Apocalipsis 6 - Wuj Pa K'ubultzij

I kajib' nab'e taq sello

¹ Te'uri, xwil i Ral Chij xuraqch'ij i nab'e sello chke i wuqub' sello. Are uri xinta uch'awb'al jun chke i kajib' chi o kixik' pacha winaq i uch'awb'al pacha uch'awb'al jab', chi xub'ij chwe: “¡Sa'aj xaq chawila!” Xcha.

² Te'uri xintaqej, xaq xwil jun kaway saq rij. O jun kul chrij chi o jun k'aqb'al ch'ab' pu'ab'. Xaq xya' jun koron che. Te'uri x-e che i ch'oj i xuch'ako xaq kch'akan na.

³ Te'uri, xaq xwil chik i Ral Chij xuraqch'ij i ukab' sello. Are uri xinta uch'awb'al i ukab' chke i kajib' b'iroxik chi o kixik' pacha winaq chi xub'ij chwe: “¡Sa'aj xaq chawila!” Xcha.

⁴ Xel chal jun chik kaway kaq rij. I jun chi kul chrij, xya' pu'ab' kupetsaj ch'oj chwach i jyub' ta'aj; o pu'ab' ku'an chke i winaq kkikamsaj kib' chkiwach. Che ire le yatal jun nim laj ch'ich' pu'ab' k'ulala uware.

⁵ Te'uri, xaq xwil chik i Ral Chij xuraqch'ij i urox sello. Are uri xinta uch'awb'al i urox chke i kajib' b'iroxik chi o kixik' pacha winaq, chi xub'ij chwe: “¡Sa'aj xaq chawila!” Xcha. Xintaqej xaq xwil jun kaway eq rij i jun kul chrij, o jun pexu pu'ab'.

⁶ Are uri xinta jun ch'awb'al chkixol i je kajib' b'iroxik chi o kixik' pacha winaq. Xub'ij: “Keb' ral taq k'ox trigo are rajil uchak jun achi re jun ij; xaq waqib' ral taq k'ox cebada are i rajil uchak jun achi re jun ij. Xwiri, masach uwach i aceite, xaq i uwa'al uva muqb'am.” Xub'ij.

⁷ Te'uri, xaq xwil chik i Ral Chij xuraqch'ij i ukaj sello. Are uri xinta uch'awb'al i ukaj chke i kajib' b'iroxik chi o kixik' pacha winaq, chi xub'ij chwe: “¡Sa'aj xaq chawila!” Xcha.

⁸ Xintaqej, xaq xwil jun kaway an-oj rij, i kul chrij “Kamik” ub'i. Xaq o jun chik teren li chrij are i ajawinel re i kamik. Chke i keb' le xya' pki'ab' kkikamsaj uk'iyal winaq chwach i jyub' ta'aj, we k-an ni kajib' tzob'aj chke, kekamsax ni jun tzob'aj che i kajib'. Are i kik'iyal i winaq kekamsax na. I kamsab'al ke kki'ano: Ru' ch'oj, ru' wa'jal, ru' yob'il, xaq ru' taq itzel chikop re uwach i jyub' ta'aj.

Ujo' xaq uwaq sello

⁹ Te'uri xaq xwil chik i Ral Chij xuraqch'ij i ujo' sello. Are uri xwil chuxe' i sujb'al sipon, chila o wi i kanima ike chi xekamsax ni rumal utzijoxik utzij i Dios; ike xkimayij ti ub'ixkil utzij, tupu xekamsax rumal.

¹⁰ Ike xesik'in chub'ixkil: “Lo'laj Ajwal, lik ka'an na pacha ab'im. ¿Junpa nawi ka'an i atb'al tzij pkiwi i winaq re uwach i jyub' ta'aj re ka'an uk'exel chke man xojkikamsaj?” Xkib'ij.

¹¹ Te'uri xya' ki'u' saq, xaq xb'ix chke chi che'uxlan ni jub'i' chik, k'a ktz'aqat ni uk'iyal kiwach i kachalal chwach i Cristo chi kekamsax na pacha ike rumal uchak i Ajwal.

¹² Te'uri, xaq xwil chik i Ral Chij xuraqch'ij i uwaq sello. Are uri xpe jun nim laj kab'raqan; i ij x-equmar uwach pacha jun k'ul lik eq; i ik' xu'on kaq uwach pacha kik',

¹³ xaq i ch'umil chikaj xetzaq li chwach ulew. Xu'ano pacha uche'lal higo are kik'aw jun tew nim keupuqsaj li uwach rumal ucho'ab'.

¹⁴ I kaj juntir xsachik pacha jun wuj xub'or rib'. Ronojel i nimaq taq jyub' xe'elsax ni pkik'ijib'al, xaq keje i ral taq ulew chi je setel chwi i mar.

¹⁵ I nimaq taq ajawinelab' re uwach i jyub' ta'aj xkuwaj kib' pa taq jul, xaq chuxe' taq ab'aj re i nimaq taq jyub'. Xaq keje xki'an i nimaq kipatan, xaq i b'eyomab', xaq i kaj-atzil i achiyab' chi je yij che i ch'oj, xaq i nimaq kicho'ab', xaq keje o kajaw, xaq keje xki'an i winaq chi o pa k'ax pu'ab' i rajaw, xaq i jub'an chi je elnaq chik chisaq.

¹⁶ Xaq xkib'ij chke i nimaq taq jyub' xaq chke i nimaq taq ab'aj: ¡Chixtzaq li chqij! ¡Chojiwuwaj chwach i Jun chi kul pa kub'ib'al chi o u'ij! ¡Chojito chwach i roywal i Ajwal chi Ral Chij kb'ix che!

¹⁷ Ya xuriq i ij re i nim laj tojpen; lik nti jun kuch'ij uk'ulaxik. Xkib'ij.