Cantares 3 - Wuj Pa K'ubultzij

¹ Kok taq a'ab' xintzukuj ral k'axnab'al ink'ux re ink'aslemal chwi inch'at. Lik xintzukuj xwiri xinriq taj.

² Are uri xinwalijik xaq xinsutin xol taq b'e re i tinimit chutzukuxik ral k'axnab'al ink'ux re ink'aslemal, pa taq b'e xaq pa taq k'eb'al. Lik xintzukuj xwiri xinriq taj.

³ Xintz'onoj chke ajchajinel re i tinimit chi kesutin pa taq b'e: “¿Yix iwilom ti uwach i ral k'axnab'al ink'ux re ink'aslemal?”

⁴ Lik k'ate ne in elnaq ku' ike le, are xinriq ral k'axnab'al ink'ux re ink'aslemal. Are uri xinchap che u'ab', lik xwo'taj ti chik, xink'am b'i chi rachoch innan.

Achi kb'ixanik

⁵ Chiya i tzij chwe, ixoqib' aj Jerusalén, kumal i atitab' kej xaq kumal i chab'at chi je aj pa taq k'achelaj, chi kik'astaj ti i ral k'axnab'al ink'ux. ¡Chiya ni che kwarik k'a kk'un ni saq chwach utukel!

Urox b'ix Konojel keb'ixanik

⁶ ¿Wach taq ile chi petnaq pa tz'inilik jyub' chaqij, chi pacha taq sib' kb'ororik kel b'i chikaj, chi xaq lik o umuyal i mirra che xaq i umuyal pom, xaq ronojel i jalajuj taq kunb'al k'ajil chi muy?

⁷ ¡Are uch'at ma Salomón! Chajtal kumal oxwinaq (60) achiyab' je yij che i ch'oj chi lik mas ko kiwach chkixol aj Israel.

⁸ Konojel ike le keta'am ch'oj ru' ch'ich' chi k'ulala o uware xaq lik keta'am u'anik i ch'oj, chkijujunal kiya'om kich'ich' chwi taq ka' chi k'ulala o uware, re tob'al kib' chwach wach taq kkiriq pa taq equm.

⁹ I ajawinel ma Salomón u'anom jun uch'at resam che i ko laj che' Líbano.

¹⁰ I aqan lik saq-o'oj, i u'ayib'al rij lik an-o'oj, i ukub'ib'al wiqtal ru' i kaqxar; i chupam wiqtal ru' k'axnab'al k'uxij ke i ixoqib' aj Jerusalén.

¹¹ Ixoqib' aj Sion, ¡Chixel li chutaqexik i ajawinel ma Salomón! Ukojom ukoron chi x-ani che rumal uchuch are xk'uli'ik, are ij re jun nim laj kikotemal puk'aslemal.