AMÓS 3 - Wuj Pa K'ubultzij

I chak chi o chuqul i profeta

¹ Aj Israel, chita wach kub'ij i Ajwal chiwe chi ix utinimit chi xixresaj li pa Egipto:

² “Xwi yix ix incha'om chkixol konojel taq i tinimit chwach i jyub' ta'aj. Rumali lik kintz'onoj ni ronojel i mak atzalal chi i'anom.”

³ We je keb' keb'in junam alaj uri chi junam kiwach;

⁴ we i koj kuraq puqul pa k'achelaj, alaj uri chi xuchap jun uti'; we i ral koj krawin li pa jul, alaj uri chi o tikinaq chuchapik;

⁵ Jun tz'ikin we ktzaq pulew, alaj uri chi kojtal jun chapb'al re; i chapb'al le we ksak'lin pulew, alaj uri chi o xtiki chuchapik;

⁶ we i trompeta kch'aw pa tinimit, i winaq ke'ok uri chk'achirik; we o jun utz taj kk'ulmax pa tinimit, alaj uri chi are i Ajwal utaqom loq.

⁷ I Ajwal nti to' xaq ku'ano we kuya ti retamaxik chke i rajchak chi je profeta.

⁸ ¿Pachin kb'arb'at ti rumal uxib'rikil we ksik'in i koj? ¿Pachin kch'aw ti pub'i i Ajwal we are Ire taqannaq?

Usachik uwach i Samaria

⁹ Chiwesaj ub'ixkil yix pa nimaq taq ja ke i ajawinelab' re i Asdod xaq i pa nimaq taq ja ke i ajawinelab' re i Egipto: “Chixpet chwi taq jyub' re i Samaria; chiwila i xaqmanal chi ktijin u'anik chupam i tinimit le xaq i kamik chi ktijin u'anik chila.”

¹⁰ I Ajwal kub'ij: “Ike keta'am ti kki'an i suk'ulik; xa kkik'ol pa nimaq taq ja ke ajawinelab' ni'pa i kkel-aj pa taq ch'oj.”

¹¹ Rumali, keje iri kub'ij i Ajwal Dios: “Jun ajch'oj kusutij ni rij i nim laj tinimit, kuwulijsaj ni ronojel i tob'al awib' xaq kel-an b'i chupam i nimaq taq awachoch.”

¹² Keje iri kub'ij i Ajwal: “Keje pacha i ajyu'ul chij chi kresaj li keb' aqanij o we utzam jun xikinaj puchi' i koj, keje uri k-on i ki'anmajik i aj Israel ile chi je jeqel pa Samaria, ike le chi kki'ayb'a kib' che chomiq taq kotz'ib'al re i Damasco.”

¹³ I Ajwal Dios, chi ronojel ktiki che, kub'ij: “Chita yix xaq chiya utzijol chrij i tinimit re i ma Jacob,

¹⁴ che i ij le are kintz'onoj che i tinimit Israel ronojel umak, kinwulijsaj ni k'ijib'al re sujb'al sipon re i Betel; xaq i ok'a' chi o che i sujb'al sipon kk'upix na xaq ketzaq ni pulew.

¹⁵ Kinwulijsaj ni ja re i alaj xaq re i sa'ij, lik kinsachsaj ni kiwach i ja re marfil xaq keinwulijsaj ni i nimaq taq ja ke ajawinelab'.” I Ajwal xub'ij ile.