Apocalipsis 15 - Wuj Pa K'ubultzij

Wuqub' ángel kuk'am wuqub' tojpen

¹ Te'uri xwil jun chik nim laj il chikaj, lik xib'in ib' ru': Je o wuqub' ángel kuk'am wuqub' k'isb'al taq tojpen chi kuya ni Dios pkiwi i je re uwach i jyub' ta'aj rumal i roywal.

Ilanik pa wachij re yijb'al ib'

² Xaq xwil jun mar, pacha lamet chi kjuluw a' chupam. Xaq xewil jub'an winaq je tak'al chuchi' i mar. Ike le are i je tikinaq chuqajsaxik u'ij i nim laj itzel chikop, xaq i uk'exwach. Xkiya ti che chi kukoj ub'i chwach kikrusil. Ike le kuk'am i ki-arpa chi yatal chke rumal i Dios.

³ Xkib'ixaj ub'ix i mam Moisés, chi rajchak i Dios ujer; xaq are i b'ix re i Tol qe chi Ral Chij kb'ix che. Kkib'ij: “Yet at Ajwal Dios, chi Ronojel Kattiki Che. ¡Ronojel taq i ka'ano, lik nim, lik chom! Yet at Ajawinel pkiwi konojel i nimaq taq tinimit. ¡Ronojel i ka'ano lik suk'ulik, lik saq laj tzij!

⁴ Ajwal: ¿O nawi jun kuxij ti rib' chawe? Ntaj. ¿O nawi jun kukoj ti a'ij? Ntaj. Xwi yet at lo'laj Dios, rumali, konojel ni'pa i tinimit chwach i jyub' ta'aj kek'un ni chawach xaq kkikoj ni a'ij, konojel kilom chi ni'pa i a'anom is utz, is suk'ulik.” Keje ile xkib'ixaj chwach i Dios.

⁵ Te'uri xintaqen chik, i xwil i lo'laj k'ijib'al re i Dios chila chikaj; xaqte'et xjaqtaj uchija. Xwil i tasaj re jun ja chi o u'ij, ipa k'olom wi i lajuj tzij pixab' chi tz'ib'talik.

⁶ Che i lo'laj k'ijib'al re i Dios le, xe'el li wuqub' ángel chi kok'am wuqub' tojpen. I ki'u' antal che i k'ul saq, lino kb'ix che; lik kwalch'inik. Xaq i yut'b'al uwach kik'ux, lik an-o'oj.

⁷ Te'uri, o jun chke i kajib' b'iroxik chi o kixik' pacha winaq ketzunik, xuya jujun tu'b'al, lik an-o'oj chke i wuqub' ángel le. I tu'b'al le, nojnaq che i tojpen re i Dios, Ire chi k'aslik k-e ij saq chrij.

⁸ I lo'laj k'ijib'al re i Dios xnoj che i sib' rumal i nim laj u'ij i nim laj ucho'ab' Ire. Mijun kok chila, k'a kutzin ni wuqub' tojpen chi kik'amom b'i i wuqub' ángel.