin in keje pacha i tapial xaq intz'um keje pacha i tak'taq ja. Rumali inriqom chik kikotemal chwach ire.

¹¹ I ma Salomón o jun utikonb'al uva chila pa Baal-hamón, xuya uk'uxlaxik chkiqul jub'an chajal re kkichajij, are kuriqa i ij re i molonik kuya lajujwinaq kamo' (1,000) saqpwaq chkijujunal.

¹² I lajujwinaq kamo' (1,000) saqpwaq lik awe yet ma Salomón, i lajujwinaq (200) chik ke i chajal, ¡Yin kinchajij intikon re uvas!

Achi kb'ixanik

¹³ ¡Chaya chwe kinta ni ach'awb'al, ixoq ajawinel re i tikb'al kotz'ij! ¡Xaq i qamiy kkaj kkita ach'awb'al!

Ixoq kb'ixanik

¹⁴ ¡Lik pa'anem cha'ana ral k'axnab'al ink'ux, pa'anem pacha jun kej, pacha rak'al jun ati kej chwi taq jyub' nojnaq che i kunb'al muy!