AMÓS 1 - Wuj Pa K'ubultzij

U'atik tzij pkiwi i nimaq taq tinimit aj naqaj

¹ Iri are i utzijonik ma Amós, ajyu'ul chij aj pa tinimit Tecoa, xya' che rumal i Dios chrij i tinimit Israel, che i keb' junab' chuxe'el kab'raqan, che rajawinik i ma Uzías, ajawinel re Judá, xaq re i ma Jeroboam, chi uk'ojol ma Joás, ajawinel re Israel.

² I Ajwal are ku'ano chi ktataj uch'awb'al chi ktinin li k'a chwi jyub' Sion chila Jerusalén, i ulew re i k'im kchaqijik xaq lik kchaqij i jyub' re i Carmelo.

³ Keje iri kub'ij i Ajwal: “I je aj Damasco ki'anom k'iyal taq mak atzalal chi lik kinmayij ti uya'ik utojb'alil chke; man xekiwach'wa i je aj Galaad ru' wach'b'al re ch'ich'.

⁴ Rumali kinnak' ni a' che i nim laj rachoch i Hazael, xaq i a' le kuk'atsaj nu b'i i nimaq taq ja re Ben-adad.

⁵ Kinjaq ni uchija re Damasco ru' cho'ab'; kinsach ni uwach i krajawin chwach i ta'aj re i Avén xaq i krajawin pa Bet-edén, i aj Siria ke'elsax ni chwach i kulew xaq kek'am nu b'i pa Kir.” Are i Ajwal kb'iwik.

⁶ Keje iri kub'ij i Ajwal: “I je aj Gaza ki'anom k'iyal taq mak atzalal chi lik kinmayij ti uya'ik utojb'alil chke; man xkik'am b'i konojel i winaq re i tinimit i xkik'ayij chke aj Edom re kitaqon.

⁷ Rumali kinnak' ni a' che i kitapial aj Gaza, xaq i a' le kuk'atsaj nu b'i i nim laj ja re i ajawinel.

⁸ Kinsach ni uwach i krajawin pa Asdod xaq i krajawin pa Ascalón. ¡Ru' ronojel incho'ab' kink'aq wib' chrij i Ecrón, i lik k'a kkam ni k'isb'al aj Filistea!” Are i Ajwal kb'iwik.

⁹ Keje iri kub'ij i Ajwal: “I je aj Tiro ki'anom k'iyal taq mak atzalal chi lik kinmayij ti uya'ik utojb'alil chke; man xekesaj b'i konojel i winaq re jun tinimit chi lik are te jun tinimit chi k'ax te kkina kib' chkiwach pacha katz kicha' kib', i xkijach pu'ab' i Edom.

¹⁰ Rumali kinnak' ni a' che kitapial i aj Tiro, xaq i a' le kuk'atsaj nu b'i i nimaq taq ja ke ajawinelab'.”

¹¹ Keje iri kub'ij i Ajwal: “I je aj Edom ki'anom k'iyal taq mak atzalal chi lik kinmayij ti uya'ik utojb'alil chke; man ru' ch'ich' chi k'ulala o uware xaq lik ru' ti k'axnab'al kik'ux, xekiterb'ej i katz kicha' aj Israel. Lik xko'taj li koywal chi lik nim o pkik'ux chi lik kk'is taj.

¹² Rumal uri ile kinnak' ni a' che i Temán, xaq i a' le kuk'atsaj nu b'i nimaq taq ja re i Bosra.”

¹³ Keje iri kub'ij i Ajwal: “I je aj Amón ki'anom uk'iyal mak atzalal chi lik kinmayij ti uya'ik utojb'alil chke; man rumal i kirayijb'al chi kkaj kki'an nim che i kulew, xkiraqij i kalanb'al ixoqib' chi je raxwinaq pa tinimit re i Galaad.

¹⁴ Rumali kinnak' ni a' che i tapial re i Rabá, i ru' i a' le kinsachsaj ni uwach i nimaq taq ja ke ajawinelab', che i ij re i ch'oj le lik kesik'inik, xaq ru' jun nim laj uch'awb'al jab' tew upam.

¹⁵ I rajawinel kelsax b'i pa cho'ab' chwach rulew, junam ku' i achiyab' chi je re ire chi nimaq kipatan.” Are i Ajwal kb'iwik.